بُشکا، شوکت مغل
موہری اَکھّر
[لکھو | ماخذ وچ تبدیلی کرو]میݙے سرائیکی مضموناں دا چھیواں مجموعہ تہاݙے سامھݨے ہے ایں کنوں پہلے تلویں پنج مجموعے چھپ چُکن ۔
1:کؤتے کݨوا (سرائیکی) 2: کݨائی (سرائیکی) 3: افادات (اُردو )
4: پچھیرا (سرائیکی) 5: تحریرات(اُردو)
ایں مجموعے وچ کُجھ مضمون ہِن کجھ دیباچے تے کُجھ تبصرے ۔ اِنہاں سب دے موضوعات علمی ہن ۔ اِنھاں وچ تہاکوں کُجھ تحقیق مِلسی تے کجھ تنقید اَتے کُجھ لسانی موضوعات وی ہِن جہڑے سرائیکی زبان دے وکھرپ کوں ظاہر کریندن ۔ مونڈھی مضموناں وچ تُساں کُجھ اوہ مضمون وی ݙیکھسو جنھاں اُتّے اَڄ تئیں کُجھ نھیں لکھیا ڳیا ۔ جیویں سرائیکی دے کجھ سابقے تے توابع تے تابع مہمل وچ لفظاں تے ترکیباں دے جہڑے حوالیاں نال بحث کیتی ڳئی ہے ، ایہ بحث سرائیکی لسانیات دا مطالعہ کرݨ آلیاں کیتے بالکل نویں قسم دی ہے ۔ سرائیکی زبان اُتے لسانی کم ہُݨ چِٹ پدّھر تے آ چُکے جیکوں پڑھ کے ماہرین لسانیات تے تحقیق کار ایں پاسے توجہ کرݨ لڳ ڳئین ۔ تہوں لسانیات دے سرائیکی ماہراں اڳوں میں درخواس کریناں جو زبان کوں اڳوں تے ٹورݨ کیتے نویں نویں موضوعات لبّھن تے سرائیکی زبان دی قدامت کوں ثابت کرِن۔
اِیں مجموعے دا پہلا مضمون جہڑا ٻہوں طویل ہے ، سرائیکی زبان وچ اَکھاݨ دی روایت کوں بیان کریندے ۔ سرائیکی زبان وچ ہزاراں اَکھاݨ چھپ ونجٖݨ دے بعد میݙے نزیک ایں مضمون کوں سامھݨے آنݨ تحقیق کاراں دی لوڑ ہئی جیکوں پورا کیتا ڳئے۔
کتاب وچ موجود دیباچے تے تبصرے کتاباں دے تعارف دے نال نال اِنہاں وچ موجود مواد بارے وی قاری کوں آگاہ کریندِن ۔ اِنہاں مضموناں وچ لسانی تے تنقیدی ݙونہیں پُکھ موجود ہِن۔
اُمید ہے ایہ سارے مضمون سرائیکی طالب علماں ، تحقیق کاراں ، لسانی ماہراں تے ادبی تنقید کاراں کیتے بنیادی مواد مہیا کریسن۔
پڑھݨ آلیاں دے تبصرے میݙے کیتے حوصلے دا سبب ہوسِن۔
جھوک مغل پیپلز کالونی
شوکت مغل
وہاڑی روڈ ، ممتاز آباد ملتان
31؍ جنوری 2015ء
0300-7334657
061-6525692
حوالہ
[لکھو | ماخذ وچ تبدیلی کرو]کتاب: بُشکا, مصنف : شوکت مغل ، چھپیندڑ: جھوک پبلشرز ‘ ملتان