بہاولپور دربار

بہاولپور دی عظیم خدمات دے پیش نظر علامہ اقبال ریاست بہاولپور دی اسلام تے علم دوستی دی تعریف کیتی ،سرائیکی ریاست بہاولپور کوں اے اعزاز حاصل اے جو ایندی شان وچ علامہ اقبال’’دربار بہاولپور‘‘ دے ناں تے طویل قصیدہ لکھیا۔

تفصیل ایویں ہے جو 1903ء وچ جشن تاج پوشی تقریب وچ وائسرائے ہند، والیان ریاست ہائے متحد ہندوستان تے پوری دنیاں وچوں اکابر آئے ہوئے ہن۔ علامہ اقبال کوں وی ایں کٹھ وچ شریک تھیوݨ دی دعوت ہئی ، علامہ اقبال آوݨ دی اطلاع بھیجی تے آکھیا ہا جو او ایں موقع تے قصیدہ پڑھسن پر کہیں وجہ توں او نہ آ سڳیے پر دربار بہاولپور دے ناں تے قصیدہ لکھیا جو کتاب باقیات اقبال وچ درج ہے قصیدے دا رنگ ݙیکھو، ایندے وچ بہشت بریں وانگے سوہݨی تے من موہݨی سرائیکی دھرتی دی تصویر کشی کیتی ڳی اے ۔ پنجاب بارے ’’ہیں اہل نظر کشور پنجاب سے بیزار‘‘ آکھݨ آلے علامہ اقبال سرائیکی سلطنت اَتے ایں زمین دی کتنی تعریف کیتی اے ؟ ایہا ساری گاٖلھ سوچ وچار ، غور و فکر اَتے سݨݨ سمجھݨ نال تعلق رکھیندی اے ، علامہ اقبال دی اے وی عظمت اے جو انہاں ایں طویل قصیدے وچ نواب بہاولپور کوں اے وی آکھیے جو ’’بادشاہواں دی عبادت ہے، رعیت پروری ‘‘اتھوں اندازہ تھیندے جو علامہ اقبال قصیدے وچ نصیحت تے ہدایت دے پہلو کوں نظر انداز نی کیتا۔ ایہا انہاں دی وݙائی اے ۔

حوالہ

کتاب: میݙی دھرتی، میݙے لوک ، مصنف: ظہور احمد دھریجہ ، ناشر: جھوک پبلشرز ، ملتان 2018ء