تسبّی ہتھ دا ہتھیار

جئے سندھ ترقی پسند پارٹی دے اڳواݨ ڈاکٹر قادر مگسی پاکستان دے جڳ مشہور سندھی لیڈر ہِن ‘ سُدھ سُرت آلے سیاݨے تے سُڄاک نینگر ہِن ‘ وَݙے جگرے تے دِل آلے دلیر جُوان ہِن ۔ سندھ تے سندھیں دے کھسیے ہوئے حق حقوق وَلا ‘ وَلاوݨ کیتے اپݨی قوم تے اَپݨے وسیب دے ناں تے وِکاݨے وَدِن ‘ مَرݨ جیہاں ماراں کھادیاں ہینے ‘ جیلیں اِچ قید تے کشالے کٹیے نے ‘ بھوڳ بھوڳیے ہِنے ‘ تے بھوڳیندے وَدِن پر مجال اے جو مَتھے تے چِین آونے ‘ اونویں کِھلݨے ہَسݨے ہِن‘ جیویں ہُنائیں دے سَن دے نینگر ہوندن ۔ تھولے ݙیہاڑے تِھن عدالت اِچوں ضمانت منظور تھیوݨ تے جیل کنوں رِہا تھی تے اَئے ہِن ۔ اَڄ کلھ اَپݨے دیس دے دورے تے نِکتے وَدِن۔

کراچی کنوں ݙیہاڑی چھپݨ آلی سندھی ٻولی دی مشہور اخبار ’’عوامی آواز‘‘ دے دفتر پُنن تاں ہتھ وچ ’’تسبی‘‘ ہانے ۔ اخبار آلیں پُچھیے سئیں! ایہ کیا اے؟ کِھل تے وَلدی ݙتونے ‘ ݙہدے نِوے پے‘ تسبّی اے ٻیا کیا اے؟ پر مَیں ایہ تسبی بی بی بے نظیر دی ریس کریندیں ہوئیں کائنی چاتی ۔ تسبّی ہتھ اِچ رَکھݨ دی عادت کݙوکݨی ایں ۔ نیک نمازی وی ریہا ہاں پر ہُݨ بھڄ دُھرک سببوںنماز چُک ویندی اے ۔ ویلھے سِر نِمھیں پڑھ سڳدا ۔ رمضان دے تریہہ روزے ضرور رَکھداں۔ ’’عوامی آواز‘‘ آلے مارکہ گُس پِن ڈاکٹر قادرمگسی صیب کنوں پُچھن ہا‘ جو او تسبّی تاں ہتھ اِچ رکھݨ دے ہیلکے ہِن ۔ پر او مَݨکے پھیرݨ ایلے پڑھدے کیا ہِن ‘ ایں بارے تاں شئیت کہیںاخبار آلے اَڄ تئیں بی بی بینظیر کنوںوی کائنی پُچھیا‘ جو بی بی ! اَپݨے ہتھ اِچ پکڑی ہوئی تسبّی تے کیرھا وظیفہ پڑھدو؟ کیا دا وِرد کریندو؟ اُونویں آپت دی ڳالھ اے جو تسبّی ہے واہ جو شئے مسلمانیں دے ’’پیر‘‘ عیسائیں دے پادری‘‘ سکھیں دے گورو‘ کِراڑیں دے ٻانبھݨ ‘ ٻدھیں دے بھکشو‘ یہودیں دے ’’رَبّی‘‘ سبھے چئی ودّے ہوندِن ۔ ہتھ اِچ نہ ہووے تاں ڳل اِچ ہوندی ہینے ۔ ایہے سبھے اَپݨے اَپݨے ’’دین دھرم‘‘ کوں منݨ آلے دَھرمیں دے اڳواݨ ڳݨیدن اَتے تسبّی ہک لیکھے ہنائیں دے ہتھ دا ہتھیار اے ۔ پَر ہُݨ اَپݨے پاسے ’’سیاستدانیں‘’ اِچ اِی تسبّی ہتھ اِچ چاوݨ دا رواج پئے ڳے ۔ مولانا محمدعبداللہ درخواستی‘ مولانا شاہ احمد نورانی‘ مولانا سمیع الحق‘ مولانا عبدالستار نیازی ‘ مولانا فضل الرحمن اَتے قاضی حسین احمد ہوریں تسبّی چاوݨ تاں ٹھہندی اے پر اسیݙی بھاڳ بھری بھیݨ بی بی بینظیر بھٹو اَتے ڈاکٹر قادر مگسی صاحب دا لیکھا تاں اُوہو اے ‘ اِݨ مِݨ میکوں اِی وچ ڳݨ۔

جمعۃ المبارک3؍دسمبر1993ء

حوالہ

ٻٹ کڑاک، مصنف: انیس دین پوری۔ ناشر: جھوک پبلشرز ملتان