جلال الدین خوارزم شاہ دا ملتان اُتے حملہ

خوارزم شاہ دی شکست دے بعد اُون٘دا جُؤان اَتے اُولو العزم پُتر ولی عہد سلطان جلال الدین خوارزم شاہ اَخِیرلے دَم تئیں مغلاں نال بے جگری اَتے بہادری نال لڑدا ریہا۔ جہڑیلے اُوکوں ایران اَتے افغانستان کنوں کُئی کمک نہ مِلّی تاں اُوہ ہندوستان کَن متوجّہ تِھیا۔ اُوکوں اُمید ہَئی جو ہندوستان دی اسلامی حکومت اُون٘دا سہارا بݨسی۔ اُوہ اِیں آس وِچ اٹک تئیں اُݙدا ہوئیا اَپَڑیا۔ اَتے اُون٘دے پِچُّھوں چنگیز خان وی لشکرِ جرّار کوں سرپٹ بھڄین٘دا ہوئیا سندھ تئیں آن اَپَڑیا۔ پَر جہڑیلے اُوں نے جلال الدین خوارزم شاہ دا سَٹھ فُٹ اُچّی پہاڑی کنوں گھوڑے سمیت دریا وِچ ٻِلانڳ لاوݨ اَتے وَل مُڑ مُڑ کے پِچّھاں ݙیکھݨ ݙِٹّھا تاں اُوں نے آپݨے مُون٘ھ وِچ اَنڳِل دبا گِھدّی۔ بے اختیار اُون٘دے مُون٘ھ کنوں نِکلا جو کاش! ایہ میݙا پُتر ہون٘دا۔ اُوہ جلال الدین دی ہِمّت تے شجاعت کوں ݙیکھ تے ایہڄا خُش تِھین٘دا پِیا ہَئی جو اُوں نے سواراں کوں اُتھائیں روک گِھدّا اَتے پُتراں نال مخاطب تھی تے آکھیُس:-
"مادرِ گیتی ایہو جئیں پُتر کݙان٘ہیں کݙان٘ہیں ڄَمین٘دی ہِے۔ ڄیکر قسمت نے اِین٘دا ساتھ ݙِتّا تاں ایہ آپݨے پِیؤ ݙاڈے دا ناں روشن کریسی۔"
جلال الدین نے لاہور اَپِڑ تے سلطان شمس الدین التمش اَتے ناصر الدین قباچہ کنوں امداد مَنڳی، پَر اُوہ چنگیز خان جئیں سفّاک دُشمن نال لڑائی مُل گِھنّݨ کوں تیار نہ ہَن جین٘دا ایمان ای ایہو ہَئی جو جِتّھاں ون٘ڄے اُتّھاں انسان دی نسل مِٹا ݙیوے!۔

آمدہ بود بلائے ولے بخیر گزشت

التمش نے جلال الدین دے ناں پیغام گَھلّیا جو اِتُّھوں دا ہوا پاݨی تیکوں راس نہ آسی۔ جلال الدین این٘دا مطلب سمجھ ڳِیا اَتے سندھ کَن ٹُر پِیا۔ ناصر الدین قباچہ کوں پَتہ لڳّیا تاں اُوہ پُورے لشکر دے نال مقابلے وِچ نِکلیا۔ سلطان دے جرنیل اوزبک پائی نے کھوکھراں دے رد نال اُچ دے مقام اُتے قباچہ نال خونریز جَنگ کِیتی۔ جین٘دے وِچ قباچہ کوں شکست تھئی اَتے اُوہ بھکر کَن بَھڄ ڳِیا۔ سلطان ملتان کَن ٹُریا۔ قباچہ ایہ خبر سُݨ تے اَچّݨ چیتی ملتان آیا اَتے قلعہ بند تھی ٻیٹھا اوزبک پائی نے وَدھ تے قِلعے اَتے شہر دا محاصرہ کر گِھدّا۔ حضرت شیخ الاسلام بہاء الدین زکریا سلطان دے ناں پیغام گَھلّیا جو:-
"اِیں شہر وِچ زیادہ تر مسلمان اَباد ہِن اُنّھاں دی خونریزی نال تیݙے ہَتھ کیا آسی!"۔
سلطان نے سئیں شیخ الاسلام دے سفیر دا ݙاڈھا آدر کِیتا اَتے اَچّݨ چیتی ملتان کنوں گھیرا چاوݨ دا حُکم ݙِتّا۔ اَتے ایہ جنگجو، پَر حوصلہ مند جؤان آپݨی قسمت نال ہِک واری وَل ٹکراوݨ کِیتے براستہ سیوستان آپݨے مُلک کَن وَل ڳِیا۔

ٻِیا ݙیکھو

• شیخ الاسلام بہاء الدین زکریاؒ ملتانی۔
• ملتان اُتے مغلاں دا حملہ۔ـ
• ملتان اُتے مغلاں دا ݙوجھا حملہ۔

حوالے

۔