جام نذیر جاذب

اصل ناں       نذیر احمد

قلمی ناں       جام نذیر جاذبؔ

جٖمنْ           1985ء

تعلیم          میٹرک

پیشہ           تجارت

جاہ پتہ         چک دوداڑہ چوٹی زیریں ضلع ڈیرہ غازی خان

جام نذیر جاذبؔ خدا داد صلاحیت دا حامل فطری شاعر ہے، رواں بحراں وچ خوبصورت شاعری کریندے، غزل دے موڈ مزاج کوں سمجھدے ۔ در حقیقت نذیر جاذبؔ رومان پسند شاعر ہے، جیڑھا جو غزل دا اصل موضوع ہے۔جیندے وچ عشق و محبت دا جذبہ پاتا ویندے، محبوب دے عشوے غمزے ، لبٖ و رخسار تے ہجر و وصال دیاں گٖالھیں کیتیاں ویندین۔ایہ سارے موضوعات غزل دے لوازمات اچ شامل ہن۔ تے ایہے موضوعات ای نذیر جاذبؔ دے پسندیدہ موضوعات ہن۔ نمونہ کلام۔

(1)غزل

پیریں پوونْ کنوں ،ہتھ دھواونْ کنوں

تھک پئے ہیں اساں یاری لاونْ کنوں

پیر پکڑین جیندے پیریں داپھی گٖئے

بٖدھ کے ہتھ جی چھڑائے ، جی الاونْ کنوں

تیڈٖے راہ تے ولا ول نہ اَوسوں کڈٖی

موت چنگٖی ہے ہُنْ جی بچاونْ کنوں

ونجٖ توں غیریں دی محفل دا سہرا بنْیں

رہ اساکوں گٖیوں منہ ڈٖکھاونْ کنوں

عشق شوق اے جیکر شوق پورا کریں

ساڈٖی توبہ ، تیڈٖے پیار پاونْ کنوں

حال اے وی تیکوں ہُنْ مبارک ہووے

بٖس ہے جاذبؔ تیڈٖے ہتھ ملاونْ کنوں

(2)غزل

وسردا توں نوھی اصلوں تیڈٖیاں تانگھاں تنگھینداں بٖہہ

سدا اپنْیں خیالیں وچ فقط تیکوں سوچینداں بٖہہ

میڈٖی روح وچ سمایا پئیں ، میڈٖی دل وچ تیڈٖیاں تانگھاں

کتھاں گم تھی گٖیوں سوہنْاں ،تیڈٖے رستے بھلینداں بٖہہ

خزاویں وچ ، بہاریں وچ ،ہوائیں وچ، طوفانیں وچ

اے روح دی ڈٖور نئیں ترٹدی تیکوں دل وچ وسینداں بٖہہ

میڈٖا ساہ ساہ تیڈٖے نانویں ، میڈٖیں خوابیں دا سچ توں ہیں

تیڈٖی تصویر اکھیں وچ سدا جیویں سجینداں بٖہہ

خوشی دی ہر لہر دیوچ میڈٖی اکھ دا نظارا توں

میکوں ہردم ضرورت ہیں تیکوں جاذبؔ گٖولینداں بٖہہ

؎جاذبؔ جڈٖاں ڈٖینہ عید دے پڑھ عید میں واندا تھیاں

ہر کہیں دا سئیں ، ہر کہیں دا جُٹ ، ہا نال ول توں یاد اَئیں

٭٭٭