تارا

تارا گیسیں دا بنڑیا ہویا ہک وݙا گول جسم ہوندے جیندی آپڑیں روشنی ہوندی اے۔ مطلب اوآپ روشنی پیدا کریندے۔ سورج ہک تارا اے جیڑھا ݙو گیسیں ہائڈروجن تے ہیلیئم نال مل تے بنڑیا ہویا اے۔ ہیندے اچ  3  حصے ہائڈروجن تے ہک حصہ ہیلیئم پاتی ویندی اے۔ سجھ دے ٻاہروں ٻاہر  گرمی 55 ہزار ڈگری سینٹی گریڈ اے۔ اتنی زیادہ گرمی دی وجہ سجھ دے مرکز اچ ہائڈروجن گیس دی ہیلئیم گیس اچ مسلسل تبدیلی اے۔ ہر تارا گرمی تے روشنی پیدا کریندے۔ تارے دا رنگ تارے کنوں نکلݨ آلی گرمی کوں ظاہر کریندے۔ تھوڑی گرمی آلے تارے دا رنگ رَتا تے ٻہوں زیادہ گرمی پیدا کرݨ آلے تارے دا رنگ نیلا ہوندے۔ او تارے جیڑھے درمیانی مقدار اچ گرمی پیدا کریندن انہاں دا رنگ پیلا، چِٹا یا مالٹے دے رنگ آلی کار ہوندے۔ ساݙے سجھ دا رنگ پیلا اے۔ او تارے جیڑھے سجھ کنوں تھوڑا زیادہ گرمی پیدا کریندن انہاں دا رنگ چِٹا تے او تارے جیڑھے سجھ کنوں تھوڑی گھٹ گرمی پیدا کریندن انہاں دا رنگ مالٹے دے رنگ آلی کارہوندے۔

تارے دا دورحیات

تارے دی زندگی ارباں سال ہوندی اے۔ تارا بنڑݨ کنوں لا تے مَرݨ تک مختلف شکلیں اچوں گزردے۔

سجھ یا سجھ جیݙ ے تارئیں دی حیاتی دے مرحلے

تارے دی پیدائش

کہکشاں اچ گیسیں تے گردوغبار دے ٻہوں وݙے بادل پاتے ویندن جیکوں اساں نیبولائی آہدوں۔ تارے ایں نیبولائی اچ ڄمدن۔ نیبولا حرکت کریندئیں ہوئیں زیادہ کنوں زیادہ گردوغبار تے گیس کٹھی کر گھندے۔ گیس تے گردوغبار دے ذرات مادے دی ہک گُھمدی ہوئی ڳوڑھی آلی کار بݨ ویندن۔ ایں گرم مادے دی ڳوڑھی کوں پروسٹار[PROSTAR] آکھیا ویندے۔ وقت دے نال نال پروسٹار ٻہوں زیادہ روشنی تے گرمی چھوڑݨ پئے ویندے۔ ایں ویلھے اساں پروسٹار کوں سٹار یعنی تارا آہدوں۔

تارے دی موت

تارے اچ موجود مادہ ہر وقت توانائی اچ تبدیل تھیندا پیا ہوندے جیندی وجہ کنوں تارا گرمی تے روشنی خارج کریندا پیا ہوندے۔ ساݙا سجھ وی ہک تارا اے جیڑھا آہستہ آہستہ مَردا پئے۔

حوالہ

کتاب: کائنات دا سفر ، مصنف : جعفر عباس بزدار ، ناشر: جھوک پبلشرز ملتان