Jump to content

بھیݙوے اَکھاݨ

وکیپیڈیا توں

بھیݙ(بھیڑ) ساڈٖی وَسُوں دَا ٻہوں مشوم، اللہ راہسی، ہیݨا تے بھولا بھالا زناور ہے. بھیݙ دے ناں نال کئی اَکھاݨ وی مشہور ہن جنہاں وچ بھیݙ کوں بطور تشبیہہ تے استعارہ بݨاکے بزدلی، ہیݨے پن(کمزوری)، کمزور دلی دے میہݨے(طعنے) ݙتے ویندن تے اُوکوں بھیݙ اوئے، بھیݙا مال آکھ کے چِڑایا ویندے۔مثلاً ہٹھے ویلھے رووݨ دھووݨ، چیکݨ ٻاکݨ آلے بندے یا بندی کوں بھیݙ وانگوں ہیݨا، بھیݙ دے مُونہ آلا، ماسی بھیݙ، لِمُلّ بھیݙ، بھیݙ مسات سڈٖ ا ویندے۔

سرائیکی وَسُوں اِچ کُجھ بھیݙوے اَکھاݨ ٻہوں مشہور ہن۔

1۔ بھیݙ بُڈٖ موئی تے مینگݨی تر آئی .

ترجمہ: جہڑی اصل تے اہم چیز ہائی او ٻُݙ ڳئی، ڳم تھی ڳئی تے غیر اہم چیز مل ڳئی۔

2۔ بھیݙ دا پُوچھل پکڑِیا، اُروار وَیسی نہ پار.

ترجمہ: بھیݙ دی پوچھ پکڑݨ آلا، ہیݨے دا سہارا پکڑ تے ٹُرݨ آلاا نہ اُروار (تھل) وچ راہسی نہ دریا پار(دامان) ویسی۔۔ یعنی ایہو جیہے بندے کوں مزل کڈاہیں نئیں ملدی جہڑا ٻیاں دے سہارے ٹُرے۔ سرائیکی وچ ایندے معنی وچ ہک ٻیا اکھاݨ وی ہے۔ آپݨی تڈٖ تے ٹھِلو، اُروار ون٘ڄو یا پار(آپݨی طاقت، آپݨے بھروسے تے ترݨ آلا انسان دریا کوں پار کر گھندا ہے بھان٘ویں تھل ون٘ڄے یا دامان)

3۔ بھیݙ سستی ہووے تاں لوک پُوچھل چا چا ݙیہدِن۔

ترجمہ: سستی شئے خریدݨ ویلے لوک ول ول سوچیندے ہن۔ (احتیاط کرہندے ہن)

4۔ بھیݙ کُوں ہر کوئی مُنیندے .

ترجمہ: غریب، کمزور انسان کوں ہر کوئی لُوٹیندا ہے، دوکھا ݙیندا ہے۔

5۔ ایہ بھیݙا مال ہے۔

ترجمہ: ایہ کمزور دل، بزدل قسم دا انسان ہے۔

6۔ بھیݙاں ڈَھک کے سُتّا پئے .

ترجمہ:نقصان دے باوجود بے فکرا سُتا پیا ہے۔

7۔بھیݙ مشُوق تے کُتا عاشق۔وِچ ڳڈٖونہہ وکیل سماݨاں

بھیݙ ڳئی وڑھ دے اندر۔ڳڈونہہ بھرا جرماݨاں .

ترجمہ: بھیڑ کتے دی معشوق بݨی، ہک ݙین٘ہ بھیݙ کہیں نیڑے دی رڑھ وچ وڑ ڳئی تاں ڳݙونہہ(کھرکے،کھوتے) وکیل بݨ تے آپݨی جیب وچوں جرمانہ ادا کیتا۔(گھٹیا دے طلبگار ہمیشہ گھٹیا ہوندے ہن)۔ادنیٰ دی دوستی ادنیٰ نال ہی ہوندی ہے۔

8۔ بھیݙاں وچ بِھگاڑ پِیا

آجڑی کُوں ہنگݨ آیا

ترجمہ: بھیݙاں دےاَیَّڑ تے جہڑے ویلے نہر حملہ کیتا تاں آجڑی(چرواہا) بھیݙاں کوں بچاوݨ دی بجائے پیشاب دا بہانہ بݨا تے بھڄ ڳیا۔یعنی ڄݙݨ کمزوراں تے مصیبت آندی ہے تاں اُنہاں ہیݨیاں دا محافظ ڈٹݨ تے لڑݨ دی بجائے بہانے بݨا تے بھڄ ویندے۔

عباس سیال