جنرل ضیاء دے کارنامے

کلھ ڄیہاڑی دی پکی ہوئی ٹِک موجب ہوٹل اِچ ٻیٹھے ہاسے ‘ اخبار اَئی تاں ورقہ ورقہ تھی وَنڈیج ڳی ‘ کئی ورقہ کہیں دے ہتھ اِچ تے کئی کہیں دے ہتھ اِچ‘ خبریں آلا اُتلا ورقہ منشی مُک مُکا کنے ہا تے وِچلا ہک ورقہ مولوی بھن تروڑ دے ہتھ آیا ہا ‘ اسیݙے اخبار آلیں مَارکے ہک دِھر پکڑی ہوئی اے او وَت ایہ ہے جو خبریں دیاں وݙیاں وݙیاں سُرخیاں تے اُنہیں دے تلوں ݙوں چار سطراں ‘ مُہری ‘ تے چھیکڑی ورقے تے چھاپ ݙیندن تے بچدا بھانگہ کہیں وِچلے ورقے تے ونڄ چھپیندن‘ پڑھݨ آلے کوں ’’بقایا‘’ ڳول لبھݨ تے چنگاں کشالہ کٹَݨاں پَمدے۔ چس اُوں ویلھے اَمدی اے جیرھے ویلے اخبار ݙوں بندے پڑھدے ٻیٹھے ہووِن یا ورقہ ورقہ تھی ٻہوں سارے بندیں اِچ ونڈی پی ہووے ‘ کلھ ایہو لیکھا ہا۔

منشی مُک مُکا اَپݨی عادت موجب نویں سرڳٹ بَکھا چھیکواں سُوٹا مَار ناسیں اِچوں دُھنواں کڈھیا تے اُچی اَواز اِچ ہک ’’خبر‘‘ پڑھݨ پے ڳیا‘ ایہ خبر جماعت اسلامی دے ہک جُھوݨے لیڈر دے ہک بیان بارے ہئی ۔ خبر موجب میاں طفیل محمد ہوریں آکھیے جو ایہا حکومت تے ایہے حاکم رہ ڳے تاں ایہو ملک کائناں بچسے ۔ کشمیر اِچ جیرھا کجھ کِراڑ کریندے پن اوہو کجھ پاکستان اِچ مسلمان کریندے پِن ۔ جیرھا بندہ افغانستان اِچ مجاہدین دی جھاہ تے کہیں ٻے کوں حکومت ݙیوݨ دی ڳالھ کریندے او ’’الودا پُٹھا اے ۔ خان عبدالغفار خان کوں پاکستان نال ایجھا ویر ہا جو اوں اِتھاں پوریجݨ اِی منظور نہ کیتا ‘ اوندے ناں تے چوک بݨسے تاںاوندی روح کوں خُشی کائناں تھیسے ۔ ݙکھ تھیسے ‘ ٹھہندی اینویں ہے جو اُوندے ناں دے چوک ہندوستان اِچ بݨݨ ‘ خبر دی سُرخیں اِچ ہک ݙوں ٻیاں سوادی ڳالھیں وی ہَن ‘ اَتے تئیں پڑھ کراہیں مُنشی مُک مُکا ‘ اُتلے تلے ‘ ایݙے اوݙے دید بھنوائی ‘ پر بقایا نہ لَدھا ‘ بقایے والا ورقہ مولوی بھن تروڑ دے ہتھ اِچ ہا‘ ݙوہیں ‘ ہتھیں نال پکڑی سنبھالی ٻیٹھا ہا۔ مُنشی اونکوںآکھیا یار ‘ اے ……… کِھلیا تے آکھیُس تیݙے ’’مامے‘‘ دابیان پڑھدا ٻیٹھا ہَم اوہو مُکاوݨے‘ مولوی متھے تے تریڈھی پا اُوں ݙے کوڑیج کراہیں ݙٹھا تے وَلدی ݙتی ‘ میݙا مَامَاں وَت کیوں تھیوے‘ مَاماںتاں لڳدے او جنرل ضیاء دا جیندیاں تریفاں کریندیں کریندیں ہُݨ اِی وات نِسی مِلدا ۔ توں خبر دیاں سُرخیاں پڑھدا رَہ ڳیں تے مَیں ایں وَرقے تے بقائے اِچ اصل خبر پڑھدا رَہ ڳیاں‘ اساں جیہا کوئی ہماتڑ ‘ تماتڑ ‘ عام بندہ اَپݨے مونہہ اِچوں کوئی گتھی ڳالھ کڈھ ٻہے تاں اَکھیندن سئیں ! پچوسنجاہ مُک ڳس ‘ پیچ ڈِھلے تھی ڳینس ‘ تھتھوں چُک ڳے اینکوں مؤ مبارک اِچوں ٹُکر پڑھوا تے کھوائو ‘ تے جے لیڈر یا مولانا ڳݨیجݨ ‘ سݙویجݨ آلا کوئی وَݙا بندہ وا پُݨݨ پَے ونڄے تاں اَکھیں مُوٹ تے اونکوں مَنݨ آلے عقل دے اندھے واہ واہ کرݨ پئے ویندن ‘ ہُݨ کوئی پُچھے جو ایہا حکومت ایجھی بھاڑی اے اَتے ایہے حاکم ایجھے بھاڑ دے تَل تے چوڈیہہ دے چندرے ہِن تاں تُسیݙی اپݨی جماعت بارے تُسیݙاکیا رایا اے ‘ او اِی تاں آئی جے آئی اِچ اے ۔ہِیں لیکھے تُساں آپ اِی حاکم او ‘ ٻی ڳالھ ایہ ہے جو غفار خاں ‘ بہشتی دا افغانستان اِچ پوریجݨ تاں تسیکوں یاد رَہ ویندے ‘ جنرل موسیٰ دا ایران اِچ پوریجݨ بُھل ویندو ‘ یا اونویں وی رَئی رکھ ویندو ‘ جو او جرنیل ہا‘ تُساں ایہ آکھیئے جوجنرل ضیاء اسیکوں قومی ویس ݙتے اَتے سُنڄاݨ کرائی اے‘ پہلی ڳالھ تاں ایہ ہے جو او دنیا تے پاکستان دی عوام کوں دوکھا ݙیوݨ دی خاطر وردی دے اُتوں شیروانی پیندا ہا‘ ٻی ڳالھ ایہ وی ہے جو قوم کوں ہیروئن دا نشہ لاوݨ آلا ‘ کلاشنکوف ہتھ اِچ ݙیوݨ آلا اَتے ایم کیو ایم جیہاں سوکھڑیاں ݙیوݨ آلا وی اوہو ہا۔

21؍اپریل 1992ء

حوالہ

ٻٹ کڑاک، مصنف: انیس دین پوری۔ ناشر: جھوک پبلشرز ملتان