بہاول پور بھون دے صدر شیخ سبھاش متریجہ دے گھر نرھان

تِھتھ موجب22؍اگست کوں چھݨ چھݨ وار ہا اَتے بہاول پور بھون دے صدر شیخ سبھاش متریجہ دے گھر نِرھان ہا۔ شیخ سبھاش دا تعلق بہاول پور نال ہے ۔ تقریباً اَٹھ وڄے شیخ سُبھاش اپݨی گݙی تے بھون پُڄ ڳئے ۔ واری واری ساکوں گݙی اِچ بھر کے گھر پُچایا ۔ اُنہاں دا گھر نویں دِلّی دے علاقے پُراݨے راجندر نگر وچ ہے ۔ ایہ اپݨے وقت دی نویں اَبادی ہئی جتھاں آوݨ آلے مہاجراں کوں آباد کیتا ڳیا ہا ۔ اُنہاں دا گھر ایں ویلے ترائے منزلہ ہے ۔ اُنہاں دے چار پُتر اِتھاں رہندن ۔ او کاروبار کریندن ‘ کم چنڳاں چلدا پئے ۔ شیخ سُبھاش متریجا ݙسیا جو او ترے سال دے ہَن جݙاں پاکستان وچوں اُنہاں لݙا کیتا ۔ سارے گھر آلے اِتھاں آندے پئے ہَن ۔ پر اوہ روندے آندے ہَن جو اُنہاں دا کھݙاوݨاں گھر آلے نال نہ چا آئے ہَن ۔ بیگم سُبھاش دا تعلق وی بہاول پور نال ہے۔

اُنہاں دی بیگم شری متی سبھاشی دروازے اُتّے ساݙا سواگت کیتا ۔ اُنہاں دی نونہہ وی ساکوں مِلݨ آئی ۔ اُنہاں دی بیگم سرائیکی ٻلیندی ہئی پر ٻال پُتر تے نونہاں سرائیکی سمجھدے ہَن ٻلیندے نہ ہَن ۔ اُنہاں دے ہم زُلف ؍سانڈھو ورما جی وی آئے ہوئے ہَن ۔ سارے گھر آلے ٻہوں محبت نال ملے ۔ سُبھاش جی دے گھر نِرھان وچ دال مُنگ ہَن ۔ موٹھ دی دال ہئی ۔ پُوریاں ہَن ۔ ایہ پُراݨاں روایتی قسم دا نِرھان ہا ۔ کھا کے مزا آ ڳیا ۔ ڈاکٹر راج کمار ملک وی آ ڳئے ہَن اوہ وی بھون توں ساݙے نال آئے ہَن ۔ اوہ وی نِرھان کھاوݨ وچ شریک ہَن۔

حوالہ

کتاب: دِلّی ڈھائی کوہ۔ مصنف شوکت مغل، چھپیندڑ: جھوک پبلشرز ‘ ملتان