تریمت آکھیا (رفعت عباس دی حکایت)

حکایت

تریمت آکھیا.....

ہک تریمت کول رنگیں دا ڈبہ ہئی اوں ڈبے اندر کئی وت رنگیں دے ڈبے ہَن'اوندے چودھاروں جے تئیں نگاہ ونجے چِٹے چِٹے پُھلاں دے کھیت ہَن'اوں ڈبے وچوں رنگ نیلا کڈھیا ہک پُھل کوں لاتا تے جے تئیں نگاہ ونجے پُھل سارے نیلے تھی گئے'اوں کاسنی وت ڈبے وچوں رنگ کڈھیا تے سارے پُھل کاسنی'اوں ویہہ توں زیادہ رنگ ڈبے وچوں کڈھ تے ورتائے' ہک پُھل کوں رنگیا تے کھیت پورے رنگے گئے

اساں اُتھوں لنگھدیاں تریمت توں پُچھیا اوندے کول ایہ کیڑھا جادو ہِے'اوں آکھیا جو سارا جادو ڈبے وچ ہِے'رنگیں دا ایہ ڈبہ ساکوں کِتھوں ملسی اساں اگوں پُچھیا'اوں آکھیا جے مرد اپنڑے ہوٹھیں اتے سرخی لا سگن' پُھلیں والی چِھیٹ دے کپڑے پا سگن تاں ایں ڈبے دا جادو اُنہاں تے کُھلے'اساں اگوں کھِل پئے تے ساکوں اوہ شاعر سارے یاد آئے جیڑھے تریمت بنڑ تے شاعری تاں کریندے ہِن پر ہوٹھیں تے سرخی نی لا سگدے'پُھلیں والی چِھیٹ دے کپڑے نی پا سگدے.