تسی روہی تے تھل دامان

سرائیکی وسیب تسا  تے

تسی روھی تے تھل دامان

                        لکھت؛ فرھاد فریدی

جڈاں وی سرائیکی وسیب وچ فصلیں دی رہی دا سیزن آمدے۔سرائیکی وسیب دے خطے چولستان،تھل،دامان سمیت بہاولپور ڈویزن توں گھن تے خواجہ فرید دی نگری کوٹ مٹھن،راجن پور ،ڈی جی خان دی نہریں دی بندش کرڈتی ویندی ہے۔اتھوں دے کسان مل ماہنگے ڈیزل تے فصلاں رہون تے مجبور ہوندن۔جیڑھے علاقیں وچ تلوں دا پانی کوڑا تے تلویں سطح تے ڈونگا ہوندے اتھاں ٹویل نی چلدے بلکہ جڈاں تئیں پانی نہراں وچ نہ آوے فصلاں دی کاشت نہ ممکن ہوندی ہے۔فصل دی رہئی متاثر تھیندی ہے۔اے قصہ ہک سال دا نی بلکہ اے ہر سال دی کہانی ہے۔سرائیکی وسیب دا اے ایشو اتنا وڈا ہے جیندے تے اتھوں دے عوامی نمائندیں دے چپیں تے چپ دے تالے ہن۔الا کئی نی سگدا۔فریاد کینکوں سنائی ونجے۔سرائیکی وسیب جتھ ست دریائے دا ملاپ تھیندے۔جیندا پانی ملک دے ڈھگ سارے علاقے کوں سیراب کریندے۔اتھاں ترہے توں لوک مردے پن۔جانور ہلاک تھیندے پن۔چرند پرند پانی دی بوند بوند کوں ترسدے پن۔زمیناں فصلاں دی کاشت توں متاثر تھی تے بنجر تھیندیاں پن۔اتھاں دے لوک نمانڑے کیندے منہ توں ڈھدے بیٹھن۔ملک وچ خوشحالی ہووے تے بھاویں قحط اساڈا سرائیکی وسیب ہمیش ترہیا رہندے۔جیویں منہ تار دریا ترہیے وسیب توں گذر تے باقی ملک کوں سیراب کریندے پن۔ایویں چولستان توں منہ تار عباسیہ نہر  روہی دے روہیلیں کوں ترہیا رکھ تے آباد کاریں دی زمیناں کوں سیراب کریندی پئی ہے۔اے ول وانجھ کیندے نال تے کیوں تھیندی پئی ہے۔؟کیا اساڈا قصور اے ہے جو اساں پاکستان نال محبت کریندوں۔جے اساڈا قصور ایہو ہے تاں ول لگدے اساکوں بنگلہ دیش بنن تے وی مجبور تساں کریندے پیو۔

‏تیکوں گاوے کھیر پلایم

پانڑی پیتم کھارے

میڈی روہی تسی مر گئی

تیڈے شہر فوارے

واہ وے تیڈے بھائی چارے