تاریخ نسائیت

وکیپیڈیا توں

نسائیت دی تاریخ، (History of feminism) اُنہاں تحریکاں تے نظریات دے احوال (تاریخی یا موضوعی) اُتے مشتمل ہے جیندا مقصد تریمتاں دے مساوی حقوق دا حصول ہے۔ ڄݙاں جو دنیا دے نسائیتی دے اسباب، مقاصد تے وقت اُتے منحصر ارادے، ثقافت تے ملک وچ وکھرے وکھرے ہن، ڈھیر سارے مغربی نسائی مورخین زور ݙے تے آکھیا ہے جو تریمتیں دے حقوق دے حصول کیتے کم کرݨ آلی ساریاں تحریکاں کوں نسائی تحریکاں دے طور تے کم کرݨا چاہیدا ہے، اتھاں توݨیں جو جیہڑے ویلے اُنہاں تحریکاں خود ایں اصطلاح کوں خود اُتے لاگو کیتا (یا کائنی)۔ کجھ ݙوجھے مورخین جدید نسائی تحریک تے اوندے بعد دی ساریاں تحریکاں کیتے "نسائیت" دی اصطلاح کوں محدود کر ݙتا ہے تے (نسائیت دی پہلی لہر) ایں توں پہلے دیاں تحریکاں کوں بیان کرݨ کیتے "ابتدائي نسائیت" (Protofeminism) دا عنوان استعمال کریندے ہِن۔

جدید مغربی نسائيت دی تاریخ دی روایتی طور تے ترائے ادوار یا "لہراں" وچ ون٘ݙ کیتی ڳئی ہے، جیندے وچوں ہر ہک بیشتر پیشرفت دی بنیاد اُتے قدرے وکھرے مقاصد دے نال ہے:

نسائیت دی پہلی لہر، توں مراد پوری مغربی دنیا وچ اُنیہویں تے ویہویں صدی وچ نسائیت متعلقہ سرگرمیاں تے خیالات دا دور ہا۔ ایں تحریک دی بنیادی توجہ قانونی مسائل بنیادی طور تے تریمتیں دے حق رائے ݙیوݨ اُتے ہئی۔

نسائیت دی ݙوجھی لہر، (١٩٦٠ء–١٩٨٠ء دی دہائی)، ثقافتی عدم مساوات، صنف دا کردار تے معاشرے وچ تریمتیں دے کردار اُتے مباحث ایندا حصہ ہن.

نسائیت دی تریجھی لہر، (١٩٨٠ء -٢٠٠٠ء دی دہائی)، توں مراد نسائی سرگرمی دا متنوع تناؤ، تریجھی لہر خود کوں ݙوجھی لہر دے تسلسل تے اوندی ناکامیاں دے جواب دے طور تے ݙیکھدی ہے۔

ابتدائی نسائیت[لکھو | ماخذ وچ تبدیلی کرو]

نسائی تحریک دے وجود توں پہلے جیہڑے لوک تے کارکن تریمتیں دی مساوات اُتے تبادلہ خیال کریندے رہے یا ایکوں آڳوں ودھایا، اُنہاکوں کئی ویلے ابتدائی نسائیت پسند/پروٹو فیمسٹسٹ دا ناں ݙتا ویندا ہئی۔ کجھ اسکالر ایں اصطلاح اُتے تنقید کریندے ہن کیوں جو اُنہاں دا خیال ہے جو ایں توں پہلے کیتی ونڄݨ آلی شراکت دی اہمیت گھٹ ہوندی ہے یا ایہ جو نسائيت دے آغاز دی کوئی مخصوص تاریخ کائنی ہے جیندے کیتے ابتدائی نسائیت/پروٹو فیمسٹسٹ یا جدید نسائیت/پوسٹ فیمسٹسٹ جہی اصطلاحات ورتیاں ونڄݨ.

ایلین ہاف مین بارچ دے مطابق، ٤٢٨ قبل مسیح وچ،  افلاطون، تریمتیں دی مجموعی سیاسی تے جنسی مساوات کیتے بحث کیتی، او تریمتیں دی وکالت کریندے ہوئے انہاں کوں اعلیٰ طبقے (او لوک جیہڑے حکمرانی کریندے ہِن تے لڑدے ہِن) دا رکن ٻݨاوݨ دی حمایت کریندا ہے۔