جاوید احسن

قلمی ناں    جاوید احسنؔ

جٖمنْ        1948ء

جاہ پتہ      3سی غازی کالونی ۔ڈیرہ غازی خاں

جاوید احسنؔ اردو تے سرائیکی دے ممتاز نثر نگار تے استاد شاعر ہن۔ حضرت خواجہ غلام فریدؒ نال بٖہوں عقیدت رکھیندن۔شہر فرید دے حوالے نال آپ اپنْی عقیدت تے محبت دا اظہار کجھ ایں کریندن۔

غزل

خود اپنْی ذات دا راہی زمانے توں جدا لگٖدے

وفا دے کوٹ مٹھنْ وچ خدا جلوہ نما لگٖدے

کتھاں روہی نظردی ہے ، کتھاں ہے دور تھل مارو

مگر تیڈٖے پندھیڑو کوں قدم دا فاصلہ لگٖدے

بظاہر ریت دے ٹبِّٖے،سراں دے چند بٖوٹے ہن

جیکر اکھ بھال کے ڈٖیکھوں تاں صحرا دلربا لگٖدے

خود اپنْا رزق خود گٖولنْ ،سجٖنْ مرداں دی سنّت ہے

نکمّاں بٖہہ کے گھر کھاونْ خدا کوں وی برا لگٖدے

بدن دی کال کوٹھی وچ نہ خود کوں قید کر احسنؔ

وسیع آفاق ہے تیڈٖا جو ہر پاسے کھلا لگٖدے