جمعے دا وعظ

نانا سئیں  جمعے دا وعظ کریندے ہن ، تقریر تاں  اپݨی ٻولی ءِچ ہوندی ہئی ، شعر فارسی دے ہوندے ہن ۔ موسیٰ خاں  جمالی تقریر دے نال تھیندا ہا ، جیویں  نانا سئیں تقریر کریندا ہا او دہرائی کریندا ہا ۔ فارسی شعر غلط پڑھ ویندا ہا ، چاچا عبداللہ آکھیا مولوی صاحب یا تاں  فارسی شعر نہ پڑھیے کرو یا ول موسیٰ خاں  کوں  پکوائو ۔ نانے سئیں  آکھیا اساکوں  فارسی پڑھائی اے ، فارسی شعر اَمدن ، اپݨی ٻولی پڑھاوِن ہا تاں  اپݨی ٻولی دے ریاستی شعر آون ہا۔

حوالہ

کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان