ثاقب ساہی

اصل ناں       اللہ ݙتہ

قلمی ناں       ثاقبؔ ساہی

جٖمݨ           1969ء

تعلیم          ایم اے (اردو)

پیشہ            لکچرار

فون نمبر        0300 6733771

جاہ پتہ         گلشنِ باہو مکان نمبر 36بی رحیم یار خان

ثاقبؔ ساہی سرائیکی دا غزل گو شاعر ہے ، اوہ ڈوٖجھیاں صنفاں ݙوہڑے وغیرہ وی لکھدے لیکن غزل کوں اوندے صنفی تناظر اچ خوبصورت معنے مفہوم ݙے کے لکھدے۔مثلََا اوہ اپݨے شرارتی محبوب بارے لکھدے جو۔

؎ٻئی مصروفیت اوندی نظردی نئیں    کرے او کیا سوچینداں جے وفا چھوڑے

آپدا شعری مجموعہ ’’ سُتّی شب جاڳدیاں اکھیں‘‘ وی ہک معنے خیز رومانی عنوان ہے تے ایں مجموعے دی ساری شاعری وی رومانی (غزلیہ) ہے۔ثاقب ساہی ہک پڑھیا لکھیا باشعور شاعر ہے ، جیندا تعلق جندو پیر کمال دے ادبی قافلے ’’دلچسپ سرائیکی سنگت نال ہے‘‘آپ نجیب اللہ نازشؔ دے شاگرد ہن۔نمونہ کلام۔

(1)غزل

لکھاں اوچھڑ ،ہزاراں جھر اساݙا پندھ پرے دا ہے

اساں پُجٖݨے سرِ محشر اساݙا پندھ پرے دا ہے

اساݙے نال اے زندگی کریسیں توں سفر کے تئیں

تیݙا تاں ایہ کھڑا ہے گھر اساݙا پندھ پرے دا ہے

جے آکھوں ساݙا سنگتی تھی سفر نزدیک دا کرݨے

ایہ کوڑی ڳالھ ہے دلبر، اساݙا پندھ پرے دا ہے

تھکیڑیں دا ، نکھیڑیں دا ، عذابیں دا سرابیں دا

نواں ہر موڑ تے منظر، اساݙا پندھ پرے دا ہے

اساں تاں غرق تھی ٹھلݨے ، اساݙی راہ گزر ثاقبؔ

نہ ایٻی مݨ ، نہ اوٻی بھر ، اساݙا پندھ پرے دا ہے

(2)غزل

میں خود کوں تئیں سوا سمجھݨ توں  قاصر ہاں

حقیقت ہُݨ ایہا سمجھݨ توں قاصر ہاں

میں موسٰی نئیں مگر ویلے دے فرعونا!

تیکوں اپݨاں خدا سمجھݨ توں قاصر ہاں

میں دانشور وی تھیوݨ کوں تاں تھی سڳداں

مگر زندگی ہے کیا سمجھݨ توں قاصر ہاں

میکوں روزی دے مسئلے کر ݙتے ویڑا

کوئی شکوہ گلا سمجھݨ توں قاصر ہاں

کݙاں دا او جدا ہے میں اجٖاں ثاقبؔ

اوکوں ہک پل جدا سمجھݨ توں قاصر ہاں

؎کیوں نہ تھوریت رہساں تیݙے میں قرب دا سئیں

میݙی جو زندگی دے کجھ ݙینہ ہنڈھا تے ڳئے پیا

٭٭٭