جاوید بشیر دی شخصیت
۞»بشیرجاوید دی شاعری سرائیکی وسّوں دا منظرنامہ«۞
بشیرجاوید سرائیکی وسّوں دا معتبر شاعر اے. اُون٘دی شاعری دےݙُو پُکھ ہِن. ہک معاشرتی شاعری ٻیا رثائی شاعری. معاشرتی شاعری وچ اُنہاں دی شاعری سرائیکی خطےدا بیانیہ اے. رثائی ادب وچ انہاں جِتھاں درد دےمضمون ٻدھے ہِن اُتھاں اُنہاں مقصدحُسینؑ کُوں وی اپݨی شاعری دا حصّہ بݨائے. "ون٘دلاوے"بشیرجاوید دا نواں شعری مجـوعہ اے. این٘دےوچ تقریباً یَکیاں صنفاں کُوں وَرتیا ڳئے. ہُݨ صنف وار اُنہاں دی شاعری تےڳالھ کُوں اَڳوں ٹرین٘دے ہیں. پابند نظم اڄوکےدور وچ سرائیکی وچ پہلےدی نسبت گھٹ لِکھی وین٘دی پئی اے. پر ݙِٹھا وَن٘ڄےتاں پابن٘د نظم سرائیکی وچ اپݨا ہِک شاندار مقام رکھین٘دی اے. بشیرجاوید نےپابند نظم کُوں ٻہوں سوہݨےرن٘گ نال نِبھائے. اُنہاں دیاں نظماں "جشنِ آزادی"وِچھوڑا"کیا تھی پَئے"بُکھ"پردیس" اتے"راول"اپݨےان٘در ہِک معنی دا جہان رکھین٘دیاں ہن. انہاں نظماں وچ اڄوکی سرائیکی وسّوں دے ݙُکھ درد کُوں ٻہوں چن٘ڳے انداز نال پدھرا کیتا ڳئے. اُنہاں دی نظم "راول"وچوں کُجھ شعر ݙیکھو:
کوئی ساہ دار سڑکیں سڑیےسارا ݙینھ
شام تَھئی ہےتاں گھر وین٘دا راہ بُھل وین٘دے
رو ݙیوےتاں خلقت رُوین٘دے یَکی
کِھل پووے تاں سینےدی بھاہ بُھل وین٘دے
غزل جدید سرائیکی شاعری دی مقبول ترین صنف اے. جدید شاعر غزل وچ نویں موضوعات گھدی آن٘دن. موجودہ عہد دی غزل مقامیت رنگی اے. اوندے وچوں کتھاؤں وی اردو غزل دا اُولوں کائنی. اڄوکی سرائیکی غزل دا اپݨا اُوچھݨ اے. بےشک غزل عربی قصیدےدے نشیب وچوں نِکھتی اے، اتے فارسی، اردو کنوں تھین٘دی سرائیکی وچ وَڑی اے، پر ٻہوں جلدی سرائیکی شعراء اُردو دا اُوچھݨ چِھک بُھکایا. رفعتؔ عباس دی کتاب" پڑچھیاں اُتےپُھل"وچ ملکی غزل مقامیت یعنی اُوپرَپ(اردو اثرات) تُوں بالکل اݨ سون٘ہی اے.وَل این٘دے بعد دی غزل سرائیکی دے اپݨےماحول وچ لکھی وین٘دی پئی اے. بشیرجاوید دی غزل کُوں اساں جدید غزل تاں نِسےآکھ سَڳدے بلکہ اُنہاں دی غزل کُوں روایتی اتے جدید غزل دا امتزاج ضرور آکھ سڳدےہیں.
روایتی انداز اُنہاں دی غزل وچ کُجھ زیادہ ملدے. پُراݨےموضوعات کُوں اُنہاں ٻہوں سوہݨےانداز وچ نبھائے.
کجھ شعر نمونے دےطور ݙیکھو:
؏ سَر جےسالِم بچاوݨا ہاسی
اُون٘دی ڳلی نہ آوݨا ہاسی
ڄاݨدا ہا کلہپ کاتی اے
وَن٘ڄ نہ ڳاٹا نیواوݨا ہاسی ......
. ؏ سوچ سمجھ کےول فیصلہ میں کراں
آ منان٘ویں تاں ݙس نہ منان٘ویں تاں ݙس
ݙوہڑہ سرائیکی دی قدیم صنف سخن اے. سرائیکی شاعراں دی اکثریت شاعری دا مُنڈھ ݙوہڑے تُوں ٻدھین٘دی اے، لوکیں وچ وی سب توں مقبول صنف ݙوہڑا اے. بشیرجاوید دی شاعری وچ ݙوہڑا موجود اے. اُنہاں دے ݙوہڑےدےموضوعات وی انہاں دی غزل وانگوں روایتی ہِن. اُنہاں دا ݙوہڑا رومانوی رنگ وچ رنگیا ہویا اے. ہِک ݙوہڑا ݙیکھو:
نہ سانول نندر نویکلی کرمیݙا ہَئیں بھائیوال جڳارے دا
میں وی پل دی خواب خوشی ݙیکھاں ݙکھ آپ سن٘بھال جڳارےدا
جاوید جواب اکھیں تےپڑھ نہ کر سوال جڳارےدا
پُسی پپلی دی ہر وال اُتے، ہےہک ہِک سال جڳارے دا
انہاں توں علاوہ انہاں دےکلام وچ قطعےتےآزاد نظم وی شامل اے. اُنہاں دا مجموعہ کلام سرائیکی ادب وچ ٻہوں خوٻصورت اضافہ اے