جلم بِن شیبان

جلم بن شیبان ناں دا ہِک قرامطی سردار ہَئی۔

جلم بن شیبان دا ملتان تے حملہ

جلم بن شیبان ناں دا ہِک قرامطی سردار جِہڑا ہِک مُد کنوں موقع دا تانگھی ہَئی اُوں نے ہِک رات آپݨے جَتّھے نال اَچّݨ چیتی علویاں اُتے حملہ کِیتا اَتے ٣٧٣ ہجری وِچ ملتان تے قابض تھی ڳِیا۔ سید ابو ظفر ندوی مؤلف تاریخ سندھ لکھین٘دے ہِن جو:- "این٘ویں لڳدے جو جلم بن شیبان نے ملتان اُتے کوئی حملہ ٻاہروں نِھیں کِیتا بلکہ اندرونِ شہر بغاوت کرا کے آپ مدَتی بݨیا اَتے وَل سردار تھی ڳِیا۔"

ملتان دی حکومت

جلم بن شیبان نے ملتان اُتے قبضہ کر کے بظاہر فاطمی خلیفہ دا سِکّہ اَتے خطبہ جاری کِیتا۔ بھان٘ویں جو اُون٘دا فاطمی حکومت نال نہ کُئی ربط ہَئی اَتے نہ تعلق۔ صرف اِیں کِیتے جو ڄیکر بنو عباس دی طرفوں کُئی حملہ تِھیوے تاں فاطمی خلیفہ کنوں امداد گِھدّی ون٘ڄ سڳیڄے۔ نئیں تاں ایہ ڄیکر اسماعیلی ہوندا تاں پہلی اسماعیلی سلطنت کوں نہ مُکین٘دا۔ اُوں نے ملتان دے وݙّے بُت سورج مندر کوں تروڑ ݙِتّا، جہڑا محمد بن قاسم دے ویلے کنوں اُوں ویلے تئیں محفوظ چلا آن٘دا ہَئی۔ اَتے جین٘دے پاروں ملتان دے حکمران مال اَتے سیاسی فَیدے چین٘دے رہن٘دے ہَن۔ محمد بن قاسم دی مَسِیت کوں بند کروا ݙِتّا۔ اُوں نے آپݨے مذہب دی اشاعت دے نال نال سلطنت کوں وی تَکڑا کرݨ کِیتے جِتّی تھی سڳدی ہَئی کوشِت کِیتی۔ نیڑے تیڑے دے راجیاں مہا راجیاں نال عہد ناویں کِیتے اَتے ڳوانڈھی اسلامی سلطنتاں دے حملیاں کنوں آپݨے آپ کوں محفوظ کر گِھدّا۔ کیوں جو سارے مسلمان حکمران مذہبی اَتے سیاسی طور تے خلافتِ بغداد نال جُڑے ہوئے ہَن۔ جلم بن شیبان ٣٧٤ ہجری کوں مر ڳِیا۔

ٻِیا ݙیکھو

• ملتان دے مسلمان گورنر۔
• ملتان تے علویاں دی حکومت۔
• جعفر بن محمد۔
• ملتان قرامطیاں دی ولھیٹ وچ۔
• شیخ حمید۔