بس دا چیکر
جیویں میں پہلے آکھ آیاں ابے سئیں دی ہٹی وستی ءِچ ہئی ، ولا سڑک تے کھوکھا آن لاتونے ،وستی وی سڑک دی بھک تے ہے پر کھوکھا سڑک تے آیا تاں اساکوں ایویں لڳا جو اساں نویں دنیا ءِچ آ ڳیوں ۔ سارا ݙینھ لوکیں دا آ ونڄ۔ تھولیاں ہن پر بساں ہَن ، بسیں دے چیکر اساݙے کول آن ٻہندے ہَن ۔ بس کوں ݙیکھ تے کھوکھے دی اوڈھ گھن کھڑدے ہَن ، بس نیڑے اَمدی ہئی تاں بھڄ تے بس کوں ہتھ ݙیندے ہَن ، ڈلیور ہک دم بریک مریندا ہا، بس دے چیکاٹ نکل ویندے ہَن ۔چیکر چلدی بس تے چڑھ ویندا ہا ، چیکر بس تے چڑھ تے سب توں پہلے کنڈیکٹر کنوں کاپی گھندا ہا تے و لا سواریاں ڳݨݨ پئے ویندا ۔ولا کٹیاں ہوئیاں ٹکٹاں تے سواریں دا میل ملیندا ہا ۔جیکر فرق ہووے ہا تاں آکھدا ہا جو تئیں ’’ پھٹی‘‘ ماری اے۔ ڈھیر ساریاں کمپنیاں ہَن تے ڈھیر سارے چیکر ہوندے ہَن ۔ ہک اَکھ آلا کاݨاں چیکر مشہور ہا ،ہک نینگر ڄام بشیر ہا ،بݨ ٹھݨ تے رہندا ہا ،ٻارہاں یا چوݙاں پڑھی ودا ہا ، بعد ءِچ او محکمہ خوراک ءِچ فوڈ انسپکٹر بݨ ڳیا ہا ۔ہک منظور شاہ ہوندا ہا ، منظور شاہ ݙاڈھا تِکھا ہا ، ڳالھیں وی ڈھیر کریندا ہا ، بس کوں ڳولی آنگے بھڄ تے پمدا ہا ،1971ء دی جنگ دی ڳالھ اے او جنگ دے حال ݙیندا ٻیٹھا ہا تے ایݙوں جہازیں دا کڑکاٹ آیا ، منظور شاہ دھاڑ دھاڑ کیتی تے ساریں کوں آکھیا آئو بھڄو مسیت ءِچ پہہ ڄلوں ۔ بھارت دے جنگی جہاز آ ڳن ، سارے بھڄ تے سڑک آلی مسیت ءِچ پہہ ڳیوسے ، ݙو یا ترائے جہاز ہَن ہُنائیں دی تاں سیکنٹیں دی کھیݙ ہئی ، خان پور اسٹیشن تے گولے مار تے چلے ڳے ۔منظور شاہ کمبدا ویندا ہا تے خوف کنوں اونکوں کوسا تھی ڳیا ۔ ترائے چار ݙینھ دے بعد آیا ، کاݨاں چیکر وی آیا ٻیٹھا ہا اوندے سامھے پھوت پیا مریندا ہا تاں کاݨے چیکر آکھیا بس کر منظور شاہ ڈھیر پھوت نہ مار۔جہاز دا گجکار سُݨ تے تیݙی تاں سُتھݨ غار تھی ڳئی ہئی۔
حوالہ
[لکھو | ماخذ وچ تبدیلی کرو]کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان