تَلّی واٹویں

پاکستان کیوں بݨیا ہا؟ کینویں بݨیا ہا؟ تے کَیں بݨایا ہا؟ ایہ ایجھیاں ڳالھیں ہِن جیرھیاں ۔اِیئیں آکھ ۔ اَڄاں تائیں ٻجھارت بݨیاں ہویاں ہِن ۔ ہر کوئی اَپݨا اَپݨا ’’نڑ‘‘ تے ’’شرنا‘‘ پھوکی کھڑے ۔ ہِک کُجھ اَکھیندے تے ٻیا کجھ اَکھیندے ‘ ہِک کُجھ لِکھدے تے ݙوجھا کُجھ لِکھدے ۔ پاکستان دی تاریخ دے ناں تے کتاباں لِکھݨ آلیں اِچوں اکثرہ ایجھے ہِن جنہائیں پَنے تاں کالے کیتِن پر تاریخ دے مونہہ تے وی رَڄ تے کالوݨ مَلّی ہینے ‘ ٻیا تاں ٻیا ہُݨ تاں جماعت اسلامی آلے میاں طفیل محمد ہوریں وی درِیٹھ اَتے ندریہہ بݨ تے اَکھیندِن جو مولانا مودودی ’’پاکستان‘‘ بݨݨ دی مخالفت کائناں کیتی ہئی ۔ ہتھوں ایں بارے مسلم لیگ دے اڳواݨیں کوں سُدھ سُرت آلیاں سوہݨیاں صلاحیں ݙیندے رَہ ڳے ہَن ‘ تاریخ دا ایہ او وَݙا کُوڑ اے جینکوں آپاں سِدھے سادے ’’سرائیکی‘‘ ’’تلی واٹواں‘‘ سݙیندوں۔ پاکستان بارے مولانا مودودی بہشتی دی سوچ کیا ہئی او تاں ہنائیں دی لِکھیں ہوئیں کتابیں دے پہلے پہلے چھاپے اِچ چِٹیاں پدھریاں چھپیاں ہویاں ہن ‘ بعد آلیں چھاپیں اِچ عبارتاں بَدلاوݨ تے سطراں اُتے تلے کر تے جماعت آلے مارکہ اَپݨے آپ کوں تے نَویں سِروں پڑھݨ آلیاںنال تاں دروھ دُلاب کر سڳدن ‘ پر جیرھے ہنائیں کوں چنڳیں رِیت ڄاݨدِن سُنڄڑیندن او کئیں ہنائیں دے ’’کُوڑ‘‘ کوں ’’سچ‘‘ مَن گھنِن؟

جے میاں طفیل محمد ہوریں جیرھا تلی واٹواں ریڑھیے اونکوں حق سچ مَن گھنوں تاں وَل ایہ ڳالھ اِی صحی تھی سڳدی اے جو قائداعظمؒ پاکستان دی حکومت چلاوݨ کیتے اپݨے وزیریں دی جیرھی کونسل بݨائی ہئی او وی مولانا مودودی ہوریں دی صلاح موجب جوڑی ہوسے ۔ دُنیا دے (ہوں ویلھے) سبھ توں وݙے اسلامی ملک دا ’’وزیر قانون‘‘ ہک کِراڑ جوگندر ناتھ منڈل کوں بݨایا ہا تے وزیر خارجہ مرزا غلام احمد قادیانی دے ’’خاص الخاص‘‘ مرید چودھری محمد ظفراللہ خان کوں بݨایا ہانے ۔ ’’اسلامی آئین‘‘ جو بݨاوݨاں ہا تے دُنیا دے ٻے اسلامی مُلکیں نال رس پَت جو وَدھاوݨی ہئی ‘ ایں ڳالھوں ایہے ݙونہیں کم ہک ’’ہندو‘‘ اَتے ہک ’’قادیانی‘‘ دے ہتھ اِچ ݙتے ہانے ۔ وَل قائد اعظمؒ پارلیمنٹ اِچ اَپݨی پہلی تقریر اِچ پاکستان وچ وَسݨ آلیں کیتے دین دھرم آپو آپݨے مذہب اَتے مسلک تے عقیدے دی آزادی ݙیوݨ کیتے جیرھا پک کرایا ہا ۔ یقین ݙیوایا ہا او اِی شئیت مولانا مودودی ہوریں دی ݙتی ہوئی صلاح موجب کیتا ہانے ۔ اَکھیندن ’’کھوہیں‘‘ دے مونہہ بھریج ویندن‘ بندے دا مونہہ کوئی بند نی کر سڳدا ‘ میاں صیب! ریڑھی آئو۔ تلی واٹویں۔

حوالہ

ٻٹ کڑاک، مصنف: انیس دین پوری۔ ناشر: جھوک پبلشرز ملتان