بہاول پور بھون؍بہاول پور محل

پاکستان دی ریاست بہاول پور دے مختلف علاقیاں توں آئے ہوئے ہندو مہاجراں ایہ بھون اپݨی مدد آپ دے تحت دِلّی وچ بݨائے ۔ ایہ بھون 1985ء وچ قائم کیتا ڳیا ۔ ایں بھون کیتے ہک سوسائٹی رجسٹر کرائی ڳئی ۔ جیکوں اَکِھل بھارتیہ بہاول پور اسٹیٹ پنچایت رجسٹرڈ آکھیا ویندے ۔ ایندے ممبران دی ڳنتری پنج ہزار ہے ۔ ورکنگ کمیٹی دے 125ممبر ہن ۔ ایہ بھون پرشاد نگر نئی دِلّی وچ واقع ہے ۔ ترے منزلہ عمارت ہے ۔ ایندا پیٹرن چیف نواب صلاح الدین خان عباسی (پاکستانی) ہے جیندا تعلق بہاول پور نال ہے ۔ نواب صلاح الدین عباسی ایں بھون کیتے سوا لکھ روپے دان کیتے اوہ ہک واری ایں بھون اِچ اَئے ہَن اَتے انہاں کوں پیٹرن چیف دا نواں عہدہ پیش کیتا ڳیا ہے۔

چیف پیٹرن دی تعداد250ہے ۔ پیٹرن 1200ہِن ۔ پیٹرن چیف11ہن۔

پیٹرن چیف     11                                        1:25لکھ روپے فی کس ݙتے

چیف پیٹرن     250                              1لکھ روپے فی کس ݙتے

پیٹرن                                                                           1200                          50ہزار روپے فی کس ݙتے

ورکنگ کمیٹی ممبران                 125                                5ہزار روپے فی کس ݙتے

عام ممبران     5000                        ہک ہزار روپے فی کس ݙتے

ہر ݙو سال بعد عام اجلاس وچ عہدیداراں داانتخاب کیتا ویندے ۔ 2008-10ء کیتے ایندی ایگزیکٹو کمیٹی دے عہدیدار ایہ ہِن:

صدر :                                                                           شیخ سُبھاش مُتریجہ

نائب صدور: 1:شیخ لکشمی نرائن سچ دیو

  2:شیخ ایل ۔ کے جگیہّ

3:شیخ ایل ۔ کے سیٹھ

4:شری متی ریشم مہتہ

جنرل سیکرٹری:                                         شیخ رکیش کُمار دُریجہ

سیکرٹری فنانس:                                     شیخ ٹھکّر داس

سیکرٹری ایڈمن:                                   شیخ ہربنس اروڑا

اِنہاں دے علاوہ سیکرٹری آرگنائزیشن شیخ پردیپ مہتہ ‘ جوائنٹ سیکرٹری شیخ سُنیر متریجہ ہن۔ بھون دیاں کار گزاریاں بارے ہک رسالہ وی نِکلدے جیندی ایڈیٹر آشا مُتریجہ  ہِن تے معاون ایڈیٹر سُبھاشنی ہن۔ ایہ سُبھاش متریجہ دے گھر دے بندے ہن۔

بہاول پور بھون کیتے زمین سرکار ݙتی ہئی اَتے ممبراں دے تعاون نال ایکوں اُساریا ڳیا ہے۔ ایں بھون دی عمارت ترے منزلہ ہے گرائونڈ فلور تے وݙا ہال ہے ۔ پہلی تے ݙوجھی منزل تے چار چار کمرے تے غسل خانے ہِن۔ کمریاں وچ بیڈ ‘ صوفے لڳے ہوئے ہِن ۔ بھون دا مونڈھی مقصد بہاول پور دے لوکاں دی خذمت ہے ۔ ایں بھون وچ سرپرستاں دا ݙینہ ‘ سپورٹس دا ݙینہ ‘ طالب علماں دا ݙینہ ‘ ممبران دا ݙینہ الڳ الڳ منایا ویندے ۔ بیماراں تے مریضاں کیتے ہسپتالاں دے خرچے بھون دی طرفوں ادا کیتے ویندن ۔ ایں بھون دی خذمات ݙیکھ کے ساݙے ڈیلیگیٹ پنج ہزار روپے بھون کوں دان کیتے ۔ جہڑے اُنہاں شکریے نال قبول کیتے ۔ بہاول پور توں اَئے لوکاں کیتے ایہ فلاحی تنظیم سپورٹس وی کرویندی ہے ۔ امتحان وچ اوّل آوݨ آلے طالبان کوں انعام ݙیندی تے سرائیکی زبان دے ودھارے کیتے وی لوکاں نال رَل ٻہندی ہے ۔ اخراجات آپس دی امداد نال چلائے ویندن۔

بہاول پور بھون اِچ آمد

سالانہ رپورٹ مطابق سال 2007ء کنوں 2009ء تئیں ممبراں 3,74,372/-روپے بطور امداد بھون کوں ݙتن۔

ڈاکٹرراج کمار ملک نال اساں بھون دی عمارت اِچ پُڄ ڳیوسے۔ مین گیٹ اُتّے بھون دے ممبراں تے عہدیداراں ساݙا سواگت کیتا۔ ساکوں ہار پوائے جنہاں کوں اوہ’’ پُش مالھا ‘‘آہدے ہَن ۔

شیخ سبھاش متریجہ (صدر) شیخ لکشمی نرائن سچ دیو (نائب صدر) ‘ شیخ رکیش کمار (جنرل سیکرٹری)‘ شیخ ٹھاکر داس (سیکرٹری فنانس)موجود ہَن ۔ تھولی دیر بعد بھون دے سابق صدر او۔ پی۔ مُکھی جی وی آ ڳئے ۔ سب نیں ساکوں ’’جی آیاں کوں ‘‘ آکھیا۔ ٹھڈا پاݨی پیش کیتا ڳیا ۔ وَل بوتلاں تے بسکوٹ آ ڳئے ۔ ہُݨ رات دے اَٹھ وڄ چُکے ہَن ۔ ساݙے کنوں سفر دا حال ‘ بہاول پور دا حال چاتا ڳیا ۔ اِتّی دیر وچ رات دا کھاݨاں آ ڳیا ۔ سارے سنگتیاں ‘بھون دے ممبراںتے عہدیداراں ساݙے نال رَل کے کھاݨاں کھادا۔ ایندے بعد پاکستان دے ہندوستان وچکار سرائیکی زبان دے ڳانڈھیاں بارے ڳالھیں تھیاں۔ کھاݨے کنوں پہلے ڈاکٹر راج کمار ملک سئیں موکل گھن کے چلے ڳئے اَتے اڳلے ݙینہ نؤں وڄے سویلے آوݨ دا آکھ ڳے ۔ ڳالھیں ڳالھیں وچ رات دے یارھاں وڄ ڳے ۔ ساݙے خاطر دار وی گھر ونڄݨ لئوں تیار ہَن ۔ اساں وی تھک ڳئے ہاسے۔ سبھ نیں موکل گھدّی اَتے اَپݨے کمریاں وچ اَرام کرݨ چلے ڳیوسے۔

حوالہ

کتاب: دِلّی ڈھائی کوہ۔ مصنف شوکت مغل، چھپیندڑ: جھوک پبلشرز ‘ ملتان