بِگ بینگ نظریہ

(کائنات دی ابتدا دا سائنسی نظریہ)

اکثر سائنسدانیں دا ایںڳالھ تے اتفاق اے جو کائنات دا آغاز تقریبا 14 ارب سال پہلے ہک ٻہوں زیادہ گرم تے ٻہوں زیادہ کثیف نقطے کنوں تھئے۔ ایں نقطے اچ گیس تے گرمی دا ٻہوں زیادہ زورہا اے اندر دی طاقت ہئی جیندی وجہ کنوں اے نقطہ ہک عظیم دھماکے نال پھٹ ڳیا تے کائنات تیزی نال پھیلݨ لڳ پئی۔ کائنات دیاں چار بنیادی قوتاں ایں نقطے اچ موجود ہَن۔ ایں نقطے کوں سنگولیریٹی آکھیا ویندے تے ہوں وقت ہیندے وچ کوئی ایٹم، ذرے، سیارے یا تارے موجود نہ ہن۔ زمان و مکان وی ہیں دھماکے دے بعد وجود اچ آئین۔ ٻہوں تھوڑے وقت اچ ٻہوں زیادہ پھیلاؤ تھیا۔ ہک سیکنڈ دے ہک لکھ لکھ کھربویں حصے وچ ساݙی کائنات  1000 کھرب کھرب گنا وݙی تھی ڳئی۔ اے سمجھ گھݨاں چاہیدا ہے جو ہک لمحے دے اندر اندر ساکوں اتنا وݙی کائنات تیار شکل اچ مل ڳئی جیڑھی جو کم از کم ہک کھرب نوری سال چوڑی ہئی۔ اے کم از کم دا اندازہے۔ زیادہ کنوں زیادہ اے کائنات لامحدود اے۔ 

کائنات دے پھیلاؤ دا مطالعہ کرݨ واسطے 1998 اچ کجھ تجربات کیتے ڳئے ہن۔ ہنیں تجربات کنوں پتہ لڳیا جو کائنات دا سب کنوں پرہے والا سپرنووا کجھ زیادہ مدھم ہا۔ ایندا مطلب اے ہا جو تارے اْنہیں فاصلئیں کنوں ٻہوں زیادہ پرہے ہن جنہیں دا اندازہ کیتاڳیا ہا۔ ایں ڳالھ نے سائنسدانیں کوں ٻہوں پریشان کر ݙٖتا، کیونکہ اے سمجھیا ویندا ہا جو کشش ثقل (کائنات دے ݙو جِسمیں دے درمیان کشش دی قوت) صرف کشش دی قوت ہے چونکہ ستارے پرہے کنوں پرہے تھیندے ویندن۔ ایں سانگوں اے کشش کم کنوں کم تھیندی ویندی ہے تہوں کائنات دا پھیلاؤ وی گھٹ کنوں گھٹ ہووݨاںچاہیدا ہے۔ سپرنووا دا مدھم تھیوݨ ایںڳالھ دا ثبوت ہا جو کائنات دے پھیلاؤ دی رفتار گھٹ تھیوݨ دی بجائے ودھدی پئی ہے۔ اے مشاہدہ بگ بینگ نظریے دی صداقت دی دلیل ہے۔

دھماکے دے بعد پہلے 3 منٹ اچ کائنات دا درجہ حرارت 100 ننیلین کیلون کنوں گھٹ تھی کے ہک بلین کیلون تھی ڳیا۔ بنیادی ذرات وجود اچ آ ڳئے تے ہائڈروجن تے ہیلیئم دے ایٹم وی بݨ ڳئے تے مادہ وجود اچ آ ڳیا۔ ایں نظریے دے مطابق کائنات اڄ تک مسلسل پھیلدی پئی اے۔

سائنسدانیں کوں کا  سمک مائیکروویو بیک گراؤنڈ ریڈی ایش [CMDR] دا پتہ لڳیے، اے او لہراں ان جیڑھیاں عظیم دھماکے دے بعد پیدا تھیندین۔ اے لہراں کائنات دے ہر حصے توں اندیاں ہویاں محسوس تھین۔ اے سوچیا ویندے جو انیں لہریں دی وجہ بگ بینگ دا عظیم دھماکہ ہے۔ دھماکے توں پہلے کائنات تے صرف روشنی تے فوٹان دا قبضہ ہا۔ دھماکے دے بعد نواں دور شروع تھیا تے کائنات اچ ہر پاسے مادہ نظر آوݨ لڳ پیا۔ ایں طریقے نال اوں دور دی ابتدا تھئی جیڑھا دور اڄ موجود اے۔ کئی ماہرین اے آہدن جو بگ بینگ ہک کنوں زیادہ وی تھی سڳدن۔ ممکن ہے  جو ازل کنوں کئی ارب بگ بینگ تھئے ہوون تے اساں ہیں دفعہ ہیں وجہ کنوں پیدا تھئے ہوووں جو ساݙی تخلیق ہیں بگ بینگ دی وجہ کنوں ممکن ہئی۔

کولمبیا یونیورسٹی دے استاد ایڈورڈ ٹائرن [EDWARD TRYON]نے ہک دفعہ آکھیا ہا "ساݙی کائنات کیوں بنڑی اے؟ ایندا سادا جواب اے تھی سڳدے جو اینجھیاں چیزاں بنڑدیاں رہ ویندین"۔ ایندے اْتے ایلن گُتھ [ALON GUTH]نے اے آکھیا "ٹائرن شاید اے آکھݨ چاہندے جو کہیں نے اڄ تک ناکام کوششیں کوں کݙاہوں نئیں ڳݨیا"۔ 

ایندے برعکس پروفیسرہرمن بانڈیHERMANN BONDI] [نے سٹیڈی سٹیٹ تھیوری [STEADY STATE THEORY]دا اے نظریہ ݙتا ہا جو کائنات دے مختلف حصیئںاچ مادہ مسلسل بنڑدا پئے او راے مادہ کہکشاں دے نال آویندے اور ہک وݙا دھماکہ تھیندے تے کائنات اچ مادے دے اجزا پھیل ویندن۔ پروفیسر بانڈی دی اے تھیوری بگ بینگ تھیوری دے خلاف اے۔  ڈھیر سارئیںسائنسدانیں ایںنظریے کوں ریجیکٹ کر ݙتے۔  

حوالہ

کتاب: کائنات دا سفر ، مصنف : جعفر عباس بزدار ، ناشر: جھوک پبلشرز ملتان