ترائے کردار
میں اَڄ دی ڳالھ کراں ،بہشتی میاں انیس دین پوری دا کالم’’ ٻٹ کڑاک ‘‘ݙینھ وار جھوک سرائیکی ء ِ چ شائع تھیندا ہا، کالم دے ترائے کردار ہن اَتے اے سارے میاں صاحب دے یار ہن، ہک درزی ہا اوندا ناں ’’ماسٹر گنڈھ تروپ‘‘ رکھیا ہویا ہا، ٻیا مولوی ہا میاں صاحب اوندا پُٹھاناں ’’مولوی بھن تروڑ‘‘ رکھیا ہویا ہا،ٻیا منشی ہا میاں صیب اوندا پُٹھا ناں ’’منشی مُک مار‘‘ رکھیا ہویا ہا اے ترائے ناں انہاندے کیتے کرتے پچھوں ہن تے ایجھے مشہور تھئے جو اصلی ناں کہیں کوں یاد نہ ریہے۔آکھݨ آلی ڳال اے ہے جو پُٹھے ناں وی پکے ہوندن ،بھانویں اصل ناں وِسر ونڄن پُٹھے ناں نی وِسردے ۔
اے وی ݙسی ونڄاں جو اڄ 25دسمبر2019ء کوں میݙے بھتریجے نعیم خان دی شادی ہے ، دھریجہ نگر کٹھے تھے ٻیٹھوں میں ڳال چولی اے جو پُٹھے ناں وی لوک دانش دا حصہ ہن انہاں کوں وی لکھ تے ہتھیکا کروں ،میں ڳال سُݨائی جو میں نِکے لا وستی رُلدا راہندا ہم کہیں ایلے ݙاڈکے پاسے تے کہیں ایلے نانکے پاسے ، چاچے مامیں ہر پاسے رول گابے آلی کار رُلدا ہم ،مامی عائساں میکوں آکھیا تتے ایلے لُنڈے کُتے آلی کار ہر پاسے رُلدا راہندیں لُنڈو آ!ہک جھاہ ٻہہ تھیا کر، اُوں ݙینھ توں بعد میکوں اُو لُنڈو سݙیندی ہئی ، اے وی ݙساں جو ہک تا ں میں ہم تے ٻیا ہوں گھر ء ِچ جہڑا کُتا ہا اُوندا وی پچُھ کائناں ہا۔میں اے ڳال سُݨائی تاں اَدا محمد دین آکھیا جو میݙا ناں لکھو میکو ں اے اکھیندن،ماماں (مولانا احسان اللہ دھریجہ )آپ ݙسݨ پے ڳے جو میݙا ناں وی لکھو میکوں اے اکھیندے ہن ،مسات بشیر آکھیا جومیݙا وی ناں لکھو ایویں سارے ݙسݨ پے ڳے۔میں کاپی تے لکھدا ٻیٹھاں پر میں اے سوچ سوچی اے جو پُٹھے ناں لِکھ ݙیندیسے ،اے نی لکھدے جو کیں کوں کیا اکھیندے ہن۔ تاں جو کہیں دی دلآزاری نہ تھیوے۔
حوالہ
[لکھو | ماخذ وچ تبدیلی کرو]کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان