تلمبہ

ملتان دے علاقے ءِ چ تلمبہ وی پُراݨاں قصبہ اے ایندی تاریخ ݙو ڈھائی ہزار سال پُراݨی ہے ایں زمانے ءِ چ شہر بلائی قبیلے دے زیر اثر ہا ۔326قبل مسیح ء ِچ جݙاں سکندر اعظم اِتھاں آیا تاں این ملوئی یا ملی قبیلے کوں مختلف جہیں تے شکست ݙے تے ایں شہر کوں فتح کیتا ۔ تلمبہ دا پُراݨاں شہر ہُݨ آلے قصبے دے عین جنوب ءِ چ ہک میل دے فاصلے تے ہے ۔ملتان کنوں اے 51میل دے فاصلے تے شمال مشرق اَتے دریائے راوی دے جنوب ءِ چ چار میل دی دوری تے واقع ہے اینکوں مقامی لوک تلمبہ بھڑ وی آکھدن ۔ لوک کہانیاں ءِ چ تلمبہ ناں دا راجہ ٹل آیا ہا تاریخ ءِ چ ایندے ناں باریکوئی واضح اشارہ موجود کینی اینکوں ٹل ابہ وی آکھیا ڳے ۔ ٹل ابہ دا مطلب ہے شمالی قلعہ ، ٹل ابہ ، تلمبہ نال ملدے ۔یا اے ناں مربع شکل دے برج یا قلعہ دی وجہ توں یا کہیں سمت دی وجہ توں پیا ہووے شرف الدین علی یزدی ظفر نامہ ءِ چ جیندے ءِ چ تیمور دے 1398ء دے حملے دا ذکر ہے تلمبہ کوں تلمبی لکھیا ڳے ایں لڳدے جو اے ناں 1500ء دے لڳ بھڳ پیا ہا ۔ تلمبہ دا شہر پُراݨا برج 74فٹ اُچا ہے اِتھاں دے قدیم کھنڈر شمالاََ جنوباََ 1630فٹ شرقاََ غرباََ 1200فٹ پھیلیے پِن ادھ ءِچ ݙو برج اجٖ وی موجود ہن ۔قلعہ مربع شکل دا ہے تے ایندے ٻاہروں فصیل وی ہے۔

حوالہ

کتاب: میݙی دھرتی، میݙے لوک ، مصنف: ظہور احمد دھریجہ ، ناشر: جھوک پبلشرز ، ملتان 2018ء