تھامس سیچ

تھامس سیچ

تھامس رابرٹ سیچ (ڄم 8 دسمبر 1947) ہک امریکی کیمیا دان ہن جنہاں آر این اے دی کٹالیٹک خصوصیات دی دریافت کیتے سڈنی آلٹمین دے نال 1989 دا نوبل انعام مشترکہ طور تے جتیا ۔ سیچ دریافت کیتا کہ آر این اے خود آر این اے دے تار کوں کٹ سڳدا ہے ، جیڑھا کہ ݙیکھیندا ہے کہ زندگی آر این اے دے طور تے شروع تھئی ہوسی ۔ انہاں پاتا کہ آر این اے نہ صرف ہدایات بھیڄ سڳدا ہے ، بھل جو ایہ ضروری رد عمل کوں وی تیز کر سڳدا ہے ۔

انہاں ٹیلومیرز دا وی مطالعہ کیتا ، تے انہاں دی لیب ہک اینزائم ، ٹی ای آر ٹی (ٹیلومیریز ریورس ٹرانسکرپٹیز) دریافت کیتا ، جیڑھا کہ سیل تقسیم دے دوران چھوٹے تھیوݨ دے بعد ٹیلومیرز کوں بحال کرݨ دے عمل دا حصہ ہے ۔

ہاورڈ ہیوز میڈیکل انسٹی ٹیوٹ دے صدر دے طور تے ، انہاں سائنس دی تعلیم کوں ودھایا ، تے او کولوراڈو یونیورسٹی وچ انڈر گریجویٹ کیمسٹری دا کورس پڑھیندن ۔

ابتدائی زندگی تے کیریئر

سیچ چیک نسل دے والدین (انہاں دے ݙاݙا چیک ہن ، انہاں دے ٻئے ݙاݙا ݙاݙی پہلی نسل دے امریکی ہن) دے گھر شکاگو وچ ڄمے ہن ۔ او آئیووا سٹی ، آئیووا وچ وݙے تھئے ۔ جونیئر ہائی سکول وچ ، انہاں آئیووا یونیورسٹی دے جیولوجی پروفیسرز دے دروازے تے دستک ݙتی ، تے انہاں توں کرسٹل ڈھانچیاں ، شہابیاں تے فوسلز تے ڳالھ مہاڑ کرݨ کیتے آکھیا ۔

ہک نیشنل میرٹ سکالر ، سیچ 1966 وچ گرینیل کالج وچ داخل تھئے ۔ اتھائیں انہاں ہومر دی اوڈیسی ، ڈانٹے دا انفرنو ، آئینی تاریخ تے کیمسٹری دا مطالعہ کیتا ۔ انہاں اپݨے آرگینک کیمسٹری لیب پارٹنر ، کیرول لین مارٹنسن نال شادی کیتی ، تے 1970 وچ بی اے دی ڈگری نال گریجویشن کیتی ۔

1975 وچ ، سیچ یونیورسٹی آف کیلیفورنیا ، برکلے وچ کیمسٹری وچ اپݨی پی ایچ ڈی مکمل کیتی تے اوں سال ، او میساچوسٹس انسٹی ٹیوٹ آف ٹیکنالوجی وچ داخل تھئے جتھائیں انہاں پوسٹ ڈاکٹریٹ تحقیق وچ حصہ گھدا ۔ 1978 وچ ، انہاں کولوراڈو یونیورسٹی وچ اپݨی پہلی فیکلٹی پوزیشن حاصل کیتی جتھائیں انہاں انڈر گریجویٹ طلباء کوں کیمسٹری تے بائیو کیمسٹری وچ لیکچر ݙتے ، تے جتھائیں او اڄ وی فیکلٹی وچ ہن ، اڄ کل بائیو کیمسٹری ڈیپارٹمنٹ وچ ممتاز پروفیسر دے طور تے ہن ۔ 2000 وچ ، سیچ پورنیل چوپین دی جاہ میری لینڈ وچ ہاورڈ ہیوز میڈیکل انسٹی ٹیوٹ دے صدر دے طور تے سنبھالی ۔ انہاں بولڈر دی یونیورسٹی آف کولوراڈو وچ اپݨی بائیو کیمسٹری لیبارٹری دی سربراہی وی جاری رکھی ۔ 1 اپریل 2008 کوں ، سیچ اعلان کیتا کہ او 2009 دی بہار وچ ، پڑھاوݨ تے تحقیق تے واپس ونجݨ کیتے ، ایچ ایچ ایم آئی دے صدر دے عہدے توں دستبردار تھی ویسن ۔ بولڈر واپس آوݨ تے ، سیچ بائیو فرنٹیئرز انسٹی ٹیوٹ دے پہلے ایگزیکٹیو ڈائریکٹر بݨ ڳئے ، جیڑھا کہ انہاں 2020 تئیں عہدہ سنبھالیا ۔ انہاں فریش مین کوں جنرل کیمسٹری وی پڑھائی ۔

سیچ دی کتاب "دی کیٹالسٹ آر این اے اینڈ دی کویسٹ ٹو انلاک لائفز ڈیپیسٹ سیکرٹس" جون 2024 وچ شائع تھئی ۔

پرکھ پرچول

سیچ دا بنیادی تحقیقی شعبہ سیل دے نیوکلیئس وچ ٹرانسکرپشن دے عمل دا ہے ۔ او مطالعہ کریندن کہ ڈی این اے دا جینیٹک کوڈ آر این اے وچ کیویں ٹرانسکرائب تھیندے ۔ 1970 دے ݙہاکے وچ ، سیچ یونی سیلولر جاندار ٹیٹراہیمینا تھرموفیلا وچ آر این اے دی سپلائسنگ دا مطالعہ کریندے پئے ہن جݙݨ انہاں دریافت کیتا کہ ہک غیر پروسیس شدہ آر این اے مالیکیول خود کوں سپلائس کر سڳدا ہے ۔ 1982 وچ ، سیچ پہلے شخص بݨ ڳئے جنہاں ݙیکھایا کہ آر این اے مالیکیول جینیٹک معلومات دے غیر فعال کیریئر بݨݨ تئیں محدود نی - انہاں وچ کٹالیٹک افعال وی تھی سڳدے ہن تے او سیلولر رد عمل وچ حصہ گھن سڳدے ہن ۔ خاص طور تے آر این اے پروسیسنگ رد عمل تے رائبوزومز تے پروٹین دی سرت سلھاڑ آر این اے ولوں کٹالائز تھیندی ہے ۔ آر این اے اینزائمز کوں رائبوزائمز دے طور تے ڄاتا ویندا ہے تے انہاں جین ٹیکنالوجی کیتے ہک نواں ٹول فراہم کیتا ہے ۔ انہاں وچ نویں علاج معالجے دے ایجنٹس فراہم کرݨ دی صلاحیت وی ہے - مثال تے طور تے ، انہاں وچ حملہ آور ، وائرل آر این اے کوں تباہ کرݨ تے کٹݨ دی صلاحیت ہے ۔

سیچ دا ݙوجھا تحقیقی شعبہ ٹیلومیرز تے ہے ، جیڑھا کہ کروموزوم دے سریاں دی حفاظت کرݨ والا ڈھانچہ ہے ۔ ٹیلومیرز ڈی این اے دی ہر نقل دے نال چھوٹے تھی ویندن ، تے انہاں کوں ول توں وݙا کرݨ ضروری ہے ۔ او ٹیلومیریز دا مطالعہ کریندن ، جیڑھا کہ اینزائم ہے جیڑھا کہ ٹیلومیرک سیکوینس دی نقل کریندا ہے تے انہاں کوں وݙا کریندا ہے ۔ ٹیلومیریز دے فعال سائٹ پروٹین سب یونٹس ریورس ٹرانسکرپٹیز دی ہک نویں کلاس تے مشتمل ہن ، اینزائم جیڑھے کہ پہلے وائرس تے ٹرانسپوزیبل عناصر تئیں محدود سمجھے ویندے ہن ۔ ٹیلومیریز 90 فیصد انسانی کینسر وچ فعال تھیندا ہے ۔ لہذا ، ہک دوا جیڑھی ایندی سرگرمی کوں روک ݙیوے کینسر دے علاج وچ مفید تھی سڳدی ہے ۔

ایوارڈ تے آدر

سیچ دے کم کوں ٻہوں سارے ایوارڈز تے انعامات نال سراہا ڳیا ہے جنہاں وچ شامل ہن امریکن کینسر سوسائٹی ولوں لائف ٹائم پروفیسرشپ (1987) ، کولمبیا یونیورسٹی توں لوئیسا گراس ہوروٹز انعام (1988) ، رائل نیدرلینڈز اکیڈمی آف سائنسز دا ہینکن انعام (1988) ، البرٹ لاسکر بیسک میڈیکل ریسرچ ایوارڈ (1988) ، کیمسٹری وچ نوبل انعام (1989 ، سڈنی آلٹمین دے نال مشترکہ) ، 1990 وچ امریکن اکیڈمی آف اچیومنٹ دا گولڈن پلیٹ ایوارڈ تے نیشنل میڈل آف سائنس (1995) ۔ 1987 وچ ، سیچ کوں یونائیٹڈ سٹیٹس نیشنل اکیڈمی آف سائنسز وچ منتخب کیتا ڳیا تے 1988 وچ انہاں کوں امریکن اکیڈمی آف آرٹس اینڈ سائنسز وچ منتخب کیتا ڳیا ۔ سیچ کوں 2001 وچ امریکن فلاسوفیکل سوسائٹی وچ منتخب کیتا ڳیا ۔ 2003 وچ ، سیچ یونیورسٹی آف کولوراڈو دا جارج گامو میموریل لیکچر ݙتا ۔ 2007 وچ ، انہاں کیمسٹری تے سائنس وچ پیش رفت کیتے شاندار شراکت کیتے اوتھمر گولڈ میڈل حاصل کیتا ۔