تبسم علی پوری

1916ء تا 1985ء

تبسم علی پوری دا اصل ناں بھڳت لچھمن داس ہا۔آپ یکم مارچ 1916ء کوں بھڳت حکم چند دے گھر علی پور ضلع مظفر ڳڑھ وچ پیدا تھئے،تقسیم دے بعد آپ انڈیا چلے ڳئے، اُتھاں ونڄ کے بلدیہ سونی بت دے صدر رہ ڳئے۔تبسم صاحب سرائیکی دے علاوہ اردو شاعری وی کریندے ہن ، ’’برقِ تبسم‘‘ تے ’’عزم جواں‘‘ آپدے مطبوعہ شعری مجموعے ہن ۔اصناف دے حوالے نال آپ نعت تے مرثئے وی لکھدے ہن ، جوشؔ ملیح آبادی دے شاگرد ہَن۔انڈیا دی وزیرِاعظم اندرا گاندھی نال تبسم علی پوری دے قریبی مراسم ہن، 3جنوری1985ء کوں سونی پت انڈیا وچ آپ انتقال کر ڳئے۔نمونہ کلام!

(1)غزل

محبت دے حسیں ڳاوݨ سݨاوݨ کون آندا ہے

میکوں الفت دی جھولی وچ سماوݨ کون آندا ہے

حریم ناز وچ جیکر او سوہݨاں آ وی ونڄے تاں

جیڑھی دنیا اُڄڑ ڳئی ہے ، وساوݨ کون آندا ہے

اساں ڈھہہ کے سنبھل ونڄوں میڈٖا مولا عنایت کر

تھکے ترٹے پندھیڑو کوں اُٹھاوݨ کون آندا ہے

تہاڈٖی  بے رخی نے میڈٖی زندگی کوں اُڄاڑیا ہے

لڳی ہے بھا جیڑھی تن کوں ، بُٖجھاوݨ کون آندا ہے

میں اپݨی کم نصیبی دا گلہ کیں توں کراں صاحب!

چراغِ راہ گزر کوں وت جلاوݨ کون آندا ہے

ایہو رسمِ محبت ہے ، ایہو دستور دنیا دا

تبسّمؔ روندیاں اکھیاں ، ہساوݨ کون آندا ہے