تھل ٻدھݨ

تھل ٻدھݨ (تمہید)

کہیں وی بندے کوں کوئی ڳالھ سُݨاوݨی ہووے تاں اوندی توجہ حاصل کرݨ ضروری ہے ۔ بغیر کہیں ٹیکنیک دے ڈھیر سارے بندیاں دی توجہ حاصل کرݨ ٻہوں اوکھا کم ہے ۔ ایہ مطلوبہ توجہ حاصل کرݨ سانگے قصہ گو ون پوّنے جملے ٻولیندے جنہاں نال او ناصرف لوکیں کوں اپݨے پاسے متوجہ کر گھندے بلکہ اُنہاں کوں کݙاہیں چساں چویندے تے کݙاہیں سحر زدہ کر ݙیندے ۔ ایں عمل کوں ’’تھل ٻدھݨ ‘‘اَکھیندن۔ قصہ گو کݙاہیں مزاقیہ انداز وچ عجیب و غریب اوپرے اَتے غیر فطری جملے ٻولیندے تے کݙاہیں سنجیدہ اَتے لوکیں کوں اپݨی طرف متوجہ کریندے ۔

ایہ جملے نثری شاعری دا شہکار ہوندن ۔ ہک ونکی ݙیکھو

’’حکم ہوندا اے خدا دا ‘ خدا دے رسول دا ‘ کرݨا پروردگار دا سُتیاں دی خیر جاڳدیاں دا بھلا ‘ راہ مسافراں دا ٻیلی خود آپ اللہ ‘ مارکہ…! واہ واہ اے اللہ بادشاہ ہے عاشقاں دی ٻیڑی کبوتر ملاح ہے ۔ کویلی سُتی پئی اے اُٹھ سرہاݨے ݙتی پئی اے اجھو آہدی اے جھکی پئی اے ۔ کولوں لنگھے ہاتھی آہدی اے کون اے مویا کِر کِر کریندا ۔ لوٹارِڑھ پیا کہاݨی دا منڈھ چھڑ پیا … مارکہ !کہاݨی سُݨدے پئے او سارے آکھیندن ’’جی‘‘ جیوو جی نال روٹی کھائو کھنڈ کھیر نال ‘ دشمن مرنی ڈھڈھ دی پیڑ نال ‘ سڄݨ نال تے دشمن تلیاں ہیٹھ ہوون۔ مارکہ … ہک ہا بادشاہ ‘ بادشاہ خود آپ اللہ ہے ۔ او ہک ٹوٹے زمین دا بادشاہ ہا۔ …(اَڳوں قصہ شروع تھی ویندے) ۔ ‘ ‘ (38)

ہک ٻئی ونکی ݙیکھو جیندے وچ سنجیدہ تے سبق آموز فقرے ہِن جیڑھے بندے کوں سحر زدہ کر ݙیندن:

’’حکم ہوندا اے ‘ خدا دے رسول دا ‘ کرݨا پروردگار دا ‘ سُتیاں دی خیر جاڳدیاں دا بھلا‘ راہ مسافراں دا ٻیلی خود آپ اللہ … عرض کیتم … ٻیڑی دی دُھپ بُری ‘ آنہے دی مُک بُری ‘ شادی دی بُکھ بُری تے غریب دی چُپ بُری … کَہی دی کار بُری ‘ جوئے دی ہار بُری ‘ یاراں دی مار بُری تے عورت دی خار بُری ۔ پُھل ترڑ پیا کہاݨی دا منڈھ چھڑ پیا … مارکہ …! رات دے چار پہر گذارݨ کیتے کہاݨی پیا چھڑینداں ۔ کہاݨی دا مذکور اے اللہ ڄاݨے سچ اے یا کوڑ اے سُݨی میں ضرور اے … مارکہ ! ہک ہا بادشاہ ‘ بادشاہ خود آپ اللہ ہے ‘ او ہک ٹوٹے زمین دا بادشاہ ہا ……(اڳوں قصہ شروع تھی ویندے)

حوالہ

سرائیکی لوک قصیاں دے کردار، مصنف : شہزاد اسد خان لغاری ، ناشر: جھوک پرنٹرز ‘ ملتان