بشیر کھوکھر تونسوی

1940ء تا 2014ء

’’مسعود جھنڈیر لائبریری‘‘اچ بشیر کھوکھر تونسوی دا ہک شعری مجموعہ’’ مٹھڑے بٖول‘‘میݙی نظر توں گزریا جیندے وچوں میں ݙو عدد غزلاں فوٹو کاپی کر گھدیاں ۔ جݙاں جو شاعر دے کوائف تونسہ وچ مقیم اپݨے عزیز ماسٹر عبدالطیف خان دے ذمے لائے ۔بٖس ول ماسٹر صاحب بشیر تونسوی دے ہک فرزند کوں ونجٖ ملئے ، اوں ݙسایا جو انہاں دے والد بزرگوار ہک اچھے شاعر دے علاوہ ریٹائر سکول ٹیچر ہن۔تے آپ 9جنوری2014ء کوں ایں دنیا فانی توں کوچ کر ڳئے ہن۔بہر حال بشیر تونسوی مرحوم اپݨے زمانے دے قادرالکلا م شاعر ہن۔نمونہ کلام پیشِ خدمت ہے۔

(1)غزل

سزا ݙیندیں تاں بے شک ݙے میں ہاں تاں بے خطا سوہݨاں

جو دل آکھے کرو سائیں ہے سب کجھ تاں روا سوہݨاں

قدم کھسکے  پچھوں تے جے وفا تے دوش آ ویسی

اے تن من ہے میݙا حاضر کرو جٖلدی جفا سوہݨاں

ٹھمک چال ہم تیݙی بھاندی ،جݙاں ٹردا ہیں توں ماہی

ذرا مڑ کے ولا ݙیکھو ، پھسا ڳئی ہے ادا سوہݨاں

ذرا چن جھئیں ایں مکھڑے توں اے زلف عنبر ہٹاوو چن

توں کیوں شرما کے چپ تھی ڳئیں ذرا مکھڑا ݙکھا سوہݨاں

پکڑ بٖانہہ جے منیندا ہاں تاں ول ول کے توں رس ویندیں

جے سچ آکھاں تاں رُس پوندیں توں ہیں جو بے وفا سوہݨاں

ݙکی رستہ کھڑا ہاں میںونجٖݨ ڈیساں نہ چن اصلوں

بشیر اپݨے کوں ڳل چا لا ،بہانے نہ بݨا سوہݨاں