جارج سمتھ

جارج سمتھ

جارج ایلووڈ سمتھ (ڄمݨ: 10 مئی 1930) ہک امریکی سائنسدان ، اپلائیڈ فزکس دان ، تے چارج کپلڈ ڈیوائس (CCD) دے شریک موجد ہن ۔ انھاں کوں 2009 وچ فزکس دے نوبل انعام وچ ہک چوتھائی حصہ "امیجنگ سیمی کنڈکٹر سرکٹ دی ایجاد کیتے – سی سی ڈی سینسر ، جیڑھا جو فوٹو گرافی دے تقریباً تمام شعبیاں وچ ہک الیکٹرانک اکھ بݨ ڳیا ہے" ݙتا ڳیا ۔

ابتدائی زندگی

سمتھ وائٹ پلینز ، نیو یارک وچ ڄمے ہن ۔ سمتھ امریکی بحریہ وچ خدمات انجام ݙتیاں ، تے بعد وچ 1955 وچ یونیورسٹی آف پنسلوانیا توں اپݨی بی ایس سی دی ڈگری تے 1959 وچ یونیورسٹی آف شکاگو توں صرف اٹھ صفحات دے مقالے نال پی ایچ ڈی دی ڈگری حاصل کیتی ۔

گزر گزران

انھاں 1959 توں 1986 وچ اپݨی ریٹائرمنٹ تئیں نیو جرسی دے مرے ہل وچ بیل لیبز وچ کم کیتا ، جتھاں انھاں نویں لیزرز تے سیمی کنڈکٹر ڈیوائسز تے پرکھ پرچول دی قیادت کیتی ۔ انھاں دے دور ملازمت دے دوران ، سمتھ کوں درجنوں پیٹنٹس نال نوازیا ڳیا تے آخر کار VLSI ڈیوائس ڈیپارٹمنٹ دی سربراہی کیتی ۔

1969 وچ ، سمتھ تے ولارڈ بوائل چارج کپلڈ ڈیوائس (CCD) ایجاد کیتا ، جیندے کیتے انھاں کوں مشترکہ طور تے 1973 وچ فرینکلن انسٹیٹیوٹ دا سٹوارٹ بالنٹائن میڈل ، 1974 دا IEEE مورس این لیب مین میموریل ایوارڈ ، 2006 دا چارلس سٹارک ڈریپر پرائز ، تے 2009 دا نوبل انعام برائے فزکس ݙتا ڳیا ۔

بوائل تے سمتھ ݙوہیں شوقین ملاح ہن جنھاں اکٹھے ٻہوں سارے سفر کیتے ۔ ریٹائرمنٹ دے بعد سمتھ اپݨے لائف پارٹنر ، جینیٹ دے نال ستاراں سال تئیں دنیا بھر وچ سفر کیتا ، آخر کار 2003 وچ اپݨا شوق چھوڑ ݙتا تاں جو "اپݨیاں 'کھڑکیاں ہڈیاں' کوں مزید طوفاناں توں بچایا ونڄ سڳے ۔" او ہݨ اوشن ٹاؤن شپ ، اوشن کاؤنٹی ، نیو جرسی دے واریٹاؤن حصے وچ رہندے ہن ۔

2015 وچ ، سمتھ کوں رائل فوٹوگرافک سوسائٹی دا پروگریس میڈل تے آنریری فیلوشپ ݙتی ڳئی ۔ او Pi Mu Epsilon ، Phi Beta Kappa ، تے Sigma Xi دے رکن ہن تے انسٹیٹیوٹ آف الیکٹریکل اینڈ الیکٹرانکس انجینئرز (IEEE) تے امریکن فزیکل سوسائٹی دے فیلو تے نیشنل اکیڈمی آف انجینئرنگ دے رکن ہن ۔

2017 وچ ، سمتھ کوں انجینئرنگ کیتے کوئین الزبتھ پرائز دے چار فاتحین وچوں ہک قرار ݙتا ڳیا ، ڈیجیٹل امیجنگ سینسرز دی تخلیق وچ انھاں دی ݙات کیتے ۔