جندن ملتانی

جندن ملتانی اندرون پاک دروازہ محلہ قاضیاں دے رہݨ والے ہن۔ جندن ملتانی ایں دور دے چھیکڑی شاعراں وچ ݙوجھیاں توں ممتاز نظردن۔ جندن ملتانی دے ݙوں مجموعے ’’انوارِ عشق‘‘ تے ’’بازارِ عشق‘‘ چھپ چکن۔ ’’انوارِ عشق‘‘ نایاب اے۔ جندن ملتانی بنیادی طور تے کافی دے شاعر ہن۔ آپ 92سال دی عمر وچ 1926ء وچ وفات پاتی۔ ’’بازارِ عشق‘‘ وچ40کافیاں تے ہک ڈھولا شامل اے۔

کافی

خطا میں وچ کیڑھی دلبر

دلوں ساکوں بھلایو کیوں

تیݙے کارݨ ہاں دیوانی

خلق ساری ہے حیرانی

ݙکھا مکھڑا او دل جانی

اکھیں سِکدیاں سکایو کیوں

چوطرفی دید ہر پاسے

طلب دیدار وچ ہاسے

لنڳھیں لُک چھپ توں کر پاسے

ݙسا ساکوں رُلایو کیوں

سکا میکوں نہ توں ماہی

لباں تے جند میݙی آئی

توݨیں جندن ہے سودائی

نہ  دامن نال   لایو کیوں

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان