جاوید ملک
1932ء تا2021ء
؎چیڑی چوڳ چُڳیندیں آکھئے ہُݨ تاں ٻچے اُڈّٖو!
پیٹ دا دوزخ بھرݨ کیتے کالے روہ تئیں پُڄو!
ایں شعر دے خالق ملک الہٰی بخش المعروف جاوید ملک دا تعلق کوٹ قیصراݨی (تونسہ شریف) نال ہا۔آپ نے عملی زندگی دا آغاز 20 مئی1950ء کنوں سکول ٹیچر دی حیثیت نال کیتاتے 9اگست1992ء کوں ریٹائرڈ منٹ حاصل کیتی۔آپ اپݨے زمانے دی معروف علمی ادبی شخصیت ہن۔اردو سرائیکی شاعر و ادیب ، کالم نگار ، افسانہ نگار تے ڈرامہ نویس ہن۔جتھوں تک آپ دی شاعری دا تعلق ہے تاں آپ اردو سرائیکی ݙوہائیں زباناں وچ خوبصورت شاعری کریندے ہن۔آپ دیاں ݙو عدد سرائیکی غزلاں پیشِ خدمت ہن۔
(1)غزل
[لکھو | ماخذ وچ تبدیلی کرو]اے اندھارا بھڄاوݨاں پوسی
بُٖݙدے سجھ کوں ولاوݨاں پوسی
اپݨی تصویر بھیڄ ݙے میݙو
روندے دل کوں رہاوݨاں پوسی
میݙے ہتھ دیاں لکیراں آہدیاں ہن
تیکوں ہک ݙینہ بھلاوݨاں پوسی
لوکیں ہتھیں دیوچ پتھر چاتن
دل دا شیشہ بچاوݨاں پوسی
جیڑھا آندے او ٹِک کے ٻہہ ویندے
دل دا ٻوہا ولاوݨاں پوسی
راتیں ݙائݨیں تے ݙینہ بلا بݨ ڳئین
شہر والو! الاوݨاں پوسی