تھامس سٹیئٹز
تھامس سٹیئٹز
[لکھو | ماخذ وچ تبدیلی کرو]تھامس آرتھر سٹیئٹز (23 اگست ، 1940 – 9 اکتوبر ، 2018) ہک امریکی بایو کیمیاء دان ہا ، ییل یونیورسٹی اچ مالیکیولر بایو فزکس تے بایو کیمسٹری دا سٹرلنگ پروفیسر ہا ، تے ہاورڈ ہیوز میڈیکل انسٹی ٹیوٹ اچ ہک محقق ہا ، جیڑھا رائبوزوم تے اپݨے شاندار کم کیتے سب توں زیادہ ڄاݨیا ویندا ہا ۔
سٹیئٹز کوں 2009 دا نوبل انعام کیمسٹری اچ وینکٹ رامن راما کرشنن تے ادا یوناتھ دے نال "رائبوزوم دی بݨتر تے فعل دے مطالعے کیتے" ݙتا ڳیا ۔ سٹیئٹز 2007 اچ گائرڈنر انٹرنیشنل ایوارڈ وی جتیا ہا "رائبوزوم دی بݨتر تے فعل تے انہاں دے مطالعیاں کیتے جنہاں ݙیکھایا کہ پیپٹیڈائل ٹرانسفریز (EC 2.3.2.12) ہک آر این اے کٹیلائزڈ ری ایکشن ہا ، تے ایندے فنکشن دی اینٹی بایوٹکس ولوں ݙک ٹھلھ دا طریقہ کار ظاہر کرݨ کیتے" ۔
تعلیم تے کیریئر
[لکھو | ماخذ وچ تبدیلی کرو]ملواکی ، وسکونسن اچ پیدا تھیوݨ والے سٹیئٹز لارنس یونیورسٹی ، ایپلٹن ، وسکونسن اچ کیمسٹری دی تعلیم حاصل کیتی ، تے 1962 اچ گریجویشن کیتی ۔ جون 2010 اچ ، یونیورسٹی اپݨی کیمسٹری دی عمارت دا ناں تھامس اے سٹیئٹز ہال آف سائنس رکھیا ۔
انہاں 1966 اچ ہارورڈ یونیورسٹی توں بایو کیمسٹری تے مالیکیولر بائیولوجی اچ پی ایچ ڈی حاصل کیتی جتھاں انہاں بعد اچ 1976 دے کیمسٹری نوبل انعام جیتنے والے ولیم این لیپس کامب جونیئر دی ہدایت اچ کم کیتا ۔ ہارورڈ اچ ہوندے ہوئے ، چھوٹے مالیکیول میتھائل ایتھیلین فاسفیٹ دی بݨتر دا تعین کرݨ دے تربیتی کم دے بعد ، سٹیئٹز کاربوکسی پیپٹیڈیز اے (EC 3.4.17.1) تے ایسپارٹیٹ کارباموئیل ٹرانسفریز (EC 2.1.3.2) دی ایٹمی بݨتر دا تعین کرݨ اچ شراکت کیتی ، جیڑھی ہر ہک اپݨے وقت اچ سب توں وݙی ایٹمی بݨتر ہائی ۔
سٹیئٹز 1967–1970 دے دوران ایم آر سی لیبارٹری آف مالیکیولر بائیولوجی اچ جین کوفن چائلڈز پوسٹ ڈاکٹریٹ فیلو دے طور تے پوسٹ ڈاکٹریٹ تحقیق کیتی ۔
سٹیئٹز مختصر طور تے یونیورسٹی آف کیلیفورنیا ، برکلے اچ اسسٹنٹ پروفیسرشپ حاصل کیتی ، پر انہاں ایں بنیاد تے استعفیٰ ݙے ݙتا کہ ادارہ انہاں دی ذال جون کوں فیکلٹی پوزیشن اچ قبول نی کریندا کیوں جو او ہک زنانی ہائی ۔
ٹام تے جون سٹیئٹز ݙونہاں 1970 اچ ییل فیکلٹی اچ شامل تھئے ، جتھاں انہاں سیلولر تے ساختی حیاتیات تے کم جاری رکھیا ۔ سٹیئٹز تے پیٹر مور ایکس رے کرسٹالوگرافی دا استعمال کریندے ہوئے وݙے 50S رائبوسومل سب یونٹ دی ایٹمی بݨتر دا تعین کیتا ، تے 2000 اچ سائنس اچ اپݨے نتائج شائع کیتے ۔ 2009 اچ ، سٹیئٹز کوں رائبوزوم ریسرچ کیتے کیمسٹری دا نوبل انعام ݙتا ڳیا ۔
او 1976–1977 دے دوران یونیورسٹی آف گوٹنگن اچ میسی فیلو تے 1984–1985 دے دوران کیلیفورنیا انسٹی ٹیوٹ آف ٹیکنالوجی اچ فیئر چائلڈ سکالر وی ہا ۔
سٹیئٹز ہک کمپنی ، Rib-X Pharmaceuticals دے بانیاں اچوں ہک ہا ، جیڑھی ہݨ رائبوزوم تے مبنی نویں اینٹی بایوٹکس دی تیاری کیتے میلنٹا تھراپیوٹکس ہے ۔
اعزازات
[لکھو | ماخذ وچ تبدیلی کرو]کیمسٹری دا نوبل انعام (2009)
2011 اچ رائل سوسائٹی دے غیر ملکی ممبر (ForMemRS) دے طور تے چݨا ڳیا
ذاتی زندگی
[لکھو | ماخذ وچ تبدیلی کرو]او سکینگ ، ہائیکنگ تے باغبانی توں لطف اندوز تھیندا ہا ۔
ایہہ وی ݙسݨا چاہیدا اے کہ ٹام ہک چنڳے وقت کوں اہمیت ݙیندا ہا. او ہمیشاں ڈیپارٹمنٹ ہیپی آورز ، وائن ٹیسٹنگز تے پارٹی کیتے کہیں ٻئے عذر دا انتظار کریندا ہا. انہاں اپݨے گھر اچ ٻہوں شاندار ہالووین پارٹیاں دی میزبانی کیتی ، ہمیشاں مناسب لباس پہنے ہوئے ۔
سٹیئٹز دی شادی جون اے سٹیئٹز نال تھئی ہائی ، جیڑھی ہک ممتاز مالیکیولر بایولوجسٹ اے جیڑھی ییل اچ مالیکیولر بایو فزکس تے بایو کیمسٹری دی سٹرلنگ پروفیسر وی ہے ۔ او انہاں دے نال برانفورڈ ، کنیکٹیکٹ اچ رہندا ہا تے انہاں دا ہک پتر ، جون ، تے ݙو پوتے ، ایڈم تے میڈی ہن ۔ انہاں دا انتقال 9 اکتوبر 2018 کوں لبلبے دے کینسر دے علاج دے دوران پیچیدگیاں دی وجہ نال تھیا ۔