تھیوڈور ولیم رچرڈز
تھیوڈور ولیم رچرڈز
[لکھو | ماخذ وچ تبدیلی کرو]تھیوڈور ولیم رچرڈز (31 جنوری ، 1868 – 2 اپریل ، 1928) ہک امریکی فزیکل کیمیا دان ہا تے پہلا امریکی سائنسدان ہا جئیں کیمسٹری دا نوبل انعام حاصل کیتا ، اینکوں ایہ انعام "کیمیائی عناصر دی وݙی تعداد دے ایٹمی وزن دے عین تعین دی آدر وچ" ݙتا ڳیا ہا ۔
جیوݨ جوڳ
[لکھو | ماخذ وچ تبدیلی کرو]تھیوڈور رچرڈز جرمن ٹاؤن ، پنسلوانیا وچ ولیم ٹراسٹ رچرڈز ، جیڑھا جو ہک لینڈ تے سی سکیپ پینٹر ہا ، تے اینا میٹلاک رچرڈز ، جیڑھی جو ہک شاعرہ ہئی ، دے گھر پیدا تھیا ہا ۔ رچرڈز اپݨی زیادہ تر پری کالج تعلیم اپݨی ماء کولوں حاصل کیتی ۔ نیوپورٹ ، رہوڈ آئی لینڈ وچ ہک موسم گرما دے قیام دے دوران ، رچرڈز دی ملاقات ہارورڈ دے پروفیسر جوشیا پارسنز کک نال تھئی ، جئیں چھوٹے ٹیلی سکوپ دے ذریعے نوجوان ٻال کوں زحل دے حلقے ݙیکھائے ۔ سالاں بعد کک تے رچرڈز کک دی لیبارٹری وچ کٹھے کم کیتا ۔
رچرڈز خاندان ݙو سال یورپ وچ گزارے ، زیادہ تر انگلینڈ وچ ، جتھاں تھیوڈور رچرڈز دی سائنسی دلچسپی ودھ مضبوط تھئی ۔ خاندان دے ریاستہائے متحدہ واپس آوݨ دے بعد ، او 1883 وچ 14 سال دی عمر وچ ہیورفورڈ کالج ، پنسلوانیا وچ داخل تھیا ، تے 1885 وچ بیچلر آف سائنس دی ڈگری حاصل کیتی ۔ ول انہاں ہارورڈ یونیورسٹی وچ داخلہ گھدا تے گریجویٹ تعلیم دی مزید تیاری دے طور تے 1886 وچ بیچلر آف آرٹس دی ڈگری حاصل کیتی ۔
رچرڈز ہارورڈ وچ ریہا ، تے ہائیڈروجن دے مقابلے وچ آکسیجن دے ایٹمی وزن دا تعین کرݨ کوں اپݨے مقالہ دا موضوع بݨایا ۔ ایندا ڈاکٹریٹ دا مشیر جوشیا پارسنز کک ہا ۔ اڳوں انہاں جرمنی وچ پوسٹ ڈاکٹریٹ دا ہک سال دا کم کیتا ، جتھاں انہاں گوٹنگن یونیورسٹی وچ وکٹر میئر تے بیگراں دے ماتحت تعلیم حاصل کیتی ۔ رچرڈز کیمسٹری وچ اسسٹنٹ ، ول انسٹرکٹر ، اسسٹنٹ پروفیسر تے آخر کار 1901 وچ مکمل پروفیسر دے طور تے ہارورڈ واپس آیا ۔ او پہلے امریکی سائنسداناں وچوں ہک ہا جنہاں کوں کݙاہیں وی یورپ دی ہک وݙی یونیورسٹی وچ مکمل پروفیسر شپ دی پیشکش تھئی ، گوٹنگن توں ، 1901 وچ ، پر پوزیشن گھنݨ دی بجائے ، انہاں امریکہ وچ جاری رہݨ دا انتخاب کیتا ۔ 1903 وچ او ہارورڈ وچ کیمسٹری ڈیپارٹمنٹ دا چیئرمین بݨ ڳیا ، تے 1912 وچ انہاں کوں ارونگ پروفیسر آف کیمسٹری تے نویں وولکوٹ گبز میموریل لیبارٹری دا ڈائریکٹر مقرر کیتا ڳیا ۔
1896 وچ ، رچرڈز مریم سٹیورٹ تھائر نال شادی کیتی ۔ جوڑے دی ہک دھی ، گریس تھائر (جنے جیمز برائنٹ کوننٹ نال شادی کیتی) ، تے ݙو پتر ، گرینو تھائر تے ولیم تھیوڈور ہن ۔ ݙوہیں پتراں خودکشی کر گھدی ہئی ۔
رچرڈز فن تے موسیقی ݙوہاں وچ دلچسپی برقرار رکھی ۔ ایندیاں ووہانداں وچ خاکے بݨاوݨ ، گولف ، تے سیلنگ شامل ہن ۔ او 2 اپریل ، 1928 کوں کیمبرج ، میساچوسٹس وچ 60 سال دی عمر وچ فوت تھی ڳیا ۔ ایندی ہک اولاد دے مطابق ، رچرڈز "دائمی تنفسی مسائل تے ہک لمبے عرصے تئیں ڈپریشن دا شکار ہا ۔ "
سائنسی پرکھ پرچول
[لکھو | ماخذ وچ تبدیلی کرو]رچرڈز دی سائنسی تحقیق دا تقریبا ادھ حصہ ایٹمی وزن نال تعلق رکھدا ہا ، جیڑھا جو 1886 وچ ایندی گریجویٹ تعلیم نال شروع تھیا ہا ۔ 1889 وچ ہارورڈ واپس آوݨ تے ، ایہ ایندی تحقیق دی پہلی صف ہئی ، جیڑھی جو ایندی موت تئیں جاری رہی ۔ فوربس دے مطابق ، 1932 تئیں 55 عناصر دے ایٹمی وزن دا مطالعہ رچرڈز تے ایندے شاگرداں کیتا ہا ۔ رچرڈز اینجھے تعیناتیاں وچ غلطی دے ممکنہ ذرائع وچوں ہک ایہ دریافت کیتا جو کجھ نمکیات وچ ورتن تے گیساں یا غیر ملکی محلول کوں روکݨ دا رجحان ہوندے ۔ رچرڈز اپݨے کم وچ جیڑھی احتیاط ورتی ایندی ہک مثال دے طور تے ، ایمسلی رپورٹ کریندے جو انہاں ایٹمی وزن دی پیمائش واسطے خالص عنصر تھولیم حاصل کرݨ واسطے تھولیم برومیٹ دے 15,000 کرسٹلائزیشن کیتے ۔
رچرڈز پہلا شخص ہا جئیں کیمیائی تجزیہ نال ݙیکھایا جو ہک عنصر دے مختلف ایٹمی وزن تھی سڳدن ۔ انہاں کوں قدرتی طور تے تھیوݨ والے سیسے تے ریڈیو ایکٹیو ڈیکے نال پیدا تھیوݨ والے سیسے دے نمونیاں دا تجزیہ کرݨ واسطے آکھیا ڳیا ہا ۔ ایندی پیمائش ݙیکھایا جو ݙوہیں نمونیاں دے ایٹمی وزن مختلف ہن ، جیڑھا جو آئسوٹوپس دے تصور دی حمایت کریندا ہا ۔
حالانکہ رچرڈز دے ایٹمی وزن دے کیمیائی تعین اوں وقت واسطے ٻہوں اہم ہن ، پر انہاں کوں وݙے پیمانے تے تبدیل کر ݙتا ڳیا ہے ۔ جدید سائنسدان الیکٹرانک آلات ، جیویں جو ماس سپیکٹومیٹر ، استعمال کریندن تاں جو ہک عنصر دے آئسوٹوپس دے ماس تے کثرت ݙوہیں دا تعین کیتا ون٘ج سڳے ۔ ایں معلومات توں ، اوسط ایٹمی ماس دا حساب لایا ون٘ج سڳدا ہے ، تے رچرڈز جیڑھے اقدار ماپے انہاں نال موازنہ کیتا ون٘ج سڳدا ہے ۔ جدید طریقے تیز تر تے زیادہ حساس ہن انہاں طریقیاں نال جنہاں تے رچرڈز کوں انحصار کرݨا پوندا ہا ، پر ضروری نئیں جو گھٹ مہنگے ہوون ۔
تھیوڈور رچرڈز دے ٻئے سائنسی کم وچ ایٹم دی کمپریسیبلٹیز ، محلول تے نیوٹرلائزیشن دی حرارت ، تے امالگام دی الیکٹرو کیمسٹری دی تحقیقات شامل ہن ۔ گھٹ درجہ حرارت تے الیکٹرو کیمیکل پوٹینشل دی ایندی تحقیق انہاں کماں وچوں ہک ہئی جیڑھی جو بیگراں دے ہتھ وچ ، ننسٹ ہیٹ تھیورم تے تھرڈ لا آف تھرموڈینامکس دی طرف ڳئی ، حالانکہ ننسٹ تے رچرڈز دے درمیان گرم بحث توں بغیر نئیں ۔
رچرڈز کوں ایڈیبیٹک کیلوری میٹر تے نیفیلومیٹر دی ایجاد دا وی سہرا ݙتا ویندا ہے ، جیڑھا جو سٹرونٹیئم دے ایٹمی وزن تے ایندے کم واسطے تیار کیتا ڳیا ہا ۔
آدر تے میراث
[لکھو | ماخذ وچ تبدیلی کرو]· امریکن فلاسوفیکل سوسائٹی دا رکن (1902)
· لوویل لیکچرز (1908)
· ڈیوی میڈل (1910)
· فیراڈے لیکچر شپ (1911)
· ولارڈ گبز میڈل (1912)
· امریکن کیمیکل سوسائٹی دا صدر (1914)
· کیمسٹری وچ نوبل انعام (1914)
· فرینکلن میڈل (1916)
· امریکن ایسوسی ایشن فار دی ایڈوانسمنٹ آف سائنس دا صدر (1917)
· رائل آئرش اکیڈمی دا اعزازی رکن (1918)
· رائل سوسائٹی آف لندن دا غیر ملکی رکن (1919)
· امریکن اکیڈمی آف آرٹس اینڈ سائنسز دا صدر (1919 – 1921)
· لاوائزیئر میڈل (1922)
· لی بلانک میڈل (1922)
· رائل سوسائٹی آف ایڈنبرگ دا اعزازی فیلو (1923)
· بین الاقوامی ایٹمی وزن کمیٹی دا رکن
· تھیوڈور رچرڈز میڈل (1932 ، مرݨ مگروں ݙتا ڳیا) تھیوڈور ولیم رچرڈز میڈل ہر ݙو سال بعد نارتھ ایسٹرن سیکشن آف دی امریکن کیمیکل سوسائٹی دی طرفوں ہک بہترین کیمیا دان کوں ݙتا ویندے ۔ ایہ ایوارڈ 1928 وچ قائم کیتا ڳیا ہا ۔ امریکی مجسمہ ساز تے دوست سائرس ڈالن ایہ تمغہ ڈیزائن کیتا ہا تے ایندا اصل پلاسٹر سائرس ڈالن آرٹ میوزیم ، آرلنگٹن ، میساچوسٹس وچ ݙٹھا ون٘ج سڳدا ہے ۔