بی ٹی ایم

بہاول پور ٹیکسٹائل مل (بی ٹی ایم) اسیݙی وستی توں  ڈھائی ترائے میل پرے خان پور دے نال ہئی،اسیݙی اَدھ وستی مل ءِچ کم کریندی ہئی ،اسیݙی وستی دے مزدور سودا اسیݙی دکان توں  چیندے ہَن ،پندرھی ملے ہا تاں  پہلے آلا لہݨا بے ٻاک کریندے ہن تے ولا نویں  سنویں  ۔ عام لیبر دی 39روپے پند رپی ہوندی ہئی وقت دے نال نال تنخواہ ودھدی رہ ڳی ۔ سگریٹ ڈھیر چلدا ہا ، اساں  لمپ ،بغلہ، قینچی، کے ٹو پاشن شو رکھیندے ہاسے ، بعد ءِچ سپوٹ آلا سگریٹ وی آیا۔ میں  مل ءِچ کݙاہیں  کم نی کیتا پر کم کرݨ آلے اسیݙے سکے بلو روم ، کارڈنگ ، ڈرنگ ، سمپلیکس ، کون ویلڈنگ ، بلیچنگ دے کھاتیں  دے ناں  گھندے ہن ۔ کجھ پاور ہائوس ءِچ کم کریندے ہن تے کجھ پلیدار ہوندے ۔ پلیداریں  دا جمعدار ماما رسول بخش ہا۔

حوالہ

کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان