تیکوں ما ء مریندی تاں ہوسے

میں  کنوں  سارے پچُھدے ہن تیکوں  ماء مریندی تاں  ہوسے، میں  آکھدا ہم ماء میکوں  کڈاہیں نی ماریا ،پیو آتھرچھنڈ کریندا رہندے ، ماء کݙاہیں  نی ماریا ، ݙاݙی وی ݙوچار واری ہتھوں  چھوڑ کھلے مارین پر لڳے کائنی، لوک اعتبار نہ کریندے ہن ، آکھدے ہن جو مترائی ماء ہووے تے مارے نہ، اے نی تھی سڳدا پر سچ اے ہے جو اماں  میکوں  کݙاہیں  نہ ماریا۔ ماء مترائی تے پیو قصائی آلی اکھاݨ وی میݙے اُتے نی آئی ، ابا مریندا ہا پر پیار وی ݙاݙھا کریندا ہا ۔ دڑکا دباشہ وی ہا پر میں  اپݨے کم ذمے واری نال کریندا ہم ،پڑھدا ہم ، دکان چلیندا ہم تے مال وی ویندا ہم، ابا خوش ہا۔ بھرے مجمعے ء ِچ آکھدا ہا کوئی دھریجہ میݙے ظہور جیہا ڄݨ ݙکھاوے تاں  مناں ۔

حوالہ

کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان