جعفر بن محمد
شجرے اُتے غور کرݨ نال پتہ لڳدا ہِے جو حضرت جعفر مولائے کائنات حضرت علی کرمّ اللہ وجہہ دی پنڄویں پُشت وِچ اولاد ہَن۔
جعفر بن محمد
[لکھو | ماخذ وچ تبدیلی کرو]علامہ سید عبد الحی حسنی آپݨی مشہور کتاب نزہتہ الخواطر وِچ لکھین٘دے ہِن جو پہلے علوی بزرگ جنّھاں نے حجاز کنوں ہجرت فرما تے ملتان کوں آپݨاں وطن بݨایا اوہ جعفر بن محمد بن عبداللہ بن محمد بن عمر الاطرف بن علی بن ابی طالب ہَن۔ انّھاں نے ملتان اُتے قبضہ کِیتا، آپݨے ناں دا خطبہ پڑھوایا اَتے وَل انّھاں دی اَل ٣٦٤ تئیں ملتان اُتے حکمران رہی۔ انّھاں دی اَل وِچ بقول ابن خداع ٤٨ پُتر ہَن۔ بقول بیہقی ٨٠ ہَن، اَتے بقولِ شیخ مشرف آبادی ایہ ڳِݨَتری ٥٠/٦٠ دے نیڑے تیڑے ہَئی۔ ابو الیقظان اِیں بارے وِچ ڈھیر صحیح معلومات رکھین٘دے ہَن، اُوہ اِنّھاں دی ڳِݨَتری ٻہوں ڈھیر ݙسین٘دے ہَن۔ انّھاں وِچ بادشاہ وی ہَن، علماء اَتے نسّاب وی ہَن، انّھاں وِچوں اکثر اسماعیلی مسلک دے مَنّݨ آلے ہَن [١]۔ جمال الدین احمد صاحب دی اِیں عبارت نال تلّے ݙتّے ڳئے نتیجے نِکلدے ہِن:
- علوی ٹٻّر نے ساریاں کنوں پہلاں جعفر بن محمد ملتان آئے ہَن۔
- ملتان آلیاں نے انّھاں کوں آپݨاں باشاہ مَن گِھدّا ہَئی۔
- انّھاں دی اَل ٣٦٤ہجری تئیں ملتان اُتے حکومت کرین٘دی رہی۔
- انّھاں وِچّوں اکثر اسماعیلی مسلک دے مَنّݨ آلے ہَن۔
شجرے اُتے غور کرݨ نال پتہ لڳدا ہِے جو حضرت جعفر مولائے کائنات حضرت علی کرمّ اللہ وجہہ دی پنڄویں پُشت وِچ اولاد ہَن۔ اَتے اِیہ زمانہ ہارون الرشید دا ای تھی سڳدا ہِے۔ پتہ لڳدا ہِے جو محمد بن عدی گورنر سندھ جہڑیلے ملتان اُتے قبضہ کرݨ کِیتے اَپڑیا تاں اِتّھاں حضرت جعفر بن محمد علوی آپݨی پوزیشن مضبوط بݨا چُکّے ہَن۔ اہلِ ملتان نے محمد بن عدی دے مقابلے وِچ انّھاں دی مدد کِیتی اَتے اِیہ محمد بن عدی اُتے غالب آئے اَتے اُون٘دے بعد بنو سامہ دا عروج تئیں ایہ ٹٻّر ملتان اُتے حکومت کرین٘دا ریہا۔ [٢]
جعفر بن محمد علوی دے ساکدار
[لکھو | ماخذ وچ تبدیلی کرو]ابن خلدون کتاب ثانی جلد نہم دے مطالعے نال پتہ لڳدا ہِے جو اُون٘دا پِتریر عبد الرحمٰن آپݨے ساکداراں نال یمن وِچ اَباد تھی چُکیا ہَئی۔ اَتے اُوہ اتّھاں ݙاڈھی طاقت دا مالک بݨ چُکیا ہَئی۔ تہوں ٢٠٩ ہجری وِچ جہڑیلے عبد الرحمٰن نے خلیفہ مامون الرشید دے خلاف بغاوت کِیتی تاں یمن آلیاں نے آلِ محمد ﷺ دی حمایت وِچ اُون٘دے ہَتھ اُتّے بیعت کِیتی۔ مامون نے آپݨے غلام دینار کوں ٻہوں وݙّی فوج دے نال اِیں مہم کِیتے ٹوریا۔ جہڑیلے شاہی لشکر یمن اپڑیا تاں عبد الرحمٰن نے مقابلے دی طاقت آپݨے اندر نہ ݙیہدے ہوئے امن دی ارداس کِیتی اَتے مامون دی اطاعت مَن گِھدّی۔ این٘دے نال پتہ لڳدا ہِے جو انّھاں ݙون٘ہائیاں علویاں دی جمعیت ٻہوں وَدھ چُکّی ہَئی۔[٣]
ٻِیا ݙیکھو
[لکھو | ماخذ وچ تبدیلی کرو]حوالے
[لکھو | ماخذ وچ تبدیلی کرو]- ↑ نزہتہ الخواطر اُردو حصّہ اول طبقہ ثالثہ صفحہ نمبر ١٠٩۔
- ↑ مولانا نور احمد خان فریدی، تاریخ ملتان (جلد اوّل)، قصر الادب رائٹرز کالونی، ملتان۔صفحہ نمبر 100 تا 102۔
- ↑ مولانا نور احمد خان فریدی، تاریخ ملتان (جلد اوّل)، قصر الادب رائٹرز کالونی، ملتان۔صفحہ نمبر104۔