توشیہائیڈ ماسکاوا

توشیہائیڈ ماسکاوا

توشیہائیڈ ماسکاوا (یا ماسوکاوا) (7 فروری 1940 – 23 جولائی 2021) ہک جاپانی نظریاتی طبیعات دان ہن جنھاں کوں سی پی-وائلیشن تے کم کرݨ کیتے ڄاݨیا ویندا ہے جنھاں کوں 2008 دا نوبل انعام برائے فزکس دا ہک چوتھائی حصہ "ترٹی ہوئی ہم آہنگی دی اصلیت دی دریافت کیتے ݙتا ڳیا جیڑھا فطرت وچ گھٹ توں گھٹ کوارکس دے ترائے خانداناں دی موجودگی دی پیش گوئی کریندا ہے ۔"

ابتدائی زندگی تے تعلیم

ماسکاوا ناگویا ، جاپان وچ ڄمے ہن ۔ ݙوجھی جنگ عظیم دے ختم تھیوݨ دے بعد ، ماسکاوا خاندان ہک شوگر ہول سیلر دے طور تے کم کریندا ہا ۔ ایچی پریفیکچر دے رہݨ والے ، توشیہائیڈ ماسکاوا 1962 وچ ناگویا یونیورسٹی توں گریجویشن کیتی تے 1967 وچ ہیں یونیورسٹی توں پارٹیکل فزکس وچ پی ایچ ڈی دی ڈگری حاصل کیتی ۔ انھاں دے ڈاکٹریٹ دے مشیر طبیعات دان شوچی ساکاتا ہن ۔

ابتدائی زندگی توں ماسکاوا کوں ٹریویا پسند ہا ، انھاں ریاضی ، کیمسٹری ، لسانیات تے مختلف کتاباں دا وی مطالعہ کیتا ۔ ہائی سکول وچ ، انھاں کوں ناول ، خاص طور تے جاسوسی تے پراسرار کہانیاں تے ریونوسوکے اکوتاگاوا دے ناول ٻہوں پسند ہن ۔

گزر گزران

1970 دے ݙہاکے دی موہر وچ کیوٹو یونیورسٹی وچ ، انھاں ماکوتو کوبایاشی دے نال مل کے پارٹیکل فزکس دے سٹینڈرڈ ماڈل وچ ترٹی ہوئی ہم آہنگی (سی پی وائلیشن) دی وضاحت کرݨ تے کم کیتا ۔ ماسکاوا تے کوبایاشی دے نظریے کیتے ضروری ہا جو کوارکس دیاں گھٹ توں گھٹ ترائے نسلاں ہون ، ہک پیش گوئی جیڑھی چار سال بعد باٹم کوارک دی دریافت نال تجرباتی طور تے تصدیق تھئی ۔

ماسکاوا تے کوبایاشی دا 1973 دا مضمون ، "کمزور تعامل دے رینورملائز ایبل تھیوری وچ سی پی وائلیشن" ، 2010 تئیں ایہہ ہن تئیں دا چوتھا سب توں ودھ حوالہ ݙتا ڳیا ہائی انرجی فزکس پیپر ہے ۔ کابیبو–کوبایاشی–ماسکاوا میٹرکس ، جیڑھا کوارکس دے درمیان مکسنگ پیرامیٹرز کوں بیان کریندا ہے ، ایں کم دا نتیجہ ہا ۔ کوبایاشی تے ماسکاوا کوں مشترکہ طور تے ایں کم کیتے 2008 دا نوبل انعام برائے فزکس دا ادھا حصہ ݙتا ڳیا ، ٻیا ادھا حصہ یوچیرو نامبو کوں ڳیا ۔

ماسکاوا 1997 توں 2003 تئیں یوکاوا انسٹیٹیوٹ فار تھیوریٹیکل فزکس دے ڈائریکٹر ہن ۔ او ناگویا یونیورسٹی وچ کوبایاشی-ماسکاوا انسٹیٹیوٹ فار دی اوریجن آف پارٹیکلز اینڈ دی یونیورس دے خصوصی پروفیسر تے ڈائریکٹر جنرل ہن ، کیوٹو سانگیو یونیورسٹی وچ ماسکاوا انسٹیٹیوٹ فار سائنس اینڈ کلچر دے ڈائریکٹر تے کیوٹو یونیورسٹی وچ پروفیسر ایمریٹس ہن ۔

نوبل لیکچر

8 دسمبر 2008 کوں ، ماسکاوا سامعین کوں "معاف کرو ، میں انگریزی نئیں ٻول سڳدا" آکھݨ دے بعد ، سٹاک ہوم یونیورسٹی وچ جاپانی زبان وچ "سی پی وائلیشن اساکوں کیا ݙسایا؟" تے اپݨا نوبل لیکچر ݙتا ۔ سامعین انھاں دے پچھوں سکرین تے سب ٹائٹلز کوں ݙٹھا ۔

گھروڳی زندگی

ماسکاوا 1967 وچ اکیکو تاکاہاشی نال شادی کیتی ۔ جوڑے دے ݙو ٻال ہن ، کازوکی تے توکیفوجی ۔

کھُٹی

23 جولائی 2021 کوں ، ٹوکیو سمر اولمپک گیمز دی افتتاحی تقریب دے ہیں ݙینہہ ، ماسکاوا 81 سال دی عمر وچ کیوٹو وچ اپݨے گھر وچ منہ دے کینسر دی وجہ توں فوت تھی ڳئے ۔ حالانکہ انھاں دی موت تریخی آفت تے کووڈ-19 انفیکشن نال غیر متعلق ہئی ۔ نجی جنازے دے بعد اکتوبر 2021 وچ انھاں کوں جلا ݙتا ڳیا ۔

پیشہ ورانہ ریکارڈ

جولائی 1967 – ناگویا یونیورسٹی دی فیکلٹی آف سائنس دے تحقیقی ایسوسی ایٹ مئی 1970 – کیوٹو یونیورسٹی دی فیکلٹی آف سائنس دے تحقیقی ایسوسی ایٹ اپریل 1976 – انسٹیٹیوٹ فار نیوکلیئر سٹڈی ، یونیورسٹی آف ٹوکیو دے ایسوسی ایٹ پروفیسر اپریل 1980 – ریسرچ انسٹیٹیوٹ فار فنڈامینٹل فزکس (موجودہ یوکاوا انسٹیٹیوٹ فار تھیوریٹیکل فزکس) دے پروفیسر ، کیوٹو یونیورسٹی نومبر 1990 – کیوٹو یونیورسٹی دی فیکلٹی آف سائنس دے پروفیسر 1995 – کونسلر ، کیوٹو یونیورسٹی 1997 جنوری – یوکاوا انسٹیٹیوٹ فار تھیوریٹیکل فزکس دے پروفیسر ، کیوٹو یونیورسٹی اپریل – یوکاوا انسٹیٹیوٹ فار تھیوریٹیکل فزکس دے ڈائریکٹر ، کیوٹو یونیورسٹی 2003 اپریل – کیوٹو یونیورسٹی دے پروفیسر ایمریٹس اپریل – کیوٹو سانگیو یونیورسٹی دے پروفیسر (مئی 2009 تئیں) اکتوبر 2004 – ریسرچ انسٹیٹیوٹ دے ڈائریکٹر ، کیوٹو سانگیو یونیورسٹی اکتوبر 2007 – ناگویا یونیورسٹی دے ممتاز مدعو یونیورسٹی پروفیسر 2009 فروری – کیوٹو سانگیو یونیورسٹی دے ٹرسٹی مارچ – ناگویا یونیورسٹی دے یونیورسٹی پروفیسر جون – ماسکاوا جوکو دے سربراہ تے پروفیسر ، کیوٹو سانگیو یونیورسٹی (مارچ 2019 تئیں) 2010 اپریل – ناگویا یونیورسٹی وچ کوبایاشی-ماسکاوا انسٹیٹیوٹ فار دی اوریجن آف پارٹیکلز اینڈ دی یونیورس (KMI) دے ڈائریکٹر دسمبر – جاپان اکیڈمی دے رکن 2018 اپریل – ناگویا یونیورسٹی وچ KMI دے ڈائریکٹر ایمریٹس اپریل 2019 – کیوٹو سانگیو یونیورسٹی دے پروفیسر ایمریٹس