بہاول نگر

بہاولنگر دا ناں نواب بہاول خاں دے ناں تے ایویں چھوٹے چھوٹے شہراں دے ناں جیویں ترنڈہ سوائے خاں ، سوائے خان عباسی، کوٹ سمابہ ، سمابہ خاں عباسی، سہجہ ، سہجہ خان عباسی دے ناں تے ݙسیے ویندن ، ایویں ریاست بہاولپور دے اکثر شہر والیان ریاست یا خاندان عباسی دے ناں تے ہِن۔

بہاول پور ڈویژن دا ہک ضلع ہے۔ 1953ء اچ ضلع دی حیثیت ݙتی ڳئی۔ ایندے شمال اچ ضلع ساہیوال ، مشرق اچ فیروز پور (بھارت )جنوب اچ بیکانیر(بھارت) تے مغرب اچ ضلع بہاول پور واقع ہے ۔ بھارت دی سرحد شہر بہاول نگر توں صرف ݙاہ میل دے فاصلے تے ہے۔ اے ضلع پنج تحصیلاں تے مشتمل ہے۔ بہاول نگر، منچن آباد ، چشتیاں ،ہارون آباد، تے فورٹ عباس ۔ ضلع دا رقبہ 3428مربع میل تے آبادی 13لکھ 71ہزار ہے۔ دریائے ستلج ضلع دی اراضی کوں سیراب کریندے ۔ کݨڑک ، چاول ، گنا، کپاہ ، امب ، کیلا ، امرود ایں ضلع دیاں اہم زرعی پیداواراں ہن۔

شہر بہاول نگر لاہور توں 193میل جنوب تے بہاول پور توں سو میل مشرق اچ واقع ہے۔ امیر بہاول پور نواب صادق محمد خان عباسی خامس نے اپݨے ابا سئیں نواب محمد بہاول خان خامس دے ناں نال ایں وستی دا ناں بہاول نگر رکھیا ۔اے شہر فورٹ عباس تے میکلوڈگنج کیتے اہم مواصلاتی رابطہ ہے۔ شہر اچ ترائے کالج ست ہائی سکول ،ݙو دینی دارالعلوم تے کئی مڈل تے پرائمری سکول ہن۔بہاول نگر اچ ہُݨ باقاعدہ فوجی چھائونی قائم تھی ڳی ہے۔ سلیمانکی روڈ تے اسپورٹس اسٹیڈیم ہے۔ آبادی دے ودھارے دے نال جدید وستیاں وی آباد تھیاں ہن تے بازاراں دی رونق وی ودھ ڳئی ہے۔ دائود بازار، ہارون بازار تے ریلوے بازار زیادہ اہم تے وݙے ہن زرعی علاقہ ہووݨ دی وجہ نال غلہ ، کپاہ تے تیل دے بیجاں دی وݙی منڈی ہے۔ آبادی 74ہزار ہے۔

حوالہ

کتاب: میݙی دھرتی، میݙے لوک ، مصنف: ظہور احمد دھریجہ ، ناشر: جھوک پبلشرز ، ملتان 2018ء