بیگ صیَب دی پلیٹ
۱۹۸۴ء اِچ فضل حسین دی نوکری ہک ملٹی نیشنل کمپنی وچ تھئی۔احمد پور شرقیہ سنٹر ملیا۔ ڈھیر ساری تنخواہ دے نال جیپ وی مِلی ۔ ٻاہرلے ملکیں دے سفر ایں کنوں علاوہ ۔ نہ بے ایمانی نہ رشوت نہ خوشامد ۔
نوکری کوں ݙو مہینے تھئے ہن ہیڈ آفس کراچی وچوں خط آیا جو فضل حسین ہک ہفتے دی سالانہ کانفرس وچ شامل تھیوݨ واسطے اسلام آباد ونڄݨے۔ رہائش ہک فائیو سٹار ہوٹل اِچ ہوسی تے ملتان کنوںہوائی جہاز تے ونڄݨا ہوسی۔ فضل حسین کوں یقین نہ آیا جو اے تاں سالانہ کانفرس ہے جݙاں جو اونکوں نوکری کریندے ہوئیں حالی ݙو مہینے تھئے ہن ۔ فضل حسین سمجھے جو ایہ خط بھُل تے اُوں دُو پٹھ ݙتا ڳئے۔ وَل وی فضل حسین چپ چا کیتی جو ݙٹھا ویسی۔جو پُچھݨ نال متاں اوندا ناں لسٹ وچوں کٹ ݙتا ونڄے۔ اُوں دوستیں کوں وی نہ ݙسیا جو ہوائی جہاز تے سفر کرݨ توں بعد ہک فائیو سٹار ہوٹل وچ ہفتہ راہݨے۔ݙ ر ایہو ہا جو اونکوں پکا پک نہ ہا۔ ڄہاڑے گزردے ڳئے ۔کانفرنس کنوں ہک ݙینہہ پہلے ہیڈ آفس کراچی وچوں فضل حسین کوں فون آیاجو کانفرنس دا لیٹر مل ڳیا ہوسی، فضل حسین اُنہئیں کوں ݙس ݙتا جو لیٹر مل ڳیا ہا۔ہݨ فضل حسین خُش تھی ڳیا۔
فضل حسین احمد پور شرقیہ کنوں ہک ݙینہہ پہلے ملتان واسطے جیپ تے روانہ تھی آیا۔ ملتان اِچ ہک رات دا ٹِکݨ دا انتظام تھیا پیا ہا۔ کمپنی وچ فضل حسین دا ہک بندہ واقف ہا۔ اوندا ناں ہا مرزا منصور بیگ ۔جیڑھا جو اوندا انچارج وی ہا۔ فضل حسین دا تجربہ تاں کوٹ ادو دے گورنمنٹ بس اسٹاپ دے ہوٹل تے ٹُکر کھاوݨ دا ہا جݙاں جو اُو اُوں ہوٹل تے اپݨی پڑھائی دے دوران کئی دفعہ روٹی کھادی کھڑا ہا۔ ڈیرہ غازی خان توں فیصل آباد تک ویندئییں ہوئیں اُوں کئی سال گورنمنٹ ٹرانسپورٹ بس سروس تے سفر کیتا ہا۔ جیندے کئی شیشے ترٹے ہوئے ہوندے ہن تے سردئییں دے سفر اِچ مٹی تے ٹھڈ دے نال او رات دے سفر اِچ بوتا بݨ ویندا ہا۔ ہݨ کتھاں فائیو سٹار ہوٹل تے ہوائی جہاز دا سفر۔
را ت ملتان وچ گزاری تے ٻئی ݙینہوار سویر نال ملتان ایئرپورٹ پچا یا ڳیا ہا۔ فضل حسین بورڈنگ کارڈ گھِن جہاز تے چڑھ ڳیا۔فضل حسین آکھیا جہاز تاں اساں اسمان تے ݙیدھے ہاسے جیڑھا چیڑی جیݙاہوندا ہا ۔اَڄ اُوں پہلی واری جہاز زمین تے کھڑا ݙٹھا۔جیڑھا جو ݙو کنال زمین مَلی کھڑا ہا۔ جہاز اِچ ݙیڈھ سو بندے ٻیٹھے ہن ، ٹھڈا ماحول ، خوشبودار فضا، تمیز والیاں مائیاں ایجھیاں پیار نال اَلیندیاں ہن جو گھر وی وِسر ڳیا۔
فضل حسین دا ہک بیگ ہاجیندے وچ کپڑے تے کجھ فائلاں ہن اُو بُک کر گِدھا ڳیا ہا۔ فضل حسین کوں اوندا ٻہوں خیال رہ ڳیا۔ جہاز اسلام آباد پُڄ ڳیا۔ فضل حسین بیگ چا تے ایئر پورٹ دے ٻاہروں نکلݨ لڳا تاں ہک باوردی بندے اوندے بیگ کوں ہتھ پاتا۔ فضل حسین اوندا ہتھ تڑوا سٹیا۔ اُوں سمجھیا ایہہ بیگ کھسیندے۔ جو شہریں وچ دوکھے ٻہوں تھیندن ،بندے آکھیا! سر میں تہاݙے ہوٹل دے ویگن دا ڈرائیور ہاں تہاکوں گھِنݨ آیاں۔فضل حسین آکھیا تے وَل ایں ݙس نا۔ توں جو آ کے میݙے بیگ کوں پووݨ سٹ ہتھ پیندا پیا ہاویں میں تیکوں بیگ کِتھاں ݙیندا ہَم ۔ڈرائیور فضل حسین بیگ کوں ویگن اِچ رکھیا تے اُونکوں ویگن دی سیٹ تے ٻلہا ݙتا۔ کمپنی دے ٻئے بندے وی فضل حسین نال ویگن اِچ ٻہہ ڳئے۔ویگن چَل پئی ہوٹل پُڄ ڳئی۔ہوٹل دے اندروں کائونٹر دے سارے بندے اپݨا داخلی کارڈ پُر کریندے پئے ہن۔ فضل حسین وی کارڈ پُر کیتا تے اونکوں کمرہ اَلاٹ تھی ڳیا۔ ہک ویٹر ہتھ اِ چ چاٻی پا تے فضل حسین کنوںبیگ گھِن گھِدا تے کمرے آلے پاسے روانہ تھی پیا۔سامݨے لِفٹ کھڑی ہئی۔ویٹر لِفٹ دا بٹݨ دبایا ،لفٹ دا دروازہ کھُل ڳیا۔ ویٹر فضل حسین کوں لفٹ وچ آوݨ دا اشارہ کیتا۔ فضل حسین لفٹ پہلی دفعہ ݙیہدا پیا ہا۔ اُوں سمجھیا جو ایہو کمرہ ہے اُوں ویٹر کوں آکھیا جو ایہہ کمرہ تاں ٻہوں چھوٹا ہے۔ ویٹرآکھیا: کمرہ تہاݙا اُتے ہے ایہہ لفٹ ہے۔ فضل حسین ڳالھ سنبھال کے آکھیا ، ہا ہا میکوں پتہ ہے۔ میں ایہہ پیا آہداں جو لفٹ دا کمرہ ٻہوں چھوٹا ہے۔ انگلینڈ وچ لفٹ دے کمرے ٻہوں وݙے ہوندن۔ لفٹ چل پئی، وَل رُک ڳئی، ویٹربٹݨ دبا کے لفٹ دا دروازہ کھولیا، بیگ ہتھ اِچ پا تے ویٹر اڳوں اڳوں کمرے دی طرف تے فضل حسین پچھوں پچھوں ۔کمرہ کھولیاتے ویٹر فضل حسین کوں کمرے دے اندر داخل تھیوݨ دا اشارہ کیتا۔ کمرہ کیا ہا بہشت ہئی بہشت۔ شاندار بیڈ ، اعلیٰ فرنیچر، میزاں کرسیاں، ٹیلی فون، اعلیٰ ٹیلی ویژن سامݨے دیوار تے ہلکے نیلے رنگ دا فل پردہ ۔ قالین اتنا چنگا جو پیر لتھے ویندے ہن۔ بیرے سلوٹ ماریا تے آکھیا ، سر کوئی حکم؟ فضل حسین کوں پتہ نہ ہئی جو اینکوں سو پنجاہ روپے ٹِپ ݙیوݨی ہے۔ فضل حسین خالی شکریہ ادا کیتا۔ ویٹر پاسا ولایا تے پریڈ کریندا ہویا ٻاہر نکلیا ۔ دروازہ بند تھیا ، دروازے دا تالا ایجھا سوہݨا ہا جو اوندے بند تھیوݨ دی آواز وچوں ہک ’’کھپ ‘‘دی آواز اَمدی ہئی۔ جیندی چَس چاوݨ واسطے فضل حسین کئی دفعہ دروازہ کھولیا تے بند کیتا۔ کمرے وچ سامان ݙیکھ تے فضل حسین کوں اپݨے گھر دا کوٹھا یاد آڳیا۔ جیندے وچ داݨے دی کلہوٹی،ٻکری ٻدھی ہوئی ، کھٹ تلے کاٹھیاں ، ہک پاسوں چکی تے چُلھ تے ساری رات واسطے چُلھ تے ساڳ چڑھیا ہویا ہوندا ہا ۔فضل حسین اُٹھیا پردے کوں چھیڑیا۔ پردے دے پچھوں ہک ٻیا پردہ وی کھڑا ہا۔ فضل حسین پردے کوں ہٹاوݨ چاہندا ہا تاں جو شیشے وچوں پورے شہر دا نظارہ کرے۔پردے کتھاہوں نہ کھلدے پئے ہن۔ ہِیں شُڑد مُڑد ڳول دے وچ پردے دے نال ہک پاسوں لڑکیے ݙو وٹݨے فضل حسین دے ہتھ لڳے۔ جینویں فضل حسین وٹݨے کوں وٹیا تاں پردہ کھلݨ پئے ڳیا۔ خوش تھی ڳیا جو میں ہݨ پردہ کھول گھِنداں۔ اوندے بعد فضل حسین باتھ روم وچ وڑ ڳیا۔ باتھ روم اِچ شینک دے اُتے ہک ٹوٹی بطخ دی ڳچی وانگوں کھڑی نظر آئی۔فضل حسین خوش تھیا جو ہوٹل دی غلطی پکڑ گِدھی ہِم ہک ٹوٹی دا مطلب ہے ٹھڈا پاݨی یا گرم پاݨی۔ٹوٹی کوں ہتھ لایُس سڄے کھٻے گھمایُس پاݨی نہ نِکھتا۔اُونکوں ٹوٹی دی ٻوتھی اُتوں تے پٹݨ دا پتہ ہی کائنا ہا۔ ایں واسطے پاݨی وی نہ نِکھتا۔ او واپس وَل آیا بیڈ تے آن ٻیٹھا ، نال والی ٹیبل تے پئے ہک کارڈ دے اُتے ہوٹل دے اندر دے نمبر لکھے پئے ہن۔ جیندے وچ روم سروس ،لانڈری وغیرہ وغیرہ شامل ہن۔ نمبر پکا تے اُوں اللہ دے آسرے دے اُتے ہک نمبر ملایا۔ پرلے پاسوں ہک زنانی ٻولی۔جیندی آواز وچ اتنا اپنائیت ہئی جو فضل حسین ایہ سمجھیا ایہہ زنانی اونکوں پہلے کنوں ڄاݨدی ہے۔ اُوںپچھا’’سر میں آپ کے کس کام آسکتی ہوں‘‘۔فضل حسین آکھیا جناب پہلے پہلے تاں تساں میݙے باتھ روم اِچ پاݨی ٹھیک کروائو۔ݙوجھی ڳالھ اے کوئی ہک اَدھی چاہ وی بھیڄو۔تھوڑی دیر بعد کمرے دے اندروں گھنٹی تھئی ’’ڈِنگ ڈانگ‘‘ اینجھی من بھاندی گھنٹی دل آہدا ہا اونکوں سݨوں ٻیٹھے۔فضل حسین دروازہ کھولیا تاں ٻاہروں ہک باوردی بیرہ پوری ٹرالی سڄائی کھڑا ہا۔اوہ ٹرالی کوں اندر ریڑھ آیا۔اُوں ہک کارڈ تے دستخط کروائے تے سِر جھکاکر کے ادبی سلام کیتا تے آکھیا کوئی ٻیا حکم۔فضل حسین کوں وَل پتہ کائنا ہا جو ایں ویٹر کوں پنجاہ سو ݙیوݨے۔ فضل حسین خالی شکریہ آکھیا۔ ویٹر ابائوٹ ٹرن کر کے چلا ڳیا۔ حالی چاہ شروع نہ کیتی ہئی جو کمرے دی گھنٹی ’’ڈِنگ ڈانگ‘‘ تھئی۔ فضل حسین دروازہ کھولیا ٻاہروں کمرے دے ہک پلمبر کھڑا ہا جیندے ہتھ اِچ سندریں دا جھولا ہا۔ پلمبر آکھیا سر پاݨی ٹھیک کرݨے۔ پلمبر سِدھا باتھ روم وَڑ ڳیا تے ہک لحظے کنوں پہلے واپس وَل آیا۔ اُوں فضل حسین کوں آکھیا سر پانی ٹھیک ہے۔ ٹھنڈا بھی ہے اور گرم بھی ہے۔فضل حسین آکھیا میکوں چیک کرا۔پلمبر بطخ دی ڳچی والی ٹوٹی کوں اُتوں تے کیتا وَل سڄے کیتا تاں ٹھڈا پاݨی تے کھٻے کیتا تاں گرم پاݨی۔ فضل حسین اندرہی اندر کاݨا تھیا تے نال ہی پلمبر کو ں آکھیا تھوڑی دیر پہلے میرا دوست آیا تھا وہ کہہ رہا تھا کہ پانی نہیں ہے۔ پلمبر شکریہ آکھ تے چلیا ڳیا۔
شام ساڑھے سَت وڄے پوری کمپنی دے بندیئیں دا تلے ڈائنگ ہال وچ کھاݨا ہا۔فضل حسین ساڈھے چھی وڄے تیار تھی ڈائنگ ہال وچ پُڄ ڳیا۔ہال وچ پنج ست ویٹر ودے ہن۔ چار چار چھی چھی کرسیاںتے میزیں دے کئی سیٹ لڳے پئے ہن۔ ہال دے سڄے پاسوں کوئی چالہی توں زیادہ کھاݨیں دے تاسلے نظر آندے پئے ہن۔ ترئے پاسوں وݙے وݙے شیشے دے وچوں ٻاہروں دے نظارے رونقاں بݨائی کھڑے ہن۔ فضل حسین شروع شروع دی ہک کرسی مَل ٻیٹھا۔ دل وچ ایہو خیال جو ست وڄے تک سارے لوک آویسن۔ وَل ویٹر پُچھسی کیا کیا کھاوݨے۔ آڈر ݙتا ویسی تے وَل کھاݨا شروع تھی ویسی۔ٹھیک ست وڄے ہک پورا بندیاں دا جتھا ہال ݙو اَمدا نظر آیا۔ملٹی نیشنل کمپنی وچ ٹائم دی ایں پابندی ہوندی ہے جو گھڑیاں ملا گھِنو۔
ایہ لوک آوݨ سیت وݙیاں پلیٹاں چیندے تے ہک سِروں سالن پاوݨ لڳ پئے ۔ پلیٹیں تے چمچیں دی ٹھک ٹھک شروع تھی ڳئی ۔ بندے آپس اِچ کھلدے ٹھکارے مریندے پئے ہن۔فضل حسین دے تجربے و چ بوفے سسٹم کائنا ہا۔ ایں واسطے اُوں ایں ڳالھ کوں ہک عیب ڄاݨیا جو مردیاں بلائیں آوݨ سیت ٹُکر کوں پئے ڳن۔ اُوندے خیال وچ ایہ ہا جو ہوٹل والے کیا آکھسن جو اِنہاں کوں کھاوݨ دی تمیز ہی کائنی؟
سارے لوک پلیٹیں وچ کھاݨا پا تے ہال اِچ کرسئییں تے ٻاہندے ڳئے۔فضل حسین کوں سمجھ نہ آئی جو اُو ٹُکر چاوݨ دی اے جِتی بدتمیزی کیویں کرے۔اُوں کنوں کوئی پُچھݨ وی نہ آیا۔سب توں پہلے آئے ہوئے بندے کوں حالی تک خالی ٻیٹھا ہویا ݙیکھ تے ہک ویٹر فضل حسین ݙو وَدھ آیا۔فائیو سٹار ہوٹل دے بیرے تربیت یافتہ ہوندن اُو پچھاݨ ڳئے ایہہ کوئی نواں بندہ ہے جینکوں بوفے سسٹم دا پتہ کائنی۔ اوں فضل حسین کنوں پُچھا سَر کھانا تساں آپ گھِن آسو یا میں جناب کیتے گھِن آواں؟ایں طرحاں پُچھ تے اُوں فضل حسین کوں کاݨا نہ کیتا۔ فضل حسین کوں پتہ لڳ ڳیا جو اِتھاں آپ کھاݨا پا آوݨ قانونی ہے۔فضل حسین ڳا لھ کوں سنبھالیا تے جواب ݙتُس جو اُو ہک دوست دی انتظار اِچ ٻیٹھے ۔ جیڑھیلے او دوست آسی اُوہ کھاݨا خود گھِن آسی۔
دوست تاں کائنا آوݨا ہا ایں طرحاں اتنی دیر او انتظار کیویں کرے ہا۔ اُو پھَس ڳیا۔فضل حسین ویٹر کوں تاڑی رکھیا جو اُو کہیں پاسے کنڈ کرے تے فضل حسین خود ٹُکر چا آوے۔ جیویں موقع ملیا فضل حسین ٹُکروالے پاسے ڳیا تے وݙی پلیٹ ہتھ پاتی تے کھاݨا پاوݨ شروع کر ݙتا۔ فضل حسین پلیٹ اِچ ترئے وݙے چمچے پُلا ہ دے پاتے ، قورمے دیاں پنج ست ٻوٹیاں ،سیخ کباب ، شامی کباب ترئے اُٻلے انڈے، ہک ہک پادیاں ݙو مچھی دیاں ٻیریاں منڈ ݙتیاں۔پلیٹ اینجھی سوہݨی سَجھ ڳئی جینویں سونے دی جھاری۔ پلیٹ اُتوں گنبد بݨ ڳئی۔اُوندے دل اِچ ایہ کھُت کھُت ہئی جو ہک حاضری وچ ہک دفعہ پویندے۔ ہوسٹل دے تجربے وچ ݙوجھی واری تے ݙو حاضریاں لگدِن۔اُونکوں ݙر ہا جو ݙوجھی واری پاوݨ نال کمپنی کتھاہیں نوکری کنوں نہ کڈھ ݙیوے۔ایں واسطے پہلی واری جتنا پا سڳدے ہو پاوئو۔پلیٹ وچ کوئی گنجائش نہ رہی تاں فضل حسین کوں ہݨ کہیں کُرسی دی طرف ونڄݨا ہا۔ اُونکوں ٹُرݨ مسئلہ بݨیا جو جُتی دا کوئی کوکا قالین دے نال نہ اَڑے۔جے اَڑ پیا تاں کم از کم ڈھاہݨ توں بعد ݙو مرلے جاہ ضرور ملیسی۔ایں واسطے او دلہن دی طرح ہولے ہولے ہال وچ ٹُر کے دور ہک پاسوں پئی کرسی تے ونڄ ٻیٹھا۔ بندیاں والے پاسے کنڈ تے دیوار وچ مونہہ۔ سڄے پاسوں ہال دے شیشے وچوں ٻاہروں دے نظارے نظر اَمدے پئے ہن۔ صحیح سلامت پُڄ ونڄݨ تے فضل حسین شکر ادا کیتا۔ چولے دے ٻانہیں چڑھا تے کھاوݨ شروع کیتا ۔ ویٹر آیا ، میز تے رکھیے ہک پُٹھے گلاس کوں سِدھا کیتا تے جگ نال پاݨی پا تے واپس چلا ڳیا۔فضل حسین چھری کانٹا چاتا چَس نہ آئی۔ ہتھ نال کھاوݨ شروع کر ݙتا۔ پنج چھی لَپے ماریے ہوسن تے کیا ݙیدھے جو بیگ صیب اپݨی پلیٹ ہتھ اِچ پا کے اُوں ݙو اَمدا پئے۔نال آلی کرسی تے آ کے بیگ صیب ٻہہ ڳئے۔میز تے اُوں اپݨی پلیٹ رکھی ، پلیٹ دے وچ ہک ٻوٹی تھورا جیہاں شورواں ، ذرا ہک سلادتے نان دا چوتھا حصہ لاتھے ہن۔ بیگ صیب آکھیا:فضل حسین توں کلہا ٻیٹھا ہاویں تیکوں میں کمپنی ݙیوݨ آیاہاں۔ فضل حسین اندروں سڑ ڳیا ہا جو اے ایں ویلے تاں نہ آوے ہا۔ اینکوں ݙاہ منٹ لیٹ تھیوݨا چاہیدا ہا۔میں تاں لیٹ کڈھݨی ہئی۔ کیوں جو ٻے بندے آدھل کنوں وی ڈھیر کھادی ٻیٹھے ہَن۔فضل حسین دے دل اِچ خیال آیا جو بیگ صیب انویں تاں چست آدمی ہے مگر اوندی پلیٹ کنوں پتہ لڳدے جو بیگ صیب بیمار ہے یا شوگر ہِس یا معدہ خراب رہ ویندے۔فضل حسین کوں بیگ صیب دی وجہ توں چھری کانٹا وَلا چاوݨا پئے ڳیا ہئی۔پلیٹ وِچ ٻوٹیاں ساریاں چاولیں دے اُتو ں لاتھیاں ہَن۔ چھری نال جیڑھی ٻوٹی کوں کپے اُو نہ کپیجے کیوں جو پُلاہ دا کچا بھراں ہا۔ تلوں پک ہوندا تاں ٻوتی کپیندی۔فضل حسین وَل انڈے والے پاسے آڳیا۔ ہک انڈے کوں چھری نال کپیا ذرا ہتھ لُݙیا تاں مچھی دا ٻیرا تلے میز تے ونڄ پیا۔ ہݨ مچھی دے ٻیرے کوں فضل حسین کانٹے نال نہ چا سڳدا ہا۔اونکوں پتہ ہا کانٹے دے نال چاوݨ نال مچھی دا ٻیرا میز تے کھِنڈ ویسی۔ ایں واسطے اُوں مچھی دے ٻیرے کوں ہتھ نال چا تے پلیٹ اِچ رکھیا۔ بیگ صیب ایہ تماشہ ݙیکھ تے کھِل پیا۔بیگ صیب فضل حسین کوں آکھیا آپ دو دفعہ لے آتے ۔ فضل حسین دل وچ سوچا جو ݙوجھی دفعہ گھِن آوݨ دی اجازت مل ڳئی ہے۔ ایندا مطلب اے ݙوجھی حاضری نہ لڳسی۔ بیگ صیب کوں جواب ݙتا سَر آئندہ ایسے کروں گا جیسے آپ نے فرمایا۔ بیگ صیب سیاݨا ہا اُون ٻال کوں ایں حالات وچ پھسیا ݙیکھ تے اُتھوں اُٹھی پیا۔فضل حسین شکر پڑھیا جو افسر دا دورہ مکمل تھی ڳئے۔ہُݨ اُوں موقع ڄاݨ تے پلیٹ دی آدھی وچوں مال ایویں صاف کیتا جینویں نائی ٻال دے سِر دی آدھی وچوں مشین پھریندے۔ یا وَت کاشتکار جینویں کݨک دا ایکڑ کپیندے۔وَل اُوں پلیٹ صاف کیتی تے پلیٹ ہتھ وچ پاتی تے ݙوجھی واری گھِنݨ واسطے کھاݨئیںا والے پاسے ٹُر پیا۔ او ݙوجھی پلیٹ وی کھا ڳیا۔ ایں دوران باقی سارے بندے کھاݨاکھا کے چلیے ڳئے۔ او چھیکڑی بندہ ہا جیڑھا ہال وچوں نِکھتا ہا۔ تھوڑی دیر او گراسی پلاٹ تے کلہا پھردا رہ ڳیا۔ ݙو چار ݙکار آئے ، روٹی ہضم۔
رات کمرے اِچ گزاری سویرے ست وڄے ناشتہ وَل اُوں ہال وچ ہا۔ ناشتے نال وی اُوں ایویں کیتا جینویں کل شام دے ٹُکر نال ۔ݙوپہر وَل اُتھاہیں تے شام کوں باربی کیو آلے پاسے ہک لان وچ ٹُکر ہا۔ ایویں کمپنی دے ݙو سیشن روز لگدے ہن۔ جیندے وچ پورے سال دی پچھلی کار کردگی اڳلے سال دی منصوبہ بندی توں علاوہ کئی نویں معلوماتی سیشن تے ٹریننگ پروگرام وچ شامل رہ ڳئے ہَن۔ تریجھے چوتھے ݙینہہ دا ناشتہ صرف ݙو انڈیاں تئیں وَل ٻچا۔ گھٹدیں گھٹدیں پنجویں ݙینہہ دے ݙوپہریں دا ٹُکر ٻہوں ہی نفیس تھی ڳیا ہا تے چھیویں ݙینہوارفضل حسین دی پلیٹ اتنا وَل بچی جینویں پہلے ݙینہہ بیگ صیب دی پلیٹ ہئی۔فضل حسین کوں خیال آیا جو بیگ صیب بیمار نہ ہا۔
٭٭٭
حوالہ
[لکھو | ماخذ وچ تبدیلی کرو]کتاب: وتر ساخ (سرائیکی کہاݨیاں) ، مصنف : عبداللطیف بھٹی، ناشر: جھوک پبلشرز ،ملتان