بچت کرݨ دا اسلامی طریقہ

اَکھیندن! ݙسیندن جو اسیݙا ملک ایں قرضائیں اے جو اِتھاں رہݨ تے وَسݨ آلے ہر بندے دا ٻچے ٻچے دا وال وال قرضے اِچ جکڑیا ہویا اے ‘ پاکستان دی  حکومت کوں ’’قرضیں‘‘ تے چڑھݨ آلے ’’سود‘‘ دی قسط بھرݨ کیتے وی ہر سال نویں سروں نواں قرضہ گھݨاں پَمدے ۔ غریب کوں رَڄ تے پیٹ بھرݨ کیتے ݙوں ویلھے دی روٹی نی لبھدی ۔اَپݨا تے اَپݨے ٻال ٻچیں دا سِرلُکاوَݨ کیتے جھوپڑا تے گریڑہ نی لبھدا ۔ بُت کڄݨ کیتے لوڑ موجب کپرا نی لبھدا ۔ بیمار تھی پووے تاں دوا  دارو کرݨ کیتے پلّے پیسہ کینسی  ہوندا ۔ ٻالیں کوں پڑھاوݨ دا خرچہ او نی بھر سڳدا غریب دا ٻال کشالے کٹ کرائیں ۔ بھوڳ بھوڳ تے پڑھ لکھ اِی ونڄے تاں اونکوں اَپݨی ڈگری تے وقعت موجب نوکری نی مِلدی ۔ بے روزگار تھی دَر دَر دَھکے کھمدے ۔

ݙوجھے پاسے اَپݨے ہِیں ملک اِچ رَہݨ آلے ڳینڑویں چوݨویں لوک ایجھے وِی ہِن جنہیں دی جائیدادیں اَتے دھن دولت دا کوئی اَنت کائنی انہیں کوں اَتے اِنہیں دی آل اولاد کوں دُنیاں جہان دا ہر آرام ‘ ہر عیش اَتے ہر سہولت مِلدی اے ۔ انہیں دی اولاد کیتے اعلیٰ درجے دے سکول اَتے کالج اَنج اِن ۔ امریکہ ‘ برطانیہ ‘ فرانس تے ٻنہیں ملکیں دے مہانگے کنوں مہانگے سکولیں‘ کالجیں اَتے یونیورسٹیں اِچ پڑھاوݨ دے خرچے بھرݨ انہیں کیتے کوئی وݙی ڳالھ کائنی ۔ ایہ آپ یا انہیں دی لُونج پَلونج اِچوں کوئی بیمار تھی ونڄے تاں علاج کیتے وَݙیاں وَݙیاں ہسپتالاں تے وَݙے وَݙے ݙاکدار ہِن پے ۔ انہیں اِچوں اکثرہ ایجھے اِن جو ’’نِچھ‘‘ آ ونڄنے تاں علاج کراوݨ کیتے کہیں ٻاہرلے ملک روانہ تھی ویندن ۔ اسیݙے حاکم ‘ سیاستدان ہوون بھانویں اَفسر اُنہیں اِچوں ہِن جنھیں دے سبھے خرچے ہک لیکھے ڈھل ‘ مطالبے ‘ ݙنڈ تے سِدھی نیت نال ٹیکس بھرݨ آلا غریب بھریندے ‘ ایں ملک دا غریب اَتے سفید پوش اَپݨا ٹُکر پاݨی کر کرائیں ’’سرکاری خزانے‘‘ دا ڈھڈھ بھریندے اَتے ہِیں ملک دے ایہے لاݙلے حاکم سرکار دے کھاتے اِچوں سبھے خرچے کریندن ۔ ایئیں ڄاݨ ایہ  اسیݙے اُتے ہر لیکھے حکومت کرݨ اَتے حکم چلاوݨ دی وی اساں کنوں ڈِھل اُڳڑیندن ۔ جنرل ضیاء دے وزیر خزانہ ڈاکٹر محبوب الحق ہک واری اسمبلی اِچ آکھیا ہا جو پاکستان دے افسر ہر سال سرکاری کھاتیں اِچوں چالھی ارب روپے دی رقم غبن کر تے پَچا ویندن ۔ ہک ہک افسر اَتے اہلکار اپݨی اَپݨی جھاہ تے لوکیں کنوں اَپݨے اختیار دے زور تے جیرھی وَڈھی کھمدے اوندا تاں تھڄوں کوئی لیکھا اِی کائنی ۔

نیک پاک سݙواوݨ آلے اَتے ݙینھ  رات اسلام اسلام دی تسبیح پھیرݨ آلے سیاستدانیں بینکیں کنوں اربیں روپیں دے قرضے گھدے تے وَل معاف کرا گھدے ۔ اَپݨی ہِیں لُٹ پُھر تے پردہ پاوݨ دی خاطر ’’آئین‘‘ اِچ ایہ شِق رکھوایونے جو بینک آلے انہیں دے ناں وی نی ݙسا سڳدے ۔ پیپلز پارٹی دی حکومت ہِیں قانون کوں بدلاوَݨ دا چارہ کریندی پی ہئی ۔ تاں اوندا لیکھا اِی مُکا چھوڑیونے ‘ ہُݨ تاں آپ اِی آپ اِن ۔ کون پُچھدے ۔ اندھی پیٹھا تے کُتیں چَٹیا ۔ ایہ سبھے ہکو کجھ اِن۔

غریب سرائیکی ہووے ‘ سندھی ہووے ‘ بلوچ ہووے ‘ مہاجر ہووے ‘ پنجابی ہووے ‘ پٹھاݨ ہووے اُوندی کوئی بھلی وار کائنی ۔ وزیر اعظم میاں نواز شریف ہوریں آکھیا ہا جو اَساں ہِیں ملک اِچ ہک غریب اِی کائناں رہݨ ݙیسوں ۔ اُنہیں دی حکومت دیں کیتیں کرتیں کنوں اِنویں مَلوم تھیندے جو تھیسے اَڳے پچھے اِئیں ’’قوم‘‘ تے ’’عوام‘‘ کوں ݙینھ رات بچت کرݨ دی نصیحت کرݨ آلے میاںصاحب خود اَپݨے کیتے ’’جرمنی‘‘ کنوںہُݨ ݙوں موٹر کاراں منگوائین ۔ اُنہیں اِچوں ہک کار دا مُل پوݨے ݙوں کروڑ روپے اے تے ݙوجھی دَا مُل نِوے لکھ روپے اے ۔ ملک محمد قاسم ہوریں دے آکھݨ موجب میاں نواز شریف ہوریں آکھیئے میں اَٹھ کروڑ روپے دَا کالا دھن ’’چِٹا‘‘ کر گھدے۔

ایہ ہِن بچت کرݨ دے ’’اسلامی‘‘ تے ’’جمہوری‘‘ طور طریقے ۔ سوہݨا میݙا۔

حوالہ

ٻٹ کڑاک، مصنف: انیس دین پوری۔ ناشر: جھوک پبلشرز ملتان