جاوید نامہ اقبال دے سرائیکی ترجمے دا نمونہ کلام

ڈاکٹر مہر عبدالحق جاوید نامہ اقبال دا سرائیکی ترجمہ کیتے اونویں تاں ایں کتاب دے 68نظمیں دا ترجمہ کیتا ڳے پر اساں نمونہ کلام دے طور تے ہک نظم شامل اشاعت کیتی اے ، ایں نظم دا عنوان ہے ’’جاوید نال ڳالھ مہاڑ‘‘ (نویں نسل کوں پیغام)اے نظم دا انتخاب ایں واسطے کیتا ڳے جو ایندے وچ نینگریں کیتے سنیہا ہے ، علامہ اقبال دا کلام تاں زمان مکان دا قیدی کینھی ، کائنات دی ہر جاہ تے رہݨ والے انسان واسطے ہے پر سرائیکی وسیب دا نینگر جیرھا نندر توں اُشاک نی پیاتھیندا ، اوندے واسطے ایں نظم وچ ٻہوں پیغام اے۔

سرائیکی وسیب دے نینگریں کوں اُشاک کرݨ کیتے سرائیکی شاعر شاکر شجاع آبادی ، نصراللہ خان ناصرؔ ، رفعت عباس ، عاشق بزدار، خالد اقبال ،عزیز شاہد ، خورشید بخاری ، جہانگیر مخلص ، قیس فریدی ، امان اللہ ارشد ، حسین گوہر ، رشید اُشتر ، شاہد لاشاری تے ٻئے ٻہوں سارے اَݨ ڳݨت شاعر ݙوجھے دھندولے ݙیندے پِن جیویں شاکر شجاع آبادی آکھیے:

قوم دے خاموش بازو آئو ہلارے چا ونڄو

بند ہن جیکر زباناں تاں اشارے چا ونڄو

بھنی دِل دے نوجوانو حوصلے دی ٹیک لیوں

میݙے لولھے بازواں دے کجھ سہارے چا ونڄو

ٹُردی جاہ اقبالؔ ، شاکرؔ کوں امانت سونپ ڳے

اپݨے اپݨے میݙیاں اَکھیں توں جڳارے چا ونڄو

اساں علامہ اقبال دی نظم دا سرائیکی ترجمہ سرائیکی وسیب دے نینگریں دی خذمت وچ ایں اُمید نال پیش کریندوںجو او ایں نظم دے لوظیں اندر لُکے ہوئے پیغام وچوں اپݨی ڳالھ اَتے اپݨی منزل کوں ڳولݨ دی کوشش کرن۔

علامہ اقبال دی نظم وچ نینگریں نال دین دی ڳالھ کیتی ڳئی اے ، دین یا مذہب دا مطلب ہوندے ’’ گذارݨ دا طریقہ‘‘ اساݙے نینگر ڳالھ تے غور کر سڳدن جو کیا اساکوں حیاتی گذارݨ دا ݙا سِکھ ڳیوںیا اَڄاں نی سِکھ سڳے جیکر حیاتی گذارݨ دا ݙا نی سِکھ سڳے تاں ایں نظم دی روشنی وچ کجھ نہ کجھ سِکھݨ دی کوشش کرݨی چہیدی اے۔

حوالہ

کتاب: علامہ اقبال تے سرائیکی وسیب ،مصنف : ظہور دھریجہ، ناشر: جھوک پبلشرز ملتان