جاگ سرائیکی جاگ

١٩٧٠ء دے ݙہاکے کنوں "جاڳ سرائیکی جاڳ"دا نعرہ بلند تھئے ـ ایں دی پرݙو سرائیکی وسیب دے چارے چُنڈیں وچ پہنچی ہے تاں تھل، دامان، کچھی، ٻیٹ، ٻیلا تے روہی دے لوکیں ایں نعرے کوں ست سلام آکھیے ـ ایں نعرے کوں نال گھن تے کئی قوم پرست سامݨے آئے ـ جنھیں وچوں راز جتوئی، عاشق بزدار، مجاہد جتوئی، تاج گوپانگ، اکرم قریشی، ظہور دھریجہ تے تاج لنگاہ دے ناں نشابر ہن ـ ہولیں ہولیں ایں تحریک اُسرڳا پکڑیا تاں ١٩٩٠ء دے ݙہاکے وچ ریڈیو پاکستان ملتان دے پروگرام "روہ روہی، تھل دامان" سرائیکی لٹریچر کوں ہوا دئیں مونڈھیں تے ٻلھا دنیا دے کونے کونے دی سیرکرائی ـ فی زمانہ کئی قوم پرست سرائیکی رحریک دا حصہ ہن ـ میکوں حیرانی ایں ڳالھ دی ہے جو اساݙے اڄوکے سرائیکی اڳواݨ روہی، تھل تے ٻیٹ دی ڳالھ کریندن مگر انھیں"دامان تے کچھی کیوں نظر نہیں اندی ـ سرائیکی قوم پرست لوکیں دے رویے کنوں "دامان تے کچھی" دے ماݨھوں کئی تحفظات دا شکار ہن ـ اڄوکے کہیں قوم پرست دے منہ کنوں دامان دے وسائل اتے دامان مسائل تے کوئی ڳالھ نئیں نکلدی ـ ٻیلی کیوں? کیا دامان وسدے بلوچ سرائیکی قوم دا حصہ نئیں ـ کیا دامان دئیں بلوچیں سرائیکی زبان اتے ادب دے ارتقاء سانگے اپݨی مادری زبان دی قربانی نئیں ݙتی ـ کیا ایجیݙی وݙی قربانی سرائیکی دانشوریں کوں نظر نئیں اندی ـ اساݙے محترم اسلم رسول پوری اپݨے رسالہ "ٻُچکار آوازاں" افریقی زبان توں ثابت کرݨ دی لا یعنی کوشش کیتی ہے ـ حالاں سرائیکی زبان وچ "ٻُچکار، ݙٹکار، ڄرکار تے دڑڳار"آوازاں بکوچی زبان دی مرہون منت ہن ـ جیکر دامان وسدے سرائیکی بلوچیں کوں سرائیکی اڳواݨ قبول نہ کریسن تاں نتیجہ ایہ نکلسی کلھ آلی کار افغانی، ایرانی و تورانی لُٹ پلٹ ویسن ـ ایں پوسٹ دا مطلب سردار عاشق خان بزدار دی توجہ دامان دو ݙیواوݨ ہے ـ یار لوک ایندا کوئی ٻیا مطلب نہ گھنن بس "دامان تے کچھی " دے لوکیں دی ڳالھ کرن ـ ٻیا ایہ جو باچا خان دی قوم پرستی کنوں سبق سکھن ـ کہیں وی وفاقی پارٹی دا حصہ نہ بݨن ـ لکھت اورنگزیب بغلانی