بخت علی فقیر
آپ دا پورا ناں بخت علی تے تخلص بخت اے۔ آپ احمد پور لمہ تحصیل صادق آباد وچ راݨا نبی بخش دے گھر 1910ء وچ ڄمیئے۔ آپ قلعی گری دا کم کریندے ہن۔ کہیں دینی مدرسے توں کہیں قسم دی تعلیم حاصل کینی کیتی۔ آپ حج دی سعادت وی حاصل کیتی ہوئی اے۔ بخت فقیر چونکہ لکھݨا پڑھݨانیں ڄاݨدے ایں واسطے حافظے دی مدد نال کلام کوں محفوظ رکھیندن۔
بخت فقیر درویش انسان اِن۔ لوکاں دے اندر آپ دا ٻہوں احترام ہے۔ سرائیکی شاعری وچ ݙوہڑے دے چند ڳݨیے چݨیے شعراء وچ اُنھاں دا ناں آندے۔ انداز روایتی ہے مگر ݙوہڑے وچ انھاں دی خصوصیت فکر دی بلندی تے زبان دی روانی ہے۔ بخت فقیر دا دیوان وی 1981ء وچ شائع تھی چکے۔کلام دا نمونہ:
ݙوہڑہ
[لکھو | ماخذ وچ تبدیلی کرو]سسی عشق پُنل دے وچ ہک لحظہ کیتیاں گھلاں
بدلے ہوں اَکھ موٹݨ دے ربّ پاک نکھیڑیاں دِلاں
اصلوں ہوت نہ رولس ہا جے کر سُمھدی ڈھلاں
رو بختا اپݨی غفلت کوں سسی ہاں وچ سلاں
………
بہشت ملی تے یار نہ ملیا کیا کیتی بہشت چنگائی
دوزخ ڳیاں جے یار ملے تاں او وی سمجھ بھلائی
عشق امن کل گھول گھتاں اتے گھول گھتاں کل شاہی
اوں ݙکھ توں بختا صدقے تھیواں جیڑھا ݙکھ ملاوے ماہی
ایں دور دے کجھ ٻئے شاعر جنھاں روایتی انداز اِچ شاعری کیتی اے۔ لیکن شعری ادب دے ارتقاء وچ انھاں دا کوئی وݙا کم نظر نیں آندا او اے ہن۔
(1) ملک اللہ ݙتہ نسیم ملتان
(2) بہار ملتانی مرثیہ گو شاعر ملتان
(3) محمد یار فوق جام پور‘ ڈیرہ غازی خان
(4) اسد ملتانی ملتان
(5) حاجی نبی بخش شوق مرثیہ گو شاعر
حوالہ
[لکھو | ماخذ وچ تبدیلی کرو]کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان