تہور
دھریجہ نگر ءِچ تہور دیاں شادیاں تھیندیاں ہن ، ساوے سوکھے بندے جنج آلی شادی کریندے ہن ، تہور دی شادی پرنے آنگے دھوم دھام نال تھیندی ہئی ، نائی سُنتاں ٻلہیندا ہا ، میݙی تہور تے ابے سئیں لیلا کھونہہ تے ݙو دیڳاں چاولیں دیاں پکایاں ہن ، شئیت عمراں پنج چھ سال ہوسے ، تہور دی ڳالھ یاد کر تے ہر ویلے ݙریا ودا رہندا ہم ، ابا سئیں شہروں لال پوتڑی تے رومال گھن آئے ہن ۔ تہور ٻلہاوݨ سانگے مامیں بشیر میکوں تھاٻیں تے چاتا ، میݙیاں چیکاٹاں ہن ، مٹی دی بݨی تھالی موندھی کر تے نائی تلے رکھی ، میکوں اوں تے ٻلہا تے نائی آکھیا اَتے ساوی چیڑی ݙیکھ ، مامیں میݙا منہہ اُتے کیتا تے اُسترا چلا ݙتا ۔ لہو وہہ پیا ، کیری سٹیونے ،مامیں لت مار تے پاتری بھن چھوڑی۔ کجھ ݙینھ تئیں خیر آ ڳی ہمیش دا سی لتھا تے نت دے ڈر بھئو توں جان چھُٹ پی ۔
حوالہ
[لکھو | ماخذ وچ تبدیلی کرو]کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان