تاج محل

آگرہ ٹیشن دے ٻاہر کئی کاٹکُو بندے کھڑے ہَن ۔اَساں اُتھاں اُنھاں نال آگرہ تے فتح پور سیکری دی سیل کراوݨ دا مُٹّا کیتا۔ ہر ٹیکسی دا وواپسی تئیں850/-روپے کرایہ مُکاّ ۔ 10:50تے اَساں ٹیکسی اِچ ٻہہ کے آگرہ کنوں نکِلدے پئے ہاسے ۔ اساں سویل دا نِرھان نہ کیتا ہا تہوں بُکھ لڳی ودّی ہئی ۔ ٹیکسی آلا شہروچوں لنگھیندا اساکوں ہک ہوٹل تے گھن ڳیا ۔ اُتھاں کھاݨاں کھادا تے 800/-روپے ٻل ادا کیتا پاکستان مطابق ایندی قیمت 1428/-روپے بݨی۔  اساں 39روٹیاں کھادیاں جنہاں دا مُل195/-روپے ہندوستانی ہَن اَتے پاکستانی مُل 350/-روپے بݨیا ۔کھاݨاں سادہ ہا ۔ بوتلاں وی شامل نہ ہَن ۔ ٻس گوشت شامل ہئی۔ برحال کھاݨاں چنڳاں ہئی۔ ہوٹل درمیانے قسم دا ہا ۔ کھاݨے دے بعد ہتھ دھووݨ واسطے کٹوریاں اِچ پاݨی آ ڳیا ۔ پاݨی اِچ نبوئے دا ہک ٹوٹا ؍بھورا موجود ہا ۔ ایہ انداز ساکوں چنڳاں لڳا۔ اتفاق دی ڳالھ ہے اساں رات دا کھاݨاں وی اُتھائیں اَن کھادا ۔ پر ہُݨ اَساں سیاݨے تھی ڳئے ہاسے ۔ سویل کنوں اَساں ادّھا کھاݨاں منگایا تے400/-روپے وچ کم تھی ڳیا ۔ ݙوپہراں ویلے کھاݨاں بچ ڳیا ہاکیوں جو اساں زیادہ کھاݨے دا آڈر ݙے ٻیٹھے ہاسے۔ آگرہ وچ جاء جاہ تے لکھیا کھڑا ہا:

Clean Agra geen Agra۔ آگرہ واقعی صاف ستھرا اَتے ساول آلا شہر ہے ۔

کھاݨاں کھا کے ٻارہاں وڄے اَساں ہوٹل کنوں ٻاہر نکلیوسے ۔ رستے وچ رات دی اجمیر کیتے بس دیاں سیٹاں بُک کرائیاں ۔ اِتھائوںاجمیر کنوں دِلّی دیاں گݙی دیاں ٹِکٹاں وی بُک تھی ڳیاں ۔ اساں پاسپورٹ ݙکھائے ۔ ویزے ݙکھائے ۔ اُنہاں کوں ٹِکٹاں دے پیسے ادا کیتے ۔ بُکنگ آلیاں رات کوں ٹکٹاں ݙیوݨ دا آکھیا ۔ اجمیر کنوں فی بندہ 320/-روپے ہندوستانی (پاکستانی575روپے) ساݙے کنوں وصول کیتے ڳئے ۔ غالباً اصلی ٹکٹ200/-روپے(پاکستانی375/-روپے) بݨدے ہَن ۔ پاکستان وانگ ہندوستان وچ وی پوڑھی پوڑھی تے یاتریاں کوں لُٹیا ویندے ۔ اوورچارجنگ ݙونہاں ملکاں وچ تھیندی ہے ۔

حوالہ

کتاب: دِلّی ڈھائی کوہ۔ مصنف شوکت مغل، چھپیندڑ: جھوک پبلشرز ‘ ملتان