تنور آلی روٹی

توے آلی روٹی تاں  ٻارہاں  مہینے ہوندی اے ، پالے دی مد کوں  وستی ءِچ تنور دی روٹی وی ہوندی ہئی ۔ہر گھر ءِچ تنور نہ ہوندا ہا جتھ جتھ تنور ہووے ہا واری واری عورتاں  روٹیاں  لا گھندیاں  ، پکے ٻل نال ڈھیر روٹیاں  لڳ ویندیاں  ہن ، تنور دی سوک روٹی رات کوں  کھیر نال کھمدے ہاسے ، ݙینھ کوں  نانی مکھݨ تنور تے چا ویندی ہئی ، جیرھی روٹی لہے ہا مکھݨ مکھ ݙیندے ہَن ، خوشبو کھنڈ ویندی ہئی ، تنور دی مکھی ہوئی دا سواد اَڄ وی نی بُھلدا ، ساوے مرچیں  دی چٹڑیں  یا ول وسل نال کھمدے ہاسے ، وسل کوں  مُک مار تے کچا کھاوݨ اَڄ وی یاد اے ، ہک بندے وسل کوں  مُکی ماری گابی نال آلے گھر ونڄ پی ۔ کھٹوں  تلے لبھدا ودا ہووے ، مائی پُچھیا اَدا خیر ہے کیا لبھدا ودیں  اوں  آکھیا گابی ۔ مائی آکھیا ادا چریا تھی ڳیں  ، گابی کھٹ تلے آئوسے ۔ بندے آکھیا اَدی ڳائوں دی نیں  وسل دی گابی ءِ۔

حوالہ

کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان