جاوید آصف، زندہ کہانیاں دا خالق

جاوید آصف زندہ کہانیاں دا خالق ہے". مہان دانشور جاوید اختربھٹی سئیں دی اے گالھ اوں ویلھے اساڈے چیتے امدی اے جڈاں اساں جاوید آصف سئیں دی افسانیاں دی کتاب کوں پڑھدوں. . جاوید آصف سئیں دے افسانیاں دے کردار اساڈے چوپھیر کھنڈئیے ہوئے ان جنہاں کوں سئیں ہوریں کمال مہارت نال افسانیاں دی لڑی اچ پوتے . .اپنڑیے افسانیاں اچ جاوید آصف کمال دی منظر نگاری کریندن ایویں جاپدے جیویں قاری اوں منظر دا حصہ ہووے. . . فیس بک دی ہک پوسٹ اچ "لئی ہار" دے ساریاں افسانیاں تے کجھ لکھنڑ تاں ممکن کائنی پر او کہانڑیا ں ضرور تبصرہ منگدیاں کھڑین جنہاں اچ تریجھی دنیا دے مزدور دا ڈکھ اے، اساڈے وسیب اچ مذہبی دہشت گردی اور وسوں واسیں دی جبری بیدخلی شامل اے. . . "لئی ہار" افسانہ جاوید آصف سئیں دی کتاب لئی ہار دا پہلا افسانہ اے . .لئی ہار زرعی سماج نال بدھیل او مزدور طبقہ اے جیرھا اساڈے وسیب اچ رڑھ کپنڑ دے عوض دانڑے گھندے. بے مہابا سائنسی ترقی مشینیں دی شکل اچ جیویں ات مچائی اے اوندے نال تریجھی دنیا دے مزدور دا وانجھ ای تھئے . .ایں افسانے اچ اساڈے وسیب دے زرعی مزدور لئی ہاریں دا ڈکھ نشابر کیتا گئے. . اے مکالمہ ھ دھی شمو تے اوندے پیو دے درمیان . . جتھاں دھی اھدی اے جو ابا ڈاتریاں ڈندوا آو رڑھیں پکیاں کھڑن لئو کریسوں. . .پر پیو رڑھ کپنڑ آلیاں مشیناں کوں ڈیکھ تے شدید پریشان اے خبراے زمیندار رڑھیں کپواونڑیاں ڈیندن یا کائنا. . "بھئو" ہک بی کہانی اے جیندے اچ دہشت گردی جہیں لعنت کوں نشابر کیتا گئے .. ایں کہانی دے مکالمے متاثر کن ان. .سجاد امامنڑ پئولی دا منتیں بعد دا ہکڑا پتر اے. . جمعہ دا ڈینہہ اے گھر اچ سجاد تے اوندی بھینڑ زینب ان. . ماء انہاں دی پراۓ گھر کم کرنڑ گئی ودی اے سجاد اہدے باہر مسیت جمعہ نماز تے وینداں پر اوندی بھینڑ اہدی اے مسیت نہ ونجنڑ ڈیساں کیوں جو مسیتاں اچ بم پھٹدن. . . "اللہ دا ناں ہئی مسیت نہ ونج" زینب اپنڑے ویر کوں منتاں بیٹھی کریندی اے پر سجاد ضد کر تے لگا ویندے تاں پچھو بھینڑ وی اوندی سلامتی دی دعا واسطے مصلا وتھیر بہندی اے تے نال ای اوندے خیریت نال آنونڑ دی منت ڈو پیکٹ لاچی دانڑیں دی منت منیندی اے . .ماء گہنور مائی جڈاں گھر آ کے سنڑدی اے جو اوندا پتر مسیت گیا ودے تاں شدید پریشان تھیندی اے . . جڈاں سجاد واپس گھر امدے تاں ماء دا اے جملہ اج دے تخریب کار مولیاں دے منہ تے چاٹ اے جیرھے ہک بئے دے فرقیاں آلیاں کوں مارن دا درس ڈیندن. ."ابا اج تاں جیویں کیویں اللہ دا ناں ہئی بئے ڈینہہ ایہو جیہاں کم نہ پیا کریں". "ویزہ" اے کہانڑی دراصل پارٹیشن لٹریچر دا تسلسل اے ہندوستان دی ونڈ تے جنہاں مسائل جنم گھدا او ہک انسانی المیہ ہئی جیکوں اج مہار جمعہ پٹیندا بیٹھا ہئی ڈو بنے شریکاں تے نکڑے لا دے سنگتیاں دے درمیان لیک نے اج مہار جمعہ کوں ڈتو رام دی ارتھی کوں مونڈھا ڈیونڑ توں روکیا ہویا ہئی. . افسانہ "ریڈو" نوحہ ھ ایں وسیب دے تل وطنیاں دا جنہاں دی بھوئیں اوپرے لوک تے جرنیل کھسی کھادی ویندن اے افسانہ نشابر کریندے جو جاوید آصف سئیں دا تل وطنی سیاسی وژن کتنا واضح ھ. .. ایں افسانے دا ہک پیرا ڈیکھسو. . "ملک خمیسہ اے کے جیڈی زیادتی اے تیکوں پتا اے جو اساں اتھاں روہی وچ تڈانہہ دے مقیم ہاوں جڈاں ہاکڑہ واہندا ہا، جڈاں اتھاں فصلاں تھیندیاں ہن ، جڈاں روہی آباد ہوندی ہئی . ہاکڑہ دے سک ونجنڑ تے جڈاں بکھ تریہہ توں بھسیچ تے کئی خاندانیں اتھوں مڈی لڈانڑ کیتی اوں ویلھے وی ساڈے وڈکیں روہی کوں کنڈ نہ کیتی ، بکھ تریہہ ڈکھ ڈنج دا مقابلہ کیتا. .یار اے کے جیڈا دروہ اے منڈھ قدیم توں وسنڑ والئیں دی زمین تے کوئی حق کائنی؟ اپرپنجاب دا کئی فوجی ، کئی جرنیل یا کئی پھر والا بندہ آنے ٹکے ڈے تے روہی دی زمین اپنڑے ناں ایلاٹ کرا تے آ ونجے اتے زمین زادیں کوں بے دخل کر ڈیوے". بلاشبہ لئی ہار جاوید آصف ولوں سرائیکی لٹریچر نال گنڈھۓ ہوۓ دوستاں کیتے سوکھڑی ھے. .دوست ایں کتاب کوں ضرور پڑھن جیویں جو صوفی تاج خان گوپانگ فرماۓ. . "جاوید آصف نے بڑی ہوشیاری سے اپنی کہانی کے اندر میری اور آپ کی کہانی ڈال کر کہانیوں کی پوری کتاب لکھ دی . اب بھائی ہمیں اپنی کہانی تو پڑھنا پڑے گی"