بینژن منیثرہ
شاہنامہ فردوسی دی مشہور عشقیہ داستان بینژن منیثرہ کوں سرائیکی زبان وچ کروڑ لعل عیسن مظفر ڳڑھ دے شاعر سید باغ شاہ قریشی 1880ء؍1298ء وچ مکمل کیتا۔(185)۔ سید باغ شاہ ہک وݙے عالم دین تے قادر الکلام شاعر ہن۔ انھاں دے علاوہ تحصیل علی پور مظفر ڳڑھ دے مشہور شاعر مولوی اللہ بخش جانباز وی ایں عشقیہ قصے کوں نظم دا ویس پوایا۔ مولوی اللہ بخش جانباز دی مثنوی بینژن منیثرہ وچوں ہک ونکی:
عاشق تے معشوق جݙاں بیدار تھئے خوش خوابوں
آن کنیز حمام تپایا مشک عبیر گلابوں
دھوون نئی بینژن دے اعضا خادم ململ صابوں
بعد ازاں پوشاک پواون تار جڑی زرتابوں
کنچیاں کنچندیاں آیا نور بھریاں مہتابوں
تاب کہیں مہتاب کوں تنہاں تاب ڳئی افتابوں
پا پشواز آواز کرݨ پئے ساز وڄن ہر بابوں
تن تن توم تنن تن چھݨ چھݨ ہوش کھسن اربابوں
ناچے ڳاوت باجے باجت ہک ٻئے نال خطابوں
تارا تے نت مارن تاڑی چٹکی عجب حسابوں
سارنگی سارنگ کنوں بم زیر وجے مضرابوں
طبلے طبلک تھاپ لڳی دھم دھام اٹھی مضرابوں
نوچیاں نچ نچ ناچ کتیا نچ ناچ کرݨ دل قابوں
کھا پھیری تھی ڈھیری ویندیاں دل گھیری اصحابوں
حوالہ
[لکھو | ماخذ وچ تبدیلی کرو]کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان