جنگاں
1965ء تے 1971ء دی جنگ یاد اے ،ریڈیو تے جنگ دیاں خبراں ہن ،اساݙی وستی ء ِچ وݙا تے چنڳاں ریڈیو مامیں خان محمد دی دکان تے ہا، کالی باڈی آلے فلپس دے ریڈیو توں بی بی سی تے آل انڈیا ریڈیو وی سُنڑیندا ہا، مامے خان محمد دی دکان دے اڳوں پِپل دا وݨ ہا ،ݙوترائے جوڑیاں تاش دیاں ہوندیاں ہن تے ریڈیو توں ڳاوݨ چلدے ہن ،میݙے ناناں سئیں ڳاوݨ نہ چلاوݨ ݙیندے ہن،انہاں کوں پرے کنوں اَمدا ݙیکھ تے ریڈیو بند کر ݙیندے ہنتے بازیاں بند تھی ویندیاں ہن،پر جݙاں جنگ ہئی، ناناں سئیں کھٹڑے تے پہلے پلتھی مار تے آن ٻہندے ہن،اَٹھ وڄے رات کوں پاکستان دیاں خبراں ،سوا اٹھ وڄے بی بی سی ،اڄ دا تاں میکوں پتہ کائنی اے وی کائنی جو بی بی سی کوڑا ئے یا سچا ، پر ہوں ویلے وی لوک ایہو اکھیندے ہن جواسیݙا ریڈیو کُوڑ مریندے تے بی بی سی آلا سچیاں خبراں ݙیندے ۔ آل انڈیا ریڈیو توں پہلے گاوݨ سُنڑدے ہن،وَل کا وڑ کنوں بند کر ݙتونے کیوں جو دشمن ملک اے۔جنگ دے دوران بلیک آئوٹ ہوندا ہا ،تیلی ٻال تے کہیں کوں ٻیڑی بکھاوݨ دی موکل نہ ہئی ،رات کوں ریل تے پارھا ݙیندے ہن ،ہک رات پارھا ݙیوݨ آلے نِینگریں اے کیتا جو چاچے وَلو دی مکئی توں سِٹے پٹ تے تراڑا کیتا ،لوک ݙیکھ تے ݙر ڳے ،جو بھاہ دے لمبے کون لئی کھڑے، کئی بم تاں نی پھٹیا،اڳوں ونڄن تاں چھوکرے سِٹے بھُنیندے پن ، چاچا وَلوکھٹڑا سٹ تے سُتا پیا ہا پر چھوکرے اُوندی کھٹ کوں چا تے پرے رکھ آئے ، ٻے ڄہاڑے پنچائت تھئی تے وݙیں چھوکریں کوں کھلے ماریے ۔
حوالہ
[لکھو | ماخذ وچ تبدیلی کرو]کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان