جارج پاگٹ تھامسن

جارج پاگٹ تھامسن

سر جارج پاگٹ تھامسن (3 مئی 1892 – 10 ستمبر 1975) ہک انگریز طبیعیات دان ہن جنہاں 1937 وچ طبیعیات دا نوبل انعام کلنٹن ڈیویسن نال رل تے الیکٹران دی موجی خصوصیات دی دریافت تے الیکٹران دے ڈائیفریکشن نال حاصل کیتا ۔

تعلیم تے ابتدائی زندگی

تھامسن کیمبرج ، انگلینڈ وچ پیدا تھئے ، انہاں دے والد دا ناں جے جے تھامسن ہئی جیڑھے ہک طبیعیات دان تے نوبل انعام یافتہ ہن ، تے والدہ دا ناں روز الزبتھ پاگٹ ہئی جیڑھی جارج ایڈورڈ پاگٹ دی دھی ہن ۔ تھامسن دی پرس سکول ، کیمبرج وچ تعلیم حاصل کیتی تے بعد وچ ٹرینیٹی کالج ، کیمبرج وچ ریاضی تے طبیعیات پڑھی ، 1914 وچ پہلی عالمی جنگ شروع تھیون توں پہلے انہاں کوں کوئینز رائل ویسٹ سرے رجمنٹ وچ کمیشن ملیا ۔ فرانس وچ کجھ عرصے خدمت کرن دے بعد ، 1915 وچ او رائل فلائنگ کور وچ چلے ڳئے تاں جو فارنبرو تے ٻئے مقامات تے رائل ائیر کرافٹ اسٹیبلشمنٹ وچ ایرو ڈائنامکس تے تحقیق کر سڳن ۔ 1920 وچ انہاں کپتان دے عہدے توں استعفیٰ دے ݙتا ۔

کیریئر

جنگ دے بعد ، تھامسن کیمبرج وچ فیلو بݨے تے ول ایبرڈین یونیورسٹی چلے ڳئے ۔ انہاں کوں 1937 وچ ایبرڈین وچ الیکٹران دی موجی خصوصیات دریافت کرݨ تے طبیعیات دا نوبل انعام ݙتا ڳیا ۔ ایہ انعام امریکی طبیعیات دان کلنٹن ڈیویسن نال ونڈیا ڳیا جیڑھا ایہ دریافت آزادانہ طور تے کر چکے ہن ۔ جݙاں جو تھامسن دے والد جوزف (جنہاں 1906 وچ نوبل انعام جتیا ہئی) الیکٹران کوں ہک ذرہ سمجھدے ہن ، پتر ثابت کیتا جو الیکٹران ہک موج دی طرح ڈائیفریکٹ تھی سڳدے ۔ ایلومینیم ، سونا تے پلاٹینم جیسی معلوم کرسٹل ساخت آلیاں پتلی دھاتی فلماں (3 × 10−6 سینٹی میٹر موٹی) وچوں الیکٹراناں کوں منتشر کر تے ، تھامسن مشاہدہ کیتے ڳئے ڈائیفریکشن پیٹرن دے طول و عرض ڳولے ۔ ہر کیس وچ انہاں دے مشاہدہ کیتے ڳئے ڈائیفریکشن ، ڈی بروگلی دے موجی نظریے ولوں ݙتی ڳئی پیش گوئی دی قدراں دے 5 فیصد دے اندر ہن ۔ ایں دریافت موج-ذره دوہریئت دے اصول دے مزید ثبوت ݙتے جیڑھا پہلی واری 1920 دے ݙہاکے وچ لوئس-وکٹر ڈی بروگلی پیش کیتا ہئی جینکوں اکثر ڈی بروگلی مفروضہ آکھیا ویندے ۔ 1929 تے 1930 دے درمیان ، تھامسن کارنیل یونیورسٹی ، ایتھاکا ، نیویارک وچ غیر رہائشی لیکچرر ہن ۔ 1930 وچ انہاں کوں امپیریل کالج لندن وچ پروفیسر مقرر کیتا ڳیا جیڑھا جو ہیو لانگ بورن کیلنڈر دی کرسی ہئی ۔ 1930 دے آخر وچ تے دوسری عالمی جنگ دے دوران ، انہاں جوہری طبیعیات وچ مہارت حاصل کیتی ، عملی فوجی ایپلی کیشنز تے توجہ مرکوز کیتی ۔ خاص طور تے ، او 1940–1941 وچ اہم MAUD کمیٹی دے چیئرمین ہن جینے ایہ نتیجہ کڈھیا جو ہک ایٹم بمب ممکن ہے ۔ بعد دی زندگی وچ انہاں جوہری توانائی تے کم جاری رکھیا لیکن ایرو ڈائنامکس تے سماج وچ سائنس دی اہمیت تے وی کم کیتا ۔ تھامسن 1952 تک امپیریل کالج وچ ریہے ، جݙاں او کارپس کرسٹی کالج ، کیمبرج دے ماسٹر بݨے ۔ 1964 وچ کالج انہاں دے دور کوں جارج تھامسن بلڈنگ نال نوازیا ، جیڑھا کالج دے لیکمپٹن کیمپس تے جدید فن تعمیر دا ہک نمونہ ہے ۔

ایوارڈز تے اعزازات

طبیعیات دا نوبل انعام جتݨ دے علاوہ ، تھامسن کوں 1943 وچ نائٹ ہڈ ݙتا ڳیا ۔ انہاں 1959–1960 وچ برٹش ایسوسی ایشن دے صدر دی حیثیت نال "سائنس دے ݙو پہلو" دے عنوان نال خطاب کیتا ۔

ذاتی زندگی

1924 وچ تھامسن کیتھلین بوکانن سمتھ نال شادی کیتی ، جیڑھی ویری ریو سر جارج ایڈم سمتھ دی دھی ہن ، جیڑھے یونیورسٹی آف ایبرڈین دے پرنسپل ہن ۔ انہاں دے ݙو پتر تے ݙو دھیاں ہن ۔ کیتھلین 1941 وچ فوت تھی ڳئی ۔ تھامسن 10 ستمبر 1975 کوں 83 سال دی عمر وچ کیمبرج وچ فوت تھئے تے انہاں کوں انہاں دی ذال نال گرانتچسٹر پیرش چرچ یارڈ وچ دفن کیتا ڳیا جیڑھا کیمبرج دے جنوب وچ ہے ۔ انہاں دے ہک پتر ، سر جان تھامسن (1927–2018) ، ہک سینئر سفارت کار بݨے جنہاں ہندوستان وچ ہائی کمشنر (1977–82) تے اقوام متحدہ وچ مستقل نمائندے (1982–87) دے طور تے خدمات انجام ݙتے ۔ انہاں دے پوترے سر ایڈم تھامسن (ڄمݨ 1955) وی ہک سینئر سفارت کار بݨے ، جنہاں پاکستان وچ ہائی کمشنر (2010–2013) تے نیٹو وچ مستقل نمائندے (2014–2016) دے طور تے خدمات انجام ݙتے ۔ ہک دھی ، للیان کلیئر تھامسن جنوبی افریقی ماہر معاشیات تے کوہ پیما جوہانس ڈی ویلیئرز گراف نال شادی کیتی ۔