تولّد نامے

دنیا گمراہی دے اندھاریاں وچ غرق ہئی جو اللہ سوہݨے نے بطحا توں ہک ایجھے بھاڳاں والے سوجھلے دا ظہور فرمایا جیندی روشنی نال ساری دنیا جگ  مگ کرݨ لڳ پئی۔ مٹھے مدنی سرکار نبی کریم صلعم دی تشریف آوری ایں پوری کائنات کیتے اللہ سوہݨے دا ہک عظیم احسان ہے۔ سرائیکی شاعری دے نعتیہ ادب وچ آپ صلعم دی ولادتِ باسعادت دے موضوع کیتے کئی تولد نامے تخلیق کیتے ڳن۔ انھاں طویل نعتیہ نظماں وچ آپ دے ڄمݨیں کوں بنیادی موضوع دی حیثیت حاصل ہوندی ہے۔ سرائیکی زبان وچ مولوی غلام قادر قریشی دا تولد نامہ وݙی اہمیت رکھدے۔ اے تولد نامہ اگرچہ صرف ہک صدی پہلے لکھیا ڳے مگر اپݨے مضامین دے بیان تے شاعری دے کمال دی وجہ توں ہک ممتاز مقام رکھدے۔ اے تولد نامہ 1072اشعار تے مبنی ہے ۔ مولوی صاحب ٻہوں وݙے عالم دین ہن۔ سیرتِ طیبہ تے تاریخ دا گہرا مطالعہ ایں تولد نامے وچ انھاں دے ٻہوں کم آیا۔ اے تولد نامہ سرائیکی شاعری دے نعتیہ ادب دا سنگار ہے تولد نامہ دا آغاز انھاں اشعار توں تھیندے۔

شانِ محمدؐ عالی شان

افضل کل نبیاں دی جان

باعثِ خلقت نور ظہوری

اول ما خلق اللہ نوری

نور محمدؐ دے تھیں جان

زمین اسمان تے جن انسان

نام محمدؐ نور مجسم

صلی اللہ علیہ وسلم (14)

ایندے بعد سرورِ کائنات دا تفصیلی شجرئہ نسب ۔ حضرت عبداللہ سئیں دی شادی ‘ حضرت عبدالملطب کوں خواب وچ خوشخبری ملن۔ ول آپؐ دی ولادتِ باسعادت دا تفصیلی ذکرہ۔ ایندے بعد تمام انبیاء کرام دا تاریخی حوالیاں نال بیان ۔ حضرت بی بی حلیمہ سعدیہ سیݨ دا آپؐ کوں جھولی پاوݨ ۔ نبی کریم دیاں بچپن دیاں سوہݨیاں عادتاں دا احوال ۔ شام داسفر ‘تجارت تے حضرت بی بی خدیجہ سیݨ ؓ نال شادی مبارک۔ آپؐ دی سیرتِ پاک تے معاملہ فہمی دا بیان ۔ حجرِ اسود دا واقعہ ۔ ایندے بعد غار حرا وچ آپؐ دی عبادت‘ وحی دا نزول سب کجھ پوری تفصیل نال بیان کیتا ڳے۔ اے سیرتِ طبیہ دے موضوع تے ہک مکمل منظوم کتاب ہے۔

رب دا خاصا ہے محبوب

نالے ݙوں جگ دا مطلوب

ختم رُسل تے عالی شان

جبرائیل امین ہوسی دربان

غلام قادر نوں لَیسی دامن

ݙوہیں جہانیں ہوسی ضامن

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان